Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Maatskappye
Só mag oor hospitale se pryse onderhandel word

Onderhandelinge met hospitale deur ’n groep mediese fondse kan vanjaar meer as R200 miljoen se besparing op hospitaalkoste vir Bonitas meebring.

Lee Callakoppen, hoofbeampte van Bonitas.

Dié mediese fonds is een van die grootstes in die land met meer as