Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Maatskappye
Shoprite: Detail oor Wiese-transaksie kom later
Christo Wiese

Beleggers wat nog baie vrae het oor die R3,3 miljard-transaksie wat Shoprite aangekondig het om dr. Christo Wiese, voorsitter, se spesiale stemaandele terug te koop, sal nog langer moet wag.

Die Shoprite-groep het Woensdag aangekondig hy het toestemming van die Oornamebeheerpaneel gekry om die omsendbrief met die detail oor die transaksie later uit te stuur.

Die plan was om dit voor hierdie komende Maandag 27 Mei uit te reik, maar uitstel is gekry tot 14 Junie.

Shoprite wil wegdoen met sy spesiale stemaandele wat deur Wiese se maatskappy Thibault besit word.

Geskiedenis van die stemaandele

Die spesiale stemaandele spruit uit die ontknoping van Pepgro se aandeelhouding in Pepkor en die ontknoping van Pepkor van sy aandeelhouding in Shoprite en Tradehold in 2000. Dit het tot drie aparte genoteerde groepe Pepkor, Shoprite en Tradehold gelei.

Voor dié ontknopings het die drie maatskappye elk aan Wiese se maatskappye sekere aandele uitgereik en in Shoprite se geval was dit uitgestelde aandele wat teen 0,1c per aandeel aan hom uitgereik is. Die aandele kry nie ’n dividend nie en het net ’n stemreg.

Die aandele is ook onderhewig aan sekere terme en is byvoorbeeld nie oordraagbaar nie, luidens die omsendbrief wat destyds uitgereik is daaroor.

Die aandele word in ’n sekere verhouding saam met gewone aandele gehou. As Thibault gewone aandele verkoop, is Shoprite veronderstel om die aandele in die verhouding terug te koop van hom.

Dit is veronderstel om teen die uitgereikte prys van 0,1c te gebeur.

Daar was ook ’n voorwaarde verbonde aan die hou van die aandele dat Thibault se gewone aandele nie tot onder 10% mag daal van die getal uitgereikte gewone aandele (op die dag wat die omsendbrief uitgereik is) nie. Shoprite het al die uitgestelde aandele dan teen 0,1c per aandeel verkry.

Baie vrae

Ontleders hou asem op om meer detail in die omsendbrief oor die transaksie te kry omdat daar nog baie vrae is oor hoe en hoekom die transaksie gedoen word.

Tumisho Motlanthe, ’n aandeelontleder van Coronation, het gesê hul siening is dat dit nie gunstig vir minderheidsaandeelhouers is nie. Die batebestuurder gaan kliënte aanbeveel om teen dit te stem.

“Hoewel die uitgestelde aandele (spesiale stemaandele) wesenlike stemreg het, het hulle nie enige ekonomiese belang nie.

“Daarom is dit onduidelik op grond waarvan die R3,3 miljard-waardasie vir die aandele bepaal is.”

Hy het gesê dit is nie duidelik wat die strategiese voordeel vir minderhede is vir Wiese om sy huidige negatiewe beheer te laat vaar nie. “Ons glo die nadele om die struktuur in plek te laat is nie swaarder as die voorgestelde koste van die transaksie nie.”

Casparus Treurnicht, portefeuljebestuurder van Gryphon Batebestuur, het gesê wat hy hoop om te sien in die omsendbrief is onder meer bevestiging deur Shoprite se bestuur dat die proses wel deur hulle begin is.

Treurnicht meen ook beleggers moet die volle waarheid vertel word van die waardering van R3,3 miljard.

Evan Walker, ’n portefeuljebestuurder van 36ONE, is gekant teen die transaksie. “Die aandele het geen waarde vir enige ander aandeelhouer behalwe Wiese nie. Dit het geen ekonomiese waarde vir minderheidsaandeelhouers nie.

“As Wiese dit in die ope mark aan iemand kon verkoop, is hy welkom.”

