David Maynier wil weer weet of dit dan korrek is daar gaan nié ’n finale PwC-verslag in Desember uitgereik word nie.

Du Preez: “Dit is korrek.”

Volgens hom is daar drie doelstellings met die ondersoek van PwC naamlik om te bepaal wat gebeur het; die finansiële ondersoek; en wie verantwoordelik gehou moet word. Volgens hom gaan al die inligting mettertyd uitgereik word. Steinhoff reik Vrydag sy kwartaalverslag uit.

David Maynier vra: “Wat kán ons dan verwag?”

Du Preez sê die bevindinge oor wat gebeur het, sal in fases uitgereik word.

Daar is ’n laaste geleentheid om Steinhoff se direkteure te ondervra in dié marathon-dag in die parlement.

David Maynier van die DA wil weet of dit korrek is PwC gaan net ’n tussentydse verslag einde van die jaar uitreik.

Louis du Preez sê mense moet verstaan wat die doel en die benadering van PwC is, en die kort antwoord is nou dat daar nie ’n verslag beskikbaar gaan wees einde van die jaar nie.

Alf Lees van die DA kan nie verstaan hoekom gaan daar nie ’n verslag gaan wees nie. “Almal wag vir ’n verslag om voort te gaan.”

Heather Sonn maak kapsie teen die idee wat geskep word dat Steinhoff nie wil saamwerk nie.  “Ons het nog ’n marathon wat voor ons lê.”

Sy erken egter ook nou die art. 34-vorm is ingedien omdat Steinhoff ’n spertyd van die CIPC gekry het om ’n klag in te dien. “Dit was toevallig einde Januarie voordat ons parlement toe gegaan het. Dalk wou hulle dit ook doen voor dan.”

Khana sê wanneer hy sê hulle wag nog vir die verklaring, dan wag hulle nog daarvoor. Volgens hom mag die Valke nie met Booysen skakel nie, maar moet hulle met Werksmans skakel: “Dit is nie normaal nie.”

Hy sê “dit gebeur net as iemand bang is hy inkrimineer homself, en hoe kan dit wees, want Booysen het die klag ingedien?

“Ons wag steeds op daardie verklaring. Daar is geen bewyse onder eed wat my toelaat om na enigiemand toe te gaan om hulle te ondervra of na ’n aanklaer te vat om ’n dagvaarding te kry om iemand in hegtenis te neem nie.”

Driman meen hulle kry dalk opdragte van ’n ander tak van die Valke. “Daar ís ’n verklaring onder eed, ek kan die kwitansie vir julle toon.”

Robert Driman van Werksmans bevestig nou die art. 34-verslag wat hulle ingedien het einde Januarie was net die vorm wat ingevul is. Dit is gedoen nadat Steinhoff ’n nakomingsbevel van die Kommissie vir Maatskappye en Intellektuele Eiendom (CIPC) gekry het. 

Daarna het dit aan die lig gekom dat ’n verklaring afgelê moet word.

David Maynier van die DA het daarop gesê die publiek is onder die indruk gebring ’n klag is ingedien.

Volgens Driman het hulle sedert vroeg in die jaar gereeld met senior mense van die Valke ontmoet.

Dit is juis ná ’n ontmoeting met die Valke en ander reguleerders in Julie waarop PwC terugvoering gegee het oor wat sy ondersoek tot dusver toon dat die Valke aanbeveel het ’n klagte word ingedien.

Daarna het Sonn die jongste klag in Augustus ingedien.

Sonn sê hulle het verstaan daar gaan voortdurend inligting na vore kom en daarom het sy die onlangse klagte ingedien.

Sy noem die vertraging met die Valke se ondersoek ’n bottelnek. “As dít die bottelnek is, gaan die hele proses nie lei waarheen ons wil hê dit moet lei nie.”

Heather Sonn sê die voorlegging deur die Valke is uiters teleurstellend en sy is nou baie bekommerd.

Volgens haar is daar ’n span van Steinhoff wat onvermoeid daaraan werk om antwoorde te verskaf.

Sy het vir Booysen ’n teksboodskap gestuur en hy het bevestig hy het geen idee dat die Valke inligting van hom soek nie.

Volgens haar het Steinhoff ook aan die Valke gesê hulle kan PwC gebruik soos hulle wil, enige tyd. Steinhoff sal ook die koste daarvan dra.

Wilma Newhoudt-Druchen van die ANC, wat met behulp van ’n gebaretaal-tolk praat, smeek nou dat die vrae beantwoord word, want haar tolk het nog nie ’n pouse gehad nie. Sy wil weet of die Valke vir Steinhoff gevra het vir die verklaring en of Steinhoff dit geweet het. Hoekom word dit vertraag? 

Wat betref Steinhoff se klagte – die een wat Steve Booysen aanhangig gemaak het – sê Khana die vorm vir art. 34-klagte word van die internet afgelaai en aan die polisie gestuur en die polisie is verplig om dit te ondersoek.

Sodra ’n verklaring gekry word met al die inligting, word ’n saak geopen.

Carrim herhaal dat Khana nie die vrae beantwoord nie. Hy wil weer weet of Khana vir Jooste ontmoet het.

Khana sê voordat iemand as ’n verdagte ondersoek word, moet iemand onder eed ’n verklaring aflê. Hy kan daarom nog nie met Jooste praat nie.

Hy sê dit is anders as die strafregtelike klagte wat Sonn in Augustus ingedien het. Dit is onder eed afgelê.