Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Maatskappye
Likwidasie: Steinhoff-eisers kry ‘eers in 2031’ iets

Die aandeelhouers wat eise teen Steinhoff ingestel het, sal as hy gelikwideer word waarskynlik eers teen 2031 ’n uitbetaling kan kry.

Steinhoff se kantore in Stellenbosch. Foto: Edrea du Toit

Inligting oor ’n hipotetiese likwidasie word uiteengesit in ’n verduidelikende dokument wat Steinhoff Vrydag uitgereik het oor ’n reëlingskema om  sekere skuldeisers se toestemming te kry vir ’n skikkingsooreenkoms met die aandeelhouers wat eise teen hom ingestel het.

Die reëlingskema word onderneem deur die genoteerde moedermaatskappy, Steinhoff International Holdings NV, wat in Nederland opgerig is.

Die reëlingskema, ingevolge ’n hofproses in Brittanje, is genoodsaak nadat ’n poging misluk het om goedkeuring van twee groepe skuldeisers te kry vir die  voorgestelde skikking met die aandeelhouers. Steinhoff wil die regseise teen hom skik omdat dit groot onsekerheid oor die groep se toekoms skep.

Die vergadering oor die reëlingskema is veronderstel om op 15 Desember gehou te word, maar drie ondernemings het reeds te kenne gegee dat hulle dit gaan teenstaan.

Die reëlingskema word wetlik opdwingbaar as die vereiste meerderheid krediteure  ten gunste daarvan stem en die hof dit bekragtig. Die hof sal net die uitslag bekragtig as hy tevrede is dat die regte prosedure gevolg is, dat die voorgestelde reëlingskema redelik is en dat daar geen rede is hoekom die skema nie goedgekeur moet word nie.

Steinhoff sê in die verduidelikende dokument as die skikking met die aandeelhouers misluk, sal likwidasie oorweeg moet word. Die skikkingsvoorstel behels onder meer dat sy skuldeisers verdere uitstel vir die terugbetaling van honderdmiljarde rande se skuld aan hom gee.

Die verduidelikende dokument bevat ’n ontleding van Analysis Group in opdrag van Steinhoff oor hoeveel geld aandeelhouers uiteindelik sal kry in geval van ’n likwidasie en hoe lank dit sal duur voordat hulle enige betaling ontvang.

Hoeveel uitgekry sal kan word

Die totale waarde van aandeelhouers se eise beloop sowat €4,9 miljard, waarvan €2,9 miljard van aandeelhouers is wat hul aandele in die mark gekoop het en die res is van partye wat hul ondernemings aan Steinhoff verkoop het in ruil vir sy aandele of wat regstreekse ooreenkomste met die maatskappy gesluit het.

Einde Maart 2021 sal die waarde van krediteure se eise €9,1 miljard beloop.

Met ’n likwidasie sal die opbrengs wat Steinhoff NV kry, einde Maart 2031 sowat €631 miljoen beloop.

Aandeelhouers sal €183 miljoen daarvan kry vir hul eise en die krediteure €390 miljoen.

Dit kom vir albei groepe neer op 3,7 eurosent per euro, volgens die ontleding.

Filiale ook gelikwideer

In ’n likwidasie sal die groep sy belange in sy filiale moet verkoop.

Belangrike Suid-Afrikaanse filiale soos SIHL, SIHPL en SAHPL (sien hierby waarvoor die afkortings staan) is self óf insolvent óf hou wesenlike onderlinge skuld tussen maatskappye in die groep en dit is “waarskynlik dat sulke filiale dan self ook in likwidasie sal moet gaan”. Dit gaan lei “tot ’n verlies aan beheer oor die tydsverloop van en wyse hoe sodanige bates gerealiseer word asook die verspreiding van die oorblywende opbrengste na die Nederlandse maatskappy”.

Die verskillende regsgedinge van aandeelhouers teen die groep gaan lank duur om af te handel en ook die uiteindelike uitbetalings vertraag.

Indien die likwidateurs tot die gevolgtrekking kom dat ’n ondersoek nodig is oor die betrokke onderneming wat gelikwideer word, kan dit tot verdere vertragings lei.

Die berekenings oor ’n hipotetiese likwidasie gaan uit van die aanname dat dit op 31 Maart 2021 sal begin wanneer dit duidelik is dat die skikkingspoging misluk het en alle ander opsies ondersoek is.

Vir die doel van die berekening is aangeneem dit sal gemiddeld ’n jaar duur om die onderliggende bates van die groep te verkoop.

Daarna sal SAHPL en SIHL teen 2024 al hul aanspreeklikhede betaal het.

Komplekse groep

Talle aandeelhouers het teen die huidige moedermaatskappy en ’n voormalige moedermaatskappy van die groep, die Suid-Afrikaans geregistreerde Steinhoff International Holdings Limited (SIPHL), eise ingestel weens hul verliese nadat die aandeelprys in Desember 2017 in duie gestort het.

Die groep bestaan uit talle filiale wat regstreeks en onregstreeks gehou word, insluitende Steinhoff Finance Holding GmbH (SFHG), Steinhoff Europe AG (SEAG) en SIPHL.

Die groep het sy ontstaan in 1964 gehad.

