Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Maatskappye
Jooste kla Absa verkoop Steinhoff-aandele ‘te laat’

Die omstrede voormalige uitvoerende hoof van Steinhoff, Markus Jooste, het “benadeel gevoel” omdat Absa in Desember verlede jaar “voete gesleep het” om die Steinhoff-aandele te verkoop wat die bank as sekuriteit gehou het vir ’n lening.

Markus Jooste
Markus Jooste toe hy voor die parlementêre portefeuljekomitee vir finansies verskyn het. Foto: Edrea du Toit

Dit blyk uit hofstukke in Absa se aansoek teen Jooste weens skuld van Mayfair Speculators waarvoor Jooste in 2007 borg ten bedrae van R100 miljoen geteken het. Dié saak het in November in die hooggeregshof in Kaapstad gedien. Uitspraak is onbepaald uitgestel nadat die partye ’n skikking bereik het, maar ’n kostebevel is wel teen Jooste gemaak.

Absa wys in sy skriftelike betooghoofde daarop dat as daar enige benadeling was, “dit self geskep is gegewe Jooste se rol in die ineenstorting van Steinhoff se aandeelprys”.

Dus het die respondent geen rede om oor die val in die Steinhoff-aandeelprys te kla wanneer hy die oorsaak daarvan en van Mayfair Speculators se haglike finansiële posisie is nie.
Absa

“Dus het die respondent geen rede om oor die val in die Steinhoff-aandeelprys te kla wanneer hy die oorsaak daarvan en van Mayfair Speculators se haglike finansiële posisie is nie.”

Toe Steinhoff se aandeelprys ’n jaar gelede ineenstort, het Mayfair Absa, Investec en Sanlam altesame sowat R1,2 miljard geskuld. Al drie instellings het Steinhoff-aandele as sekuriteit vir dié lenings gehou.

Absa se deel van die skuld het in daardie stadium R226 miljoen beloop. Absa het sy regte op die aandele uitgeoefen toe die skuldbedrag 70% van die waarde van die aandele oorskry het, maar die bank het nie dadelik of alles op een slag verkoop nie. Die verkope van die aandele het uiteindelik R118 miljoen van Mayfair se skuld aan Absa gedelg.

Absa sê die aandele is op ’n ordelike en verantwoordelike wyse verkoop in ’n poging om nie die mark te oorstroom nie. Hy wou ook ander beleggers, soos pensioenfondse, beskerm wat skade sou ly as die aandele verkoop word op die wyse wat Jooste nou aanvoer dit moes plaasvind.

Jooste sê toe Steinhoff se aandeelprys 8 Desember 2017 op R22,32 was, was die skuld 70% van die waarde van die aandele.

Links is Stefan Potgieter, direkteur van Mayfair Speculators, sy skoonma, Ingrid Jooste, sy vrou, Andrea, en haar suster (naam onbekend).

“Ten spyte van die skerp val in Steinhoff se aandeelprys en ten spyte van die applikant se kennis dat sy sekuriteit nie meer die skuld van Mayfair Speculators dek nie . . . het die bank in gebreke gebly om dadelik die Steinhoff-aandele te verkoop.”

Absa het tot 13 Desember gewag voor die eerste deel van die aandele verkoop is toe die aandeelprys al op R10,45 gestaan het.

“Om sake te vererger, het die bank besluit om dit in dele oor die volgende agt dae te verkoop.”

Teen 21 Desember was die aandeelprys op R4,86 toe die laaste aandele verkoop is.

Jooste wou glo ook hê dat Absa sy aansoek op ys plaas totdat ’n reëlingskema tussen die krediteure van Mayfair Speculators en sy beherende maatskappy, Mayfair Holdings, afgehandel is.

Albei maatskappye het reëlingskemas met hul krediteure getref wat deur die hof goedgekeur is om hul skuld terug te betaal. Die sperdatum hiervoor is tot einde Maart uitgestel.

Absa het einde September betalings van albei maatskappye ontvang ingevolge die reëlingskemas wat die skuld van Mayfair Speculators (die hoofskuldenaar), en op sy beurt Jooste s’n tot R86,6 miljoen (plus rente) verminder het.

Absa beskryf in die hofstukke Jooste se poging om die aansoek teen te staan as dié van ’n “desperate man wat sy kaarte so na as moontlik aan sy bors wil hou”.

Werner Lüderitz, SC, het namens Absa in die skriftelike betooghoofde gesê die gronde wat Jooste aanvoer om die aansoek teen te staan, is net ’n poging om die uitspraak te vertraag. Absa voer ook aan Jooste het nie die reg om te versoek dat die aansoek op die ys geplaas word totdat die reëlingskemas afgehandel is nie. Die reëlingskemas is kragtens art. 155 van die Maatskappywet getref en dit beïnvloed nie iemand wat borg gestaan het se aanspreeklikheid nie.

Jooste probeer hom distansieer

Dit blyk uit die hofstukke Absa meen Jooste probeer hom van Mayfair Speculators distansieer.

“Ten spyte van die respondent se pogings om hom van Mayfair Speculators te distansieer, is Mayfair Speculators is niks meer as die respondent se alter ego nie.”

Volgens Absa het Jooste onder meer nagelaat om te noem dat sy dogter met Stefan Potgieter getroud is en hy dus die besturende direkteur van Mayfair se skoonpa is.

Absa het ook ’n struktuur van die Mayfair-groep aangeheg wat getoon het die Silveroak Trust 100% van Mayfair Holdings hou wat 100% van die gewone aandele van Mayfair Speculators hou.

Die Silveroak Trust is in Mei 1989 geskep as die Markus Jooste Kindertrust en sy naam is in Februarie 2013 verander.

Dis ’n diskresionêre trust en hy is nie net ’n trustee nie, maar ook ’n kapitaal- en inkomste-begunstigde.

Die trustees van die trust is Jooste, Potgieter en Frikkie Nel.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.