Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Maatskappye
Cartrack se eerste jaar op beurs lyk blink
'n Cartrack-helikopter.

Cartrack se finansiële resultate vir die ses maande tot einde Augustus én sy prestasie met die opspoor van gesteelde voertuie is stewig.

Die maatskappy, wat in Desember 2014 op die JSE genoteer het, spesialiseer in vlootbestuur en opsporingstoestelle en -dienste en het die afgelope jaar omvattende reklame gedoen om kliënte onder ondernemings en individue te wen.

Dit het gehelp dat Cartrack se wesensverdienste en wesensverdienste per aandeel in die oorsigtydperk met 16% tot onderskeidelik R111,7 miljoen en 37,2 sent gestyg het.

Cartrack het ook ’n tussentydse dividend van 20c verklaar, wat 25% stewiger is as in die vergelykende tydperk.

Voorts het sy subskripsiebasis met 20% tot 463 000 aktiewe kontrakte gestyg. Sy opspoorkoers van gesteelde voertuie is 93%.

Syfers

Nog Cartrack-syfers vir die ses maande tot einde Augustus, teenoor die vergelykende tydperk van 2014:

  1. Inkomste: +18% tot R469,7 miljoen
  2. Ebitda (inkomste voor rente, belasting, waardevermindering en afskrywings): +17% tot R210,3 miljoen
  3. Ebitda-marge: 45% (45%)
  4. Bedryfsmarge: 34% (36%)

Volgens Zak Calisto, uitvoerende hoof, is hy tevrede met die resultate in al die gebiede in Afrika, Europa, Asië en die Midde-Ooste waar Cartrack sake doen.

Al die streke het tot die groei bygedra, buiten nuwe bedrywighede wat die maatskappy aan die einde van verlede jaar in Asië en die Midde-Ooste gevestig het. Dié vestigingskoste het sy bedryfsmarge geknou.

As deel van sy wêreldwye uitbreidingsplan is die groep op pad Amerika toe waar hy reken daar aansienlike markgeleenthede vir sy vlootbestuursake is.

Calisto sê in die res van Afrika word verkoopsmagte in Kenia en Tanzanië verstewig om groei daar aan te moedig en in Nigerië het die groep wesenlike kontrakte gewen wat in die tweede helfte van die jaar tot winsgroei sal bydra.

In geheel verwag Calisto ’n sterker wins- en kontantvloeigroeikoers vir die res van die lopende boekjaar, ten spyte van die koste van die invoer van komponente en die verwagte bedryfsverlies van die nuwe sake in Asië en die Midde-Ooste.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.