Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Maatskappye
SA beleggers deel van Steinhoff-groepseis

Aandeelhouers van die kleinhandelreus Steinhoff, selfs Suid-Afrikaners, word genooi om deel te word van ’n groepseis teen die maatskappy wat die Nederlandse regsfirma BarentsKrans in Amsterdam bring.

Volgens ’n verklaring wat BarentsKrans Vrydag uitgereik het, kwalifiseer beleggers wat aandele in Steinhoff of Steinhoff International Holdings op die JSE of Frankfurtse Aandelebeurs hou om deel te word van die groepseis.

Die aandele moes tussen 26 Junie 2013 en 6 Desember 2017 gekoop gewees het of die aandeelhouer moes op 5 of 6 Desember aandele besit het.

Volgens BarentsKrans het baie van die grootste batebestuurders in Suid-Afrika besluit om eise namens hul kliënte te bring weens die verliese toe Steinhoff se aandeelprys in Desember 2017 ineengestort het.

Dit sluit in Abax Investments, Allan Gray, Bateleur Capital, Coronation, Denker, Electus, Eskom, Investec, Momentum, Old Mutual, Sanlam, Tantalum Capital, Truffle en Visio Capital.

Kliënte van dié instellings verteenwoordig sowat 20% van die aandele in Steinhoff tydens die ineenstorting.

Martijn van Maanen, ’n vennoot by BarentsKrans, sê in die verklaring die besluit deur dié institusionele beleggers om deel te word van BarentsKrans se Steinhoff-hofsaak volg op ’n lang evaluasieproses.

Die saak word gefinansier deur Claims Funding Europe, ’n maatskappy gesetel in Dublin, Ierland, en wat groepsgedinge finansier. Een van die mede-eienaars is die Australiese groepsgeding-regsfirma Maurice Blackburn Lawyers.

Die Nederlandse beleggersgroep VEB het ook onlangs toestemming gekry om van die miljarde wat beleggers verloor het, deur ’n hofgeding te probeer herwin.

Verlede week het Steinhoff probeer om die saak te keer omdat ’n regseis reeds in Duitsland gebring is. Steinhoff het sy primêre notering in 2015 van Johannesburg na Frankfurt verskuif, maar is in Nederland geregistreer.

VEB sê hy verteenwoordig sowat 3% van Steinhoff se aandeelhouers.

Sedert die boekhouskandaal op 5 Desember losgebars het, het Steinhoff die waarde van sy bates al met minstens $14,3 miljard afgeskryf. Nuwe syfers tot minstens 2015 sal uitgereik moet word.

In Duitsland het die regsfirma TILP ’n eis teen Steinhoff gebring namens ’n belegger, en dit gaan dalk ook tot ’n groepseis uitgebrei word. Fin24

Meer oor:  Steinhoff  |  Maatskappye  |  Hofgeding
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.