Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Landbou
Baie meer beeste as geraam het bek-en-klouseer

Baie meer beeste in Limpopo is met bek-en-klouseer besmet as wat aanvanklik vermoed is.

Ter illustrasie.Foto: Deon Raath

“Ons raam dat sowat 15 000 beeste in die kwarantyngebied met die siekte besmet is. Ons het aanvanklik gedink dit is sowat 3 000 beeste.

“Spanne wat onder meer bestaan uit spesialisveeartse, lede van die departement van landbou en die polisie, is besig om soveel moontlik diere in die Vhembe-distrik in te ent,” het Khaye Nkwanyana, woordvoerder van die departement van landbou, bosbou en visserye, Vrydag gesê.

Senzeni Zokwana, minister van dié departement, oorweeg die moontlikheid dat al die besmette diere van kant gemaak moet word.

“Omdat dit so ’n groot getal beeste is gaan ons meer geld van die tesourie moet ontvang om al die besmette diere van kant te maak. Daar moet dus nog eers daaroor besluit word,” sê Nkwanyana.

Hy sê die siekte kon moontlik reeds in November 2018 uitgebreek het.

“Ons het dit einde Desember 2018 opgetel en dus het die siekte tyd gehad om te versprei.”

Intussen het verskeie lande, onder meer Botswana, Zimbabwe en Namibië, ’n verbod geplaas op die invoer van rooivleis vanaf Suid-Afrika.

Henk van de Graaf, streeksvoorsitter van TLU SA in Limpopo, sê dit is moeilik om te voorspel of dié verbod ’n uitwerking op plaaslike vleispryse sal hê.

Boere wat vaste uitvoerkontrakte het, het egter ’n probleem omdat hulle vleis het wat uitgevoer moet word.

“Die binnelandse pryse kan dalk daal omdat daar ’n ooraanbod van vleis is, maar dit hang ook af van die boere se omstandighede. Dit het nou lekker gereën, so sommige boere kan dalk besluit om hul vee vir ’n ruk terug te hou. Dan sal daar nie ’n onmiddellike uitwerking op vleispryse wees nie,” sê hy.

Boere wat vaste uitvoerkontrakte het, het egter ’n probleem omdat hulle vleis het wat uitgevoer moet word.

“Sommige boere sit reeds met verliese van sowat R3 miljoen. As hulle gedwing word om hul vleis te verkoop, kan vleispryse moontlik daal.”

Van de Graaf sê daar is ook die moontlikheid dat die middelman, wat die vleis verkoop, die verkoopsprys dieselfde sal hou en dus sal die verbruiker nie daaruit voordeel trek nie.

Dr. Pieter Vervoort, voorsitter van die Nasionale Dieregesondheidsforum, sê sowat 5% van Suid-Afrika se vleis word uitgevoer en dat die moontlikheid van laer vleispryse redelik skraal is. Hy sê boere wat vleis uitvoer, gaan egter geraak word en kan verliese ly.

Vervoort sê daar is “absoluut geen gevaar” daaraan verbonde om die vleis te eet van ’n dier wat met bek-en-klouseer besmet is nie.

Van de Graaf sê die siekte kan redelik vinnig uitgeroei word indien die regering doeltreffend optree en daar genoeg entstof beskikbaar is vir boere. Hy sê daar moet egter nog vasgestel word of die siekte na kleinvee of wild versprei het.

“Die probleem is egter om die internasionale mark weer daarvan te oortuig dat die siekte hier uitgeroei is.”

* Bek-en-klouseer is ’n hoogs aansteeklike virale siekte wat vinnig onder diere met gesplete hoewe, soos beeste, varke, bokke en skape, kan versprei.

Meer oor:  Boere  |  Beeste  |  Landbou  |  Bek-En-Klouseer
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.