Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Maatskappye
’n Dag by die banke

“ ’n Bank is ’n bank is ’n bank.”

“Ons is deur die bank aan jou kant, Standard, Standard Bank!”

“Wie moet ons bedank? Boland, Boland Bank.”

Die hoofkantoor van drie van die vier grootste banke in die land in Kaapstad. Foto: Reuters
Reuters reuters

Banke is tipies verteenwoordigend van wrewelkopies of wreweldienste – goed soos versekering wat jy nie wil betaal nie, maar jy weet jy nodig het.

Banke is ook so ’n diens wat jy lief is om te haat. So, dis vreemd dat hul reklameklingels van dekades gelede steeds so hardnekkig in jou geheue vassteek.

Ek moes in die week ’n vorm laat stempel by al vier die groot banke, plus Capitec.

TymeBank, African Bank, Investec Bank, RMB en Finbond Mutual Bank was nie op die lys nie – dis banke vir die superrykes of superarmes.

My ervaring by Absa, Standard Bank, Nedbank, FNB en Capitec bied tog ’n interessante kykie na hoe dié banke tans daar uitsien en meeding wat tegnologie en kliëntediens betref.

Ek het besef tegnologie kan ’n mens net so ver bring, en menslike kontak kan steeds ’n verskil maak – positief of negatief.

Bygesê, ter grasie aan van die banke is regstreekse vergelykings straks nie billik in die lig van elke banktak se spesifieke geografiese plasing en sy tipiese besoekersgetalle nie. Maar hier gaan ons.

Ek het eerste by Absa se tak in Adderleystraat in Kaapstad ingestap. Dié tak was ’n dekade of wat gelede die hele kelderverdieping van die ou Trustbank-gebou vol. Dit beslaan vandag net ’n klein hoekie van dieselfde gebou, wat klaar iets vertel van hoe die tradisionele banke moes aanpas en koste sny uit verdediging teen hul opkomende en vlugvoetiger digitale mededingers.

In dié tak het ek gesoek na die navraagtoonbank. Daar was nie een nie, maar in die plek daarvan was ’n superdoeltreffende Absa-werknemer wat staande besig was om ’n ander persoon te help. Toe sy my sien, los sy vir ’n paar sekondes die ander kliënt en vra dadelik waarmee sy my kan help. Ek sing my storie en sy sê sit ’n oomblik. Ek sit skaars toe is hulle klaar en sy jaag my in ’n kantoortjie in waar sy my gou help. Sy het egter steeds ’n uitsig op die oop ruimte in die bank waar mense instap, en sodra iemand inkom, spring sy gou op om te hoor wat die persoon wil hê.

Hier moes ek byna elke vinger op my regterhand op ’n vingerafdrukleser plaas, totdat my regterpinkie my uiteindelik darem kon identifiseer.

Hierdie stelsel kan flink werk as die bank nie te besig is nie, en ek wil Absa ’n pluimpie gee vir sy effektiewe en behulpsame personeel, maar ’n mens kan dink dit gaan lol as die bank te vol raak.

Daarna is ek Capitec toe. Die ou by die ingang sê ek moet ’n konsultant sien. Hy wil my dus nie sommer net na die navraagtoonbank stuur nie. Capitec gebruik die nommerstelsel. Jy weet mos, vat ’n nommer en gaan sit.

Gelukkig was dié tak van Capitec nie in daardie stadium so besig nie, so ek het skaars die papiertjie met nommer 049 in my hand of die blikstem roep my na tafel 5. Hier moes ek byna elke vinger op my regterhand op ’n vingerafdrukleser plaas, totdat my regterpinkie my uiteindelik darem kon identifiseer. Was dit hul leser wat foutief was of was my vingerpunte in daardie stadium al ’n bietjie gesweet en bewerig? Nietemin, die vorm het vereis dat die bank moet bevestig of ek en my vrou ’n rekening daar het of nie, en al het ek my vrou se identiteitsnommer byderhand, sê Capitec sy moet ook persoonlik teenwoordig wees om so iets te doen (Absa het net haar ID-nommer ingetik).