Hy het gesê behalwe as Walmart terugkom Suid-Afrika toe en R3,3 miljard aanbied aan Wiese om Shoprite te bekom, het die aandele geen waarde nie.

’n Persoon in die finansiëledienstebedryf wat nie aangehaal mag word nie, het verduidelik omdat die aandele gekoppel is aan die 10%- gewone aandele wat Thibault hou, beteken dit in werklikheid dat om die stemaandele te kry moet hulle bereid wees om die 10% te koop en dit beloop omtrent R11 miljard. “Die redenasie is dat die regte iets werd is, want iemand wat dit bekom, het ’n groot stemreg, maar die probleem is dit is gekoppel aan die 10%-belang wat Thibault hou.”

Steinhoff

Jan Meintjes, ’n portefeuljebestuurder van Denker Capital, het ook gesê Shoprite moet duideliker sê hoe by die R3,3 miljard uitgekom is.

Volgens hom wil dit voorkom of ’n vorige transaksie, toe Steinhoff (in 2017) die aandele sou bekom en wat deur die mat geval het nadat die maatskappy se aandeelprys ineengestort het, as ’n beginpunt gebruik word.

“Maar ek spekuleer, want totdat hulle nie meer duidelikheid daaroor gee nie, weet ons nie.”

Hy meen toe die transaksie beoog is met Steinhoff het Wiese saam met ander partye effektief beheer oor Shoprite gehad.

“Gegewe wat intussen gebeur het en dat Wiese gedwing was om van sy Shoprite-aandele te verkoop (in Desember 2017 ná die ineenstorting van Steinhoff se aandeelprys) wat hy as sekuriteit vir lenings aan banke gegee het, is hy heelwat verder van ’n beherende posisie as voorheen.

“In my oë maak dit sin dat die aandele nou verder weg is van beheer en in my boeke heelwat minder werd is.”

Volgens hom stem Denker saam dat dit in belang van die maatskappy is om sy kapitaalstruktuur “so skoon en netjies moontlik te kry en dit dus goed is om ontslae te raak van die uitgestelde aandele, maar dan moet die koste regverdig wees.”

Billik en redelik

Wiese het onlangs aan Netwerk24 gesê die transaksie kan nie gebeur tensy ’n onafhanklike kundige nie ’n mening uitgespreek het dat dit regverdig en redelik is nie. “Dit is gekry, aandeelhouers sal nooit kan stem as daar nie so ’n verslag deur ’n onafhanklike kundige is nie. Dit plaas duidelik waarde op die aandele waaroor ooreengekom is.”

In die aankondiging van 18 April het Shoprite gesê EY is aangestel as onafhanklike kundige en ’n “konsep-mening” is uitgespreek dat die voorgestelde transaksie as billik en redelik vir aandeelhouers beskou word.

Hoë hekkie

Sedert Coronation op 25 April kommentaar aan Netwerk24 gelewer het, is met die onafhanklike direksie van die Shoprite-groep ontmoet. “Ons verstaan ten volle waarom hulle hierdie voorstel aan aandeelhouers maak. Ons dink die direksie het hulself baie goed van hul taak gekwyt in die wyse waarop die transaksie aan aandeelhouers voorgelê is om daaroor te stem met ’n hoë hekkie vir die transaksie om te slaag,” het Motlanthe gesê.

Montlanthe het gesê desnieteenstaande het hulle nie hul siening verander oor die waardasie van die aandele nie en sal ’n stem teen die voorstel aanbeveel.

Jean Pierre Verster, portefeuljebestuurder van Fairtree, het gesê ’n spesiale resolusie sal nodig wees om die transaksie goed te keur, dus 75% van diegene wat stem, moet dit goedkeur.

Omdat Wiese-entiteite nie mag stem nie beteken dit met 21% van die totale aantal gewone aandeel in uitreiking sal die transaksie afgekeur kan word.

Meer oor:  Tradehold  |  Shoprite  |  Checkers  |  Christo Wiese  |  Markus Jooste
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.