Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Maatskappye
Rupert se Remgro maak gereed vir nóg taai tye

Die regering doen nie genoeg om plaaslike hoender- en suikerrietboere te beskerm nie en maak dan boonop administratiewe foute wat die probleem vererger, sê Jannie Durand, voorsitter van die Stellenbosse beleggingsmaatskappy Remgro, wat ’n belang van 77,5% in RCL Foods besit.

Johann Rupert, voorsitter van Remgro en Richemont. Foto: Petrus Malherbe

Dié twee bedrywe – wat ’n enorme bron van werkskepping is – is blootgestel aan “onbillike mededinging” in die vorm van suiker en hoender wat onder kosprys in Suid-Afrika gestort word vanuit onder meer Brasilië.

Die administratiewe fout waarna Durand verwys, is dat daar vir sewe weke in 2017 geen invoertarief op suiker gehef is nie; en die bedryf beskou die huidige tarief van $680 per ton steeds as te laag.

Durand, wat ook die voorsitter van RCL Foods se direksie is, sê dis veral swart kleinboere wat die swaarste getref word. “Met ondersteuning en finansiering het dié boere die afgelope tien jaar reserwes opgebou, maar binne een jaar is al hul reserwes vernietig.”

Durand sê hy en Miles Dally, uitvoerende hoof van RCL, het al self met die departement van handel en nywerheid oor die vraagstukke gaan praat, en hy kry wel die indruk dat die regering die afgelope jaar begin hoor wat hulle sê, “beslis meer as die vorige nege jaar” (’n verwysing na die termyn van oudpres. Jacob Zuma).

Dinge het egter tot stilstand geknars in aanloop tot die algemene verkiesing op 8 Mei, sê Durand.

Durand het met Netwerk24 gepraat nadat Remgro sy tussentydse resultate vir die ses maande tot einde Desember uitgereik het.

Die beleggingsmaatskappy het volgens byna alle maatstawwe ’n swak halfjaar agter die rug, met wesensverdienste per aandeel 3,3% laer op 772,1c en wesensverdienste 2,8% laer op R4,2 miljard. Dis vergeleke met dieselfde helfte van 2017.

Remgro, waarvan Johann Rupert die voorsitter is, het belange oor ’n breë front, van die bankwese (FirstRand en RMB) en gesondheidsorg (Mediclinic) tot kos en drank (Distell), nywerhede (Total), tegnologie (Seacom, Vumatel) en media (Kagiso Tiso Holding).

In syfers
  • Wesensverdienste daal met 2,8% tot R4,2 miljard
  • Wesensverdienste per aandeel daal met 3,3% tot 752,1c
  • Tussentydse dividend styg met 5,4% tot 215c
  • Intrinsieke netto batewaarde per aandeel daal met 13,4% tot R230,23

Rand Merchant Bank Holdings (RMB), waarvan Remgro 28,2% besit, lewer verreweg die grootste bydrae tot Remgro se wesensverdienste, naamlik R1,3 miljard. Mediclinic, waarvan Remgro 44,6% besit, lewer die tweede grootste bydrae, R633 miljoen.

Die daling in wesensverdienste word grootliks toegeskryf aan ’n kleiner bydrae van Total, Community Investment Ventures (die eienaar van Seacom en Vumatel) en RCL Foods en die uitsluiting van Unilever Suid-Afrika omdat dit verkoop is. Total se kleiner bydrae tot Remgro se wesensverdienste is nie weens ’n daling in inkomste nie, maar die herwaardering van voorraad.

Die styging in inkomste van Mediclinic, Grindrod en FirstRand het deels daarvoor vergoed, tesame met die insluiting van Siqalo Foods, die smere-afdeling van Unilever Suid-Afrika wat Remgro nou ten volle besit.

Banke

Gevra of hy bekommerd is oor die koms van nuwe digitale banke soos TymeBank en Bank Zero, sê Durand: “Nie soseer bekommerd nie. FirstRand weet wat kom en was nog nooit bang vir mededinging nie. Ons sal nie op ons louere rus nie en sal nie die opposisie onderskat nie, maar FNB het nog altyd ’n baie goeie digitale kant gehad. Mededinging is ’n goeie ding.”

Margarien

Die afgelope ses maande het Remgro sy belang in Unilever Suid-Afrika aan die internasionale Unilever-groep verkoop in ruil vir kontant en die volle Unilever-smere-afdeling, bekend as Siqalo Foods. Dié filiaal vervaardig margarien soos Flora en Rama en ander smere wat altesaam 70% van die markaandeel hou.

Durand sê dis nie aldag dat só ’n geleentheid hom voordoen om al die tophandelsmerke in ’n kategorie teen ’n billike prys te bekom nie. Hy is opgewonde oor sinergieë wat Siqalo met RCL sal kan ontsluit vir verspreiding en bemarking.

Beurtkrag

Wat die nasionale kragkrisis betref, sê Durand Remgro se nywerhede is gewoonlik in sones wat nie deur beurtkrag geraak word nie. Sy groot ondernemings – banke soos FNB en die Mediclinic-hospitale – het belê in rugsteunkrag. Beurtkrag raak Remgro egter onregstreeks omdat dit kleiner ondernemings kan knak en werkloosheid kan verhoog – nie die soort ekonomiese klimaat wat goed is vir enige van Remgro se ondernemings nie.

“Beurtkrag het ’n vermenigvuldigende uitwerking op ’n pap ekonomie.”

Durand verwag dat die tweede helfte van Remgro se boekjaar selfs moeiliker gaan wees, maar die maatskappye in die groep is daarop voorbereid.

    Meer oor:  Remgro  |  Johann Rupert  |  Resultate
    MyStem: Het jy meer op die hart?

    Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

    Ons kommentaarbeleid

    Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

    Stemme

    Hallo, jy moet ingeteken wees of registreer om artikels te lees.