Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Maatskappye
Brimstone se Clover-wipwarit duur voort

Brimstone Investments gaan hom nou wel onttrek aan die ooreenkoms om ’n 15%-belang in Clover te bekom wanneer die suiwelreus denoteer.

Fred Robertson, uitvoerende voorsitter van Brimstone.

Dis egter ’n bietjie meer ingewikkeld as dít: Die Kaapse beleggingsbeheermaatskappy het tot 31 Desember vanjaar om ’n bemagtigingsmaatskappy te vind wat hom in die Clover-transaksie kan vervang. Tot dan is Brimstone in naam deel van die konsortium beleggers wat Clover koop.

Die ommekeer oor Brimstone se belang in Clover het gekom nadat die pro-Palestynse aktiviste Boycott, Divestment and Sanctions (BDS) South Africa beswaar aangeteken het daarteen.

Daar is begin Februarie aangekondig Clover gaan uitgekoop word deur die konsortium Milco onder leiding van die Israelse Coca-Cola-botteleerder Central Bottling Company (CBC), verteenwoordig deur sy filiaal International Beer Breweries Limited (IBBL). Clover se topbestuur en ’n paar ander plaaslike beleggers is ook deel van Milco.

Brimstone is as bemagtigingsvennoot aangewys.

BDS South Africa het egter onmiddellik beswaar aangeteken en met ’n boikot van Clover-produkte gedreig. Tot dusver het die organisasie hom toegespits op Brimstone se betrokkenheid.

BDS beskuldig CBC daarvan dat hy hom aan menseregteskendings en oortredings van internasionale wetgewing skuldig maak weens sy bedrywighede in Palestynse gebiede wat deur Israel beset word.

Tisetso Magama, woordvoerder van BDS, het ’n vergadering met die Brimstone-direkteure Fred Robertson en Mushtaq Brey belê. Daarna het Brimstone in ’n kort verklaring gesê hy gaan sy rol in die voorgestelde transaksie “hersien”.

“Gegewe die maatskappy se waarde-gedrewe identiteit, het ons kennis geneem van die uitgebreide woede

oor deelname aan die transaksie.”

Begin Maart, toe Clover sy jaarsyfers uitgereik het, het Johann Vorster, uitvoerende hoof, gesê die transaksie gaan volstoom voort en alle partye is nog aan boord.

In sy Sens-verklaring Vrydag sê Brimstone hy het op 11 April ’n agterdeur-ooreenkoms met Milco en IBBL gesluit om Brimstone se onttrekking aan die ooreenkoms moontlik te maak. IBBL is ’n volfiliaal van CBC.

Die agterdeur-ooreenkoms behels dat Brimstone voor 31 Desember ’n bemagtigingsvennoot vir die transaksie moet vind, anders sal Milco Brimstone se belang oorkoop.

“As gevolg hiervan sal Brimstone nie aan die Clover-transaksie deelneem nie, hoewel hy vir ’n kort tydperk ’n belang in Milco sal hou.”

Brimstone sê hy is in “gevorderde gesprekke met ’n potensiële plaasvervangende breëbasis- swartbemagtigde aandeelhouer wat, as dit suksesvol is, kan meebring dat Brimstone sy volle belang in Milco vóór 31 Desember 2019 verkoop”.

Brimstone sê die stap sal na verwagting geen uitwerking op sy netto batewaarde hê nie.

Brimstone noem dat hy ’n beslissing van die JSE aangevra het oor die reguleringsimplikasies van sy onttrekking aan die transaksie. Dit word afgewag en sal bekend gemaak word sodra dit ontvang word.

Netwerk24 het by Clover navraag gedoen oor die implikasies vir die transaksie indien geen bemagtigingsvennoot gevind kan word nie.

In ’n e-pos wat toegeskryf word aan die konsortium, nie Clover nie, is geantwoord: “Die transaksie is ongeskonde en gaan voort. Milco is ten volle daartoe verbind. Die konsortium is ook steeds ten volle daartoe verbind om ’n beduidende bemagtigingsvennoot as deel van die transaksie te hê.” 

Clover en die konsortium gaan niks meer sê nie, luidens die e-pos.

Die Mededingingskommissie moet die transaksie goedkeur. Dié instansie is by magte om bemagtiging ’n voorwaarde van goedkeuring te maak.

Brimstone besit belange in onder meer Grindrod, Sea Harvest en House of Monatic.

Meer oor:  Brimstone  |  Clover  |  Suiwelbedryf  |  Suiwel
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.