Steinhoff International NV is in Junie 2015 opgerig onder die naam Genesis International Holdings NV. Sy naam is in November daardie jaar verander na Steinhoff.

Kort daarna, in Desember 2015, het Steinhoff International NV al die aandele van SIHPL bekom deur middel van ’n Suid-Afrikaanse reëlingskema deur aandele uit te ruil.

Elke aandeelhouer van SIHPL het toe ’n aandeelhouer in Steinhoff International NV geword en laasgenoemde het die moedermaatskappy en alleenaandeelhouer geword van Steinhoff Investment Holdings Limited (SIHL) – ’n nuwe tussenganger-beheermaatskappy vir die Suid-Afrikaanse afdeling van die groep.

Ook SIHL is in Suid-Afrika genoteer.

Steinhoff International NV se aandele is van 7 Desember 2015 af in Frankfurt en in Johannesburg genoteer.

SIHL, die beheermaatskappy van die Suid-Afrikaanse groep van maatskappye en ’n regstreekse filiaal van die Nederlandse Steinhoff, sal na verwagting eers teen 2026 sy likwidasie afhandel en sy voorkeuraandeelhouers betaal. Eers dan sal enige ekwiteitswaarde opwaarts na die Nederlandse Steinhoff versprei kan word.

Die oorsese maatskappye SEAG en SFHG sal waarskynlik ook eers teen 2026 hul aanspreeklikhede kan betaal op grond van die geraamde tyd wat dit sal duur om die onderliggende bates in die Europese groep van maatskappye te realiseer. Dié twee ondernemings is die twee Steinhoff-filiale waar die meeste van die groep se finansiële krediteure gekonsentreer is. Daar word nie verwag dat enige ekwiteitswaarde van hulle gaan kom nie, weens die omvang van die skuld in dié Europese maatskappye, lui die dokument.

Die Suid-Afrikaanse bates wat in die berekening in ag geneem word, sluit in die belang in die genoteerde Pepkor, eiendomme in die land en ’n belang in die IEP-groep.

Die Europese bates sluit in belange in Pepco, Poundland, Greenlit, Mattress Firm en LIPO, Conforama en Hemisphere.

Die opbrengste uit die likwidasie van die bates in elke maatskappy sal eers opwaarts vloei na die Nederlandse Steinhoff nadat elkeen se aanspreeklikhede, eise en die koste van likwidasie betaal is.

Die opwaartse vloei van die opbrengste na die Nederlandse maatskappy sal na verwagting op 31 Maart 2026 plaasvind – vyf jaar nadat die hipotetiese likwidasie begin het.

“Dan word aanvaar dat die opbrengs vir nog vyf jaar gehou gaan word in Steinhoff International NV tot 31 Maart 2031 op grond van die advies van Nederlandse regskenners oor hoe lank dit sal duur om dié maatskappy se likwidasieproses af te handel.”

Baie min oorgehou

Die raming is dat die opbrengs uit die realisering van die onderliggende bates ten tyde van ’n likwidasie in Maart 2031 631 miljoen sal beloop.

Teen daardie tyd sal die totale aanspreeklikhede van die Nederlandse Steinhoff na raming 14,8 miljard beloop. Die geraamde waarde van eise wat deur aandeelhouers ingestel is, beloop 4,9 miljard daarvan.

Na raming sal dié opbrengs neerkom op ’n huidige waarde wat krediteure gaan kry (insluitende finansiële krediteure) van minder as 4 eurosent per euro.

Die skikkingsvoorstel behels dat aandeelhouers wat hul aandele in die mark gekoop het; dié wat kontraktuele eise ingestel het voortspruitende daaruit dat die eisers hul ondernemings aan Steinhoff verkoop het in ruil vir sy aandele; en diegene wat aandele bekom het deur regstreekse ooreenkomste met die maatskappy te sluit, 887 miljoen sal ontvang. Dié bedrag sal die helfte in kontant en die helfte in Pepkor-aandele betaal word.

Sonder om aanspreeklikheid te erken, meen Steinhoff NV hierdie eise sal teen wesenlik groter bedrae teen hom beslis word.

Indien die reëlingskema misluk

Steinhoff sê in die verduidelikende dokument indien die reëlingskema misluk, is die kanse goed dat hofuitsprake teen die groep later in 2021 kan begin instroom.

“Onder sulke omstandighede, en gegewe die finansiële situasie van die maatskappy, sal hy nie in staat wees om sy skuld wat einde 2021 verval, te herfinansier nie.”

Dit beloop sowat 9,1 miljard.

“Die maatskappy sal gevolglik verpligtinge hê wat wesenlik meer is as die waarde van sy bates.

“Dit sal vereis dat die direkteure die maatskappy as ’n lopende saak revalueer en dit sal waarskynlik daartoe lei dat hulle besluit om aansoek te doen om likwidasie.”

Wanneer die skikkingsooreenkoms goedgekeur word, sal ’n hofproses in Nederland en in Suid-Afrika van stapel gestuur word waar aandeelhouers sal kan stem om die skikking bindend te maak op alle eisers en krediteure.

Meer oor:  Steinhoff  |  Bedrog  |  Skuld  |  Sakeredding  |  Likwidasie  |  Eise  |  Meubelhandel
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.