Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Maatskappye
Lewis se wins groei; beloof beter tye vir beleggers

Die mark het Woensdag gehou van die meubelhandelaar Lewis se jaarresultate en sy aandeelprys op die JSE het in ’n stadium met 7% gestyg.

lewis, meubels
Lewis se aandeelprys was Woensdag laatmiddag 5% hoër op R34,20.

Lewis het bekend gemaak dat sy wins in die boekjaar tot einde Maart gestyg het – die eerste keer in twee jaar.

Johan Enslin, uitvoerende hoof, sê handelstoestande was uiters moeilik, maar die groep het nogtans bykans al sy teikens bereik.

Sy inkomste het met 10% tot R5,1 miljard gestyg. Dit is hoofsaaklik danksy die sterk groei in produkverkope wat met byna 23% tot R3,5 miljard gestyg het.

Meubelhandelaars maak ’n groot deel van hul verkope uit kredietverlening en versekering.

Meer meubels verkoop

“Ons resultate is ondersteun deur ’n sterk herstel in die bedrywighede van al ons tradisionele winkelgroepe – Lewis, Beares en Best Home and Electric,” sê Enslin.

Die sterk produkverkope is ook toegeskryf aan die nuwe meubelhandelaar UFO wat 14 maande gelede verkry is, maar sy tradisionele winkels vertoon ook goed.

Produkverkope verteenwoordig nou 57% van die totale inkomste. “Om dit in perspektief te stel: Toe ons die reis na diversifikasie begin het, het produkverkope net 46% van die inkomste bygedra,” sê Enslin.

Die bedryfswins het met 17% tot R443 miljoen gestyg en die wins met dieselfde persentasie tot R309,5 miljoen.

Lewis se wins het in 2017 skerp geval nadat debiteurekoste sedert 2015 skerp toegeneem het.

Debiteurekoste – wat afskrywings en voorsienings vir slegte skuld insluit – het begin toeneem omdat verbruikerskuld in die voorafgaande jare baie toegeneem het. Verbruikers het ook onder druk begin kom te midde van ’n verswakking in die ekonomie en stygende werkloosheid.

Minder skuld afgeskryf

’n Groot rede vir sy winsstyging die afgelope boekjaar is die 12%-daling in debiteurekoste tot R843 miljoen. Debiteurekoste het van 17% van die totale uitstaande skuld tot 13% gedaal. Enslin skryf dít toe aan die verbetering in skuld wat betyds betaal word.

“Die afgelope drie tot vier jaar het die groot afskrywings slegte skuld uit die skuldboek gehaal. Dit het ’n beter boek gelaat waarop die invorderingskoers beter is.”

Ons glo die tendens om opbrengste vir beleggers te verhoog, gaan voortduur. Dit is sterk op die bestuur se prioriteitslys om die ROE weer op dubbelsyfers te kry. Ons glo ons kan binne drie tot vier jaar weer daar wees.
Johan Enslin

Boonop het die gehalte van krediet wat goedgekeur is ook verbeter.

Volgens Enslin het daar in die boekjaar 17 000 kliënte bygekom in die mandjie kliënte wat hy as goeie betalers reken.

Dit het die kliënte wat bevredigend betaal tot 418 355 of 71% verhoog teenoor 68% ’n jaar gelede. Enslin beskryf dit as ’n redelike prestasie en sê dit is van die hoogste sedert Lewis 15 jaar gelede noteer het.

Lewis se inkomste uit versekering en rente op krediet het steeds in die boekjaar gedaal, maar Enslin sê dit het wel in die tweede helfte begin toeneem.

Hy verwag dat dié inkomste sterker gaan groei in die pas met die groei in kredietverkope. Dít het met 8% tot R2 miljard gestyg en illustreer die voordele van die wysigings aan die bekostigbaarheidsregulasies.

Dié regulasies het voorheen vereis dat mense wat vir hulself of in die informele sektor werk drie maande se salarisstrokies of drie maande se bankstate moes toon om vir ’n lening in aanmerking te kon kom. Drie genoteerde winkelgroepe het die hooggeregshof suksesvol gevra dat die regulasies ter syde gestel word.

Belofte aan beleggers

Enslin sê Lewis het ’n jaar gelede aan beleggers gesê hulle glo ’n draaipunt is bereik en dat hul strategieë vrugte gaan begin dra.

Die groep se kapitaalverhoudings wat beleggers help om ’n maatskappy se waarde te beoordeel, het almal die afgelope boekjaar verbeter. Dis sluit in die opbrengs op ekwiteit (ROE) wat nou op 6,4% is.

Dit was in 2016 laas op ’n dubbelsyfer (17,6%) waarna dit soos ’n klip geval het.

“Ons glo die tendens om opbrengste vir beleggers te verhoog, gaan voortduur. Dit is sterk op die bestuur se prioriteitslys om die ROE weer op dubbelsyfers te kry. Ons glo ons kan binne drie tot vier jaar weer daar wees.”

Lewis se aandeelprys was aan die einde van die boekjaar op R30,30 – ’n diskonto van byna 50% op die netto batewaarde van R60,80.

Lewis het met ’n aandeleterugkoop begin en 3,2 miljoen aandele teen R30,30 elk teruggekoop.

“Daar is baie waarde in die aandeel, daarom gaan ons voort met die terugkoop van aandele. Ons kan 10% terugkoop en ons het nog net 1,8% gekoop. Ons glo dit is ’n baie goeie manier om aandeelhouerswaarde te verhoog.”

’n Slotdividend van 129c is verklaar – 28% meer as ’n jaar gelede.

Sy aandeelprys was Woensdag laatmiddag 5% hoër op R34,20.

Meer oor:  Lewis  |  Johan Enslin  |  Kleinhandel  |  Aandeelpryse  |  Meubelhandel  |  Kleinhandelaars
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.