Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Maatskappye
Netcare se baas moet R200 m. se aandele verkoop

Dr. Richard Friedland, uitvoerende hoof van die Netcare-groep die afgelope 22 jaar, moes noodgedwonge ná die onlangse daling in die maatskappy se aandeelprys al sy aandele verkoop weens skuld wat hy gemaak het om die aandele te koop.

Netcare het Woensdag aangekondig hy het 10,4 miljoen van sy aandele vir R200 miljoen verkoop. Dit was glo al sy aandele.

Dr. Richard Friedland, uitvoerende hoof van Netcare.

Die hospitaalgroep het in ’n verklaring op die JSE se nuusdiens gesê: “As gevolg van die onlangse daling in Netcare se aandeelprys, was Friedland verplig om die transaksies uit te voer om die koste van verkryging en verwante finansiële koste teen die huidige waarde van die aandele te balanseer...”

Dit hou blykbaar verband met die lenings wat uitgeneem is om die aandele te bekom.

Die aandele het hy onder meer verkry met die aandeelopsies wat hy oor talle jare uitgeoefen het.

Die direksie het gesê hulle wil bevestig dat Friedland tot Netcare “verbind bly”.

Wanneer ’n uitvoerende hoof of direkteur van ’n maatskappy skielik so baie aandele verkoop, lei die mark gewoonlik daarvan af dat hy nie meer vertroue in die onderneming het nie, behalwe as ’n ander rede gegee word.

Friedland is sedert 15 Mei 1997 die uitvoerende hoof.

“Friedland het bevestig hy is van voorneme om tot minstens einde 2022 die uitvoerende hoof te bly en toesig te hou oor die implementering van die hersiene strategie van die groep, waarvan ’n belangrike deel die digitalisering is.”

Netcare se aandeelprys was in April 2015 op ’n hoogtepunt van R43. Die aandeelprys het sedertdien begin daal. ’n Skerp val het egter van begin Mei af voorgekom toe die aandeelprys met 21% van R24,13 tot R18,85 geval het.

Netcare het op 9 Mei ’n handelsoorsig uitgereik. Sy resultate wat intussen uitgereik is, toon sy wins is onder druk.

Lees ook: Dit is hoekom Netcare pasiënte verloor

David Shapiro, ’n aandelemakelaar, het Woensdag ná ’n val van 5% in die aandeelprys op Twitter gesê die “aandeel is in ICU”. “Oor die afgelope tien sessies is die aandeelprys 21% af tot die laagste vlak in ses jaar. Die resultate het nie die ligte uitgeskiet nie, maar dit is nie so swak nie. Dit is moeilik om te bepaal wie verkoop en wat die rede is.”

Volgens hom het Life Healtchare ook in dié tyd met 10% geval.

Dit is nie duidelik of dit die verkoop van dié aandele is wat moontlik die aandeelprys onder druk geplaas het nie.

Die transaksie het heelwat kommentaar op Twitter onder batebestuurders ontlok.

Delphine Govender, beleggingshoof van Perpetua Batebestuur, het gesê dit is wéér ’n geval van ’n aandeelstruktuur van ’n direkteur van ’n maatskappy wat nie geopenbaar is nie. Sy het gesê die banke wat dit instel weet daarvan maar nie die aandeelhouers nie.

Die resultate het nie die ligte uitgeskiet nie, maar dit is nie so swak nie. Dit is moeilik om te bepaal wie verkoop en wat die rede is.
David Shapiro

“Dan wanneer die aandeelprys val, skop die struktuur in om ’n gedwonge verkoop te veroorsaak... aandeelhouers is geregtig op openbaarmaking.”

Sy meen die reguleerder moet dringend vereistes afdwing sodat enige wettige beswaring oor ’n direkteur se aandeelhouding geopenbaar word.

Piet Viljoen, uitvoerende voorsitter van die beleggingsmaatskappy RECM, meen hoe meer reëls kom, hoe meer winsgewend raak dit vir beleggingsbanke om ’n nuwe skuiwergat te kry.

Mark Narramore, ’n ontleder van Excelsia Capital, het ook gewonder: “Wanneer word dit ’n vereiste vir direkteure om ooreenkomste vir kollateraal te openbaar?”

Die JSE het in September verlede jaar in reaksie op onder meer die gebeure by Steinhoff ’n konsultasie-dokument uitgereik, waarin gesê is hy het kennis geneem van transaksies deur direkteure wat druk geplaas het op die aandeelprys en dat die mark onbewus was van dié reëlings wat tot die transaksies gelei het.

Die JSE is gevra vir meer openbaarmaking oor sulke transaksies waar die aandele wat deur ’n direkteur gehou word gebruik word as kollateraal of ’n waarborg as sekuriteit vir ’n finansiële verpligting.

Tans word openbaarmaking net vereis wanneer die aandeel reeds verkoop is en nie wanneer die reëling getref word nie. Die JSE oorweeg beter openbaarmaking van die reëlings wanneer dit plaasvind.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.