Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Maatskappye
Remgro beplan vir 5 swaar jare

Remgro se R5 miljard kontant “gaan nie ’n gat in hul sak brand nie”, sê Jannie Durand, uitvoerende hoof.

Dié kontant kom uit die verkoop van Remgro se 25,75%-belang in Unilever Suid-Afrika, wat ná die einde van sy afgelope boekjaar goedgekeur is.

Jannie Durand, uitvoerende hoof van die Stellenbosse beleggingsgroep Remgro.

“In hierdie moeilike ekonomie is dit goed om ’n bietjie van ’n buffer te hê om jou beleggings te ondersteun,” sê Durand.

Remgro het Woensdagaand sy resultate vir die boekjaar tot einde Junie bekend gemaak.

Durand het Donderdag gesê Remgro meen die ekonomie gaan oor die volgende vyf jaar met ’n maksimum van net 1,7% per jaar groei, “tensy drastiese strukturele veranderinge plaasvind”.

Terselfdertyd is die bevolkingsgroei 2,2%, wat lei tot ’n “demografiese resessie” soos ’n ekonoom onlangs gesê het.

Durand sê ’n prioriteitslys is nodig om die nodige strukturele veranderinge aan te bring.

Dit is eenvoudige goed wat vinnig gedoen kan word, sodat mense net kan gaan werk en nie opgehou word deur taxi’s en treine wat nie werk en betyds is nie.
Durand

“Ongelukkig is die verkiesing nog ver weg en dit plaas die regering in ’n moeilike posisie. Maar, soos pres. Cyril Ramaphosa al gesê het, die groot goed wat aandag moet kry, is veiligheid en sekerheid. Ons moet sekerheid kry oor beleid soos die Mynbouhandves en oor grondonteiening.
“Dan moet ons begin bestee aan produktiewe infrastruktuurbates wat tot die produktiwiteit en doeltreffendheid van die land bydra. Dit sluit in om netwerke te verbeter en dit veilig te maak, soos paaie en openbare vervoer. Dit is eenvoudige goed wat vinnig gedoen kan word, sodat mense net kan gaan werk en nie opgehou word deur taxi’s en treine wat nie werk en betyds is nie.”

Hy sê buitelandse beleggers vra Remgro gereeld oor die grondonteieningskwessie en watter uitwerking dit op die onderneming gaan hê.

Op die vraag of hy bekommerd is oor grondonteiening sonder vergoeding, antwoord hy: “Ek is ten minste versigtig optimisties dat die regering dit nie op ’n onverantwoordelike grondslag sal doen nie. Maar enige onsekerheid bekommer ’n mens.”

Remgro hou belange in onder meer RCL Foods, Distell, Mediclinic, RMH en FirstRand. “Die groot voordeel vir Remgro is dat ons defensiewe bates met goeie kontantvloei het. Ons bates sal (hierdie moeilike tyd) weerstaan, hoewel dit gaan sukkel.”

Ondernemings soos RCL, Distell en FirstRand sal moet groei deur markaandeel te vergroot omdat die ekonomie nie groei nie. “Ons sal moet groei deur beter as die mededinging te wees.”

Beleggersvertroue in Suid-Afrikaanse maatskappye is die afgelope tyd geknou weens talle skandale onder genoteerde maatskappye. Dit het die JSE aangespoor om sy noteringsvereistes op te skerp.

“Ons het nie ’n beswaar teen wysigings aan noteringsvereistes nie. Ons voldoen nog altyd aan alles, maar dit maak nie saak hoeveel jy reguleer nie, as iemand ’n skelm is, is hy ’n skelm.”

Beleggingsmaatskappye soos Remgro verkies dat beleggers hulle meet aan die groei in hul netto batewaarde. Remgro se netto batewaarde per aandeel het in die boekjaar tot einde Junie met net 2,2% tot R256,97 gestyg.

Die skerp daling in Mediclinic se aandeelprys in die boekjaar het ’n groot bydrae tot dié trae groei gelewer.

Die banke en die ander bates het goed gevaar. RMH se intrinsieke waarde het redelik gespring nadat FirstRand se aandeelprys stewig gestyg het.

Bankaandele het begin styg nadat Cyril Ramaphosa in Desember tot president van die ANC verkies is, maar het weer die afgelope paar maande effens teruggesak.

“Die banke verhandel nie teen baie aggressiewe prysverdiensteveelvoude nie en is nog taamlik konserwatief gegradeer, want hulle was taamlik afgegradeer onder die ou regime.”

Remgro het in die afgelope jaar nog R324 miljoen belê in Community Investment Ventures (CIVH) as deel van ’n regte-uitgifte van die maatskappy. CIVH besit Dark Fibre wat op sy beurt in Vumatel belê.

Gedurende die jaar is Distell geherstruktureer. Hierna hou Remgro nou die meerderheid van die stemregte (56%) en dit het daartoe gelei dat Distell nou in sy jaarstate gekonsolideer is. Remgro het sy ekonomiese belang van 31,8% in Distell behou.

Die transaksie met Unilever is ná die jaareinde afgehandel. Unilever het Remgro se belang in die Suid-Afrikaanse Unilever gekry in ruil vir Unilever se margarien-bedrywighede in Suider-Afrika, waaronder handelsname soos Rama, Stork en Flora, asook kontant.

Meer oor:  Remgro  |  Unilever  |  Firstrand  |  Rcl  |  Distell  |  Mediclinic  |  Cyril Ramaphosa  |  Kontant  |  Ekonomie  |  Jaarresultate
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.