Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Maatskappye
Covid-sterftes: Liberty beleef skerp styging in eise

Die Beta- en Delta-variant het Liberty se berekeninge oor sterftes deurmekaar gekrap.

Dié lewensversekeraar sê hy moet die pot vir die huidige boekjaar aanvul wat vir eise vir Covid-19-sterftes opsy gesit is.

Lewensversekeraars soos Liberty beleef skerp stygings in eise weens sterftes aan Covid-19. Foto: iStock

Liberty sê die pandemie-reserwe is in die 2020-boekjaar geskep om geld opsy te sit om vir die verwagte impak van Covid-19 op sy sake voorsiening te maak.

“Omdat die Beta-variant ernstiger was as die eerste variante in Suid-Afrika, het die impak op sterftes in 2021 tydens die tweede vlaag die verwagtinge oortref,” sê die maatskappy in ’n handelsoorsig.

“Dít, tesame met die impak van die huidige derde vlaag en die verwante voorkoms van die Delta-variant, vereis dat die pandemie-reserwe aangevul moet word.”

Die versekeraar sê hoewel die entstofprogram spoed optel en sal help om die verspreiding van die virus en ernstige toestande te beheer, bly die impak van die pandemie op kort termyn onduidelik.

Die groep sê egter sy sakke is nog vol. Hy bly goed gekapitaliseer nadat die voortgesette impak van die pandemie op bedrywighede en die verhoging in die pandemie-reserwe in ag geneem is.

Die groep verwag dat sy genormaliseerde kernwins vir die halfjaar tot einde Junie tussen 96,6c en 118c per gewone aandeel gaan wees, vergeleke met die verlies van 802,5c verlede jaar.

Sy basiese wins per gewone aandeel gaan tussen 75,9c en 92,7c wees, vergeleke met die verlies van 902,4c.

Liberty se aandeelprys het Donderdag nie veel gestyg nie.

Dit het op 15 Julie met 22% gespring ná ’n aankondiging dat die Standard Bank-groep beoog om al die aandele in die lewensversekeraar wat hy nie reeds besit nie te koop.

Standard Bank wil Liberty oorneem

Standard Bank-groep het op 15 Julie aangekondig hy wil Liberty oorneem.

Dit gaan lei tot die denotering van Liberty se gewone en voorkeuraandele.

Standard Bank wil die belang in Liberty wat hy nog nie besit nie, uitkoop. Foto: Reuters

Die ooreenkoms om die transaksie te bewerkstellig, is die vorige dag onderteken.

Die aandeelhouers sal vir 0,5 gewone aandele van Standard Bank plus R25,50 kontant per gewone aandele kry.

Die kontantaanbod bestaan uit R14,40 plus ’n spesiale verspreiding van R11,10 per gewone aandeel.

Dit kom neer op R89,46 per gewone aandeel, wat gekry gaan word gegrond op Standard Bank se huidige aandeelprys.

Dit kom neer op ’n premie van 32,6% van die sluitingsprys van Liberty op 14 Julie en 40% van die 30-dae- geweegde gemiddelde aandeelprys.

Die bankgroep en Liberty het sedert 1974 ’n spesiale verhouding, het die stigter van Liberty, wyle sir Donald Gordon, in 1999 gesê.

Die twee groepe het oor baie jare saamgewerk deur ’n “uiters suksesvolle en waardevolle bankversekering-ooreenkoms”.

Dit beteken die lewensversekering en ander versekeringsprodukte van Liberty is deur die bank verkoop.

“Die voorgestelde transaksie is ’n natuurlike verloop van dié spesiale verhouding,” sê die Standard Bank-groep in ’n verklaring.

“Dit sal die integrasie en vermoë om saam te werk verhoog om die beste aanbod van finansiële dienste aan kliënte te gee. Die groep het nou begin met die proses om sy reeks dienste uit te brei om ’n betroubare en voorkeurverskaffer van ’n al hoe wyer verskeidenheid finansiële en verwante dienste te verskaf.”

Die direksies van die twee maatskappye glo die verkryging van 100% van Liberty sal ’n “verenigde en formidabele mededinger in finansiële dienste in Afrika skep”.

Hulle sê die strategiese voordele van die transaksie is talryk en oortuigend.

Standard Bank se bankwese, batebestuur en korttermynversekering sal Liberty se lewensversekering en batebestuur aanvul. “Dit sal die posisie van Liberty se adviseurs in die mark versterk.”

Die Standard Bank-groep het Liberty sedert 1999 beheer toe die beheer van Gordon verkry is.

Standard Bank is die grootste finansiëledienstegroep in Afrika met totale bates van R2 500 miljard en ’n markwaarde van R208 miljard (einde Desember).

Tesame verskaf hulle aan meer as 50 000 mense in 20 lande werk.

Aandeelhouers sal die skema met ’n spesiale resolusie moet goedkeur met meer as 75% van die stemme.

Ander bepalinge moet ook nagekom word.

’n Omsendbrief sal gesamentlik deur hulle uitgereik word, insluitende die kennisgewing van die algemene vergadering. Dit sal na verwagting op 13 September gepos word.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.