Af na Nedbank. Dis weliswaar ’n stil tak en eenkant, so ek word vinnig gehelp en die persoon by die navraagtoonbank vra nie eens my ID-dokument nie, die nommer is voldoende. In en uit in minder as twee minute.

Verder af Standard Bank toe. Dié “bank” waar ek instap, is toe nie ’n kleinhandeltak nie, maar die korporatiewe kantore in ’n blink, ruim en moderne gebou. Die vriendelike persoon daar beduie my toe wel waar die kleinhandeltak is, maar my wenkbroue lig. Die gevaarligte moet begin flikker vir ’n maatskappy as jy sien hy bou groot en blink hoofkantore terwyl sy kliënte en werkers op die grond in effe meer beknopte en afgeleefde ruimtes moet sake doen. Dié banktak het ’n sogenaamde hello-toonbank, met ’n navraag-afdeling wat diep agter om ’n lang draai weggesteek is. Ek is onseker, en staan maar in die tou by die hello-toonbank. Standard Bank-werknemer A help die mense voor my flink, maar gaan dan elders en ek vra Standard Bank-werknemer B waar ek ’n stempel kan kry om te sê of ek hul kliënt is of nie. Sy wys ek moet na die navraag-afdeling gaan. Daar loop ek my vas in ’n binnelandsesake-situasie – net twee of drie personeellede agter die toonbank en tientalle mense wat in twee rye sit en wag. Nee, vandag gaan ek nie hier regkom nie, dink ek. Uit en op soek na FNB.

Net toe kom ’n FNB-werknemer daar aan wat hulp aanbied. Ek verduidelik en sy verstaan dadelik dis mos sommer ’n vinnige joppie, en sy onderbreek ’n kollega by ’n dienstoonbank wat my help. In en uit onder drie minute.

Google Maps meen die naaste FNB is by die Portside-gebou – terloops, die hoogste gebou in Kaapstad. Nou goed, FNB het ook ’n blink en luukse hoofkantoor, maar daar is darem ook ’n ingeligte veiligheidswag wat my wys waar die ewe luukse kleinhandeltak is. By FNB moet jy ook ’n nommer vat en gaan sit. Maar hier raak dit mooi. Daar is ’n raakskerm in die voorportaal waar jy self jou nommer kan uitdruk of dit selfs na jou selfoon laat SMS. Die skerm wys selfs hoe lank hy dink jy gaan wag voordat jy iemand sien, en dan kan jy op ’n ander ikoon druk waarmee die bank jou kan “roep” om te kom as jy voel jy wil eers in die buurt daar naby gaan koffie drink of inkopies doen. Die skerm sê ek gaan ’n halfuur wag, so ek begin huiwer. Net toe kom ’n FNB-werknemer daar aan wat hulp aanbied. Ek verduidelik en sy verstaan dadelik dis mos sommer ’n vinnige joppie, en sy onderbreek ’n kollega by ’n dienstoonbank wat my help. In en uit onder drie minute.

Nou waag ek dit om terug te keer na Standard Bank. Hierdie keer stap ek self regdeur agtertoe na die navraag-afdeling waar ek kon sweer die jong vrou met die lang hare steeds staan waar sy netnou gestaan het, maar met ’n effe groter geïrriteerde moegheid in die liggaamshouding. Nee, ek sal maar ’n ander Standard Bank-tak op ’n ander dag of dorp probeer, dink ek. Maar op pad uit sien ek Standard Bank-werknemer A weer raak en kla by haar oor die distopie daar agter. “Maar wie het jou soontoe gestuur vir so ’n eenvoudige takie?” en vinnig red sy Standard Bank se reputasie.

Banke, let op in die klas: Tegnologie kan soms meer van ’n hindernis as ’n hulp wees. Wat bedoel is om dinge makliker te maak, kan dikwels net frustreer en bemoeilik. Maar as jy genoeg van die regte personeel op die regte plekke het, kan jy met of sonder tegnologie ingryp om steeds ’n kliënt te laat glimlag.

Meer oor:  Nedbank  |  Fnb  |  Absa  |  Capitec  |  Standard Bank  |  Bankdienste  |  Rubriek  |  Tegnologie  |  Banke  |  Punt Van Die Saak
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.