SPESIALE VAKANSIE-AANBOD: Teken in teen net R49 vir jou eerste maand! Word 'n intekenaar
Tegnuus
SA kort 'Koue Oorlog' vir sukses met tegnologie

Hoewel die regering se tweede internasionale beleggingskonferensie in Johannesburg verlede week beloftes van beleggings ten bedrae van R363 miljard oor die volgende vyf jaar gelok het, word die plaaslike tegnologiebedryf steeds deur spesifieke uitdagings in die gesig gestaar.

Kaapstad huisves verskeie beginnerondernemings. Foto: Unsplasha

Ben Marrel, ’n waagkapitaalfinansierder en medestigter van Breega, het op die AfricArena-konferensie Maandag in Kaapstad verduidelik die uitdagings vir die bedryf is hoofsaaklik tweeledig.

Eerstens sukkel plaaslike beginnerondernemings om talent te lok om uiteindelik die produkte en idees van entrepreneurs in volwaardige ondernemings te omskep.

Suid-Afrika, sowel as die res van Afrika, het derduisende talentvolle entrepreneurs, programmeerders en sakelui oor die laaste paar dekades verloor wat verkies het om die vasteland vir groener weivelde te verlaat, sê Marrel.

Lande soos die VSA en Israel kon hierdie soort eksodus op sy kop keer deur die tweede uitdaging vir tegnologiemaatskappye die hoof te bied, naamlik die gebrekkige belangstelling van regerings om betrokke te raak.

Waar die talent nog iewers gevind kán word as dit moet, en selfs die nodige finansiering om toptalent te lok en hulle ’n mededingende salaris te betaal, beteken dit niks as die regering dit nie makliker maak om hier sake te doen nie.

Volgens Marrel, ’n Fransman wat deesdae in Australië woon, misluk talle regerings in Afrika nog daarin om te besef hulle moet sélf ook in entrepreneuriese tegnologie-ondernemings in hul lande belê.

Hy gebruik die bekende Silicon Valley in die Amerikaanse deelstaat Kalifornië as voorbeeld.

“Die maatskappye daar het nie vanself van die grond af gekom nie; die Amerikaanse regering het miljarde dollars daarin belê.”

Die verskil was dat Amerika ’n dryfveer gehad het danksy die Koue Oorlog en die wil “om met Rusland af te reken”.

Suid-Afrika en ander Afrika-lande het ook só ’n dryfveer nodig, sê hy. Kortom, die wil om te wen.

Ander faktore wat beleggers verhinder om in Suid-Afrikaanse tegnologiemaatskappye en -beginnerondernemings te belê, is die ingewikkelde en burokratiese reëls en regulasies hier.

Daarbenewens bied die staat nie genoeg aansporing in die vorm van belastingkorting of die verslapping van regulasies om innovasie en investering aan te moedig nie, sê Marrel.

“Beleggers wil nie oor sulke kwessies wonder nie,” sê hy. Dít is die werk van die entrepreneurs. Beleggers wil net die nodige kapitaal verskaf en weet ’n projek gaan werk.

“Daar is ’n aptyt om in Afrika te belê. Die idees is daar, maar dis te moeilik om in werking te stel.

“Die bedryf in sy geheel moet die regering dwing om sake te vergemaklik.”

Volgens die jongste Global Business Complexity-indeks, wat 76 lande se regulasies, arbeidswette, boekhoureëls en dies meer bestudeer, beklee Suid-Afrika die 30ste plek rakende die ingewikkeldheid om sake te doen.

AfricArena lok jaarliks beleggers en beginnerondernemings van oor die vasteland hierheen om idees uit te ruil en finansieringsmoontlikhede te bespreek.

Die konferensie duur tot Dinsdag.

Meer oor:  Tegnologie
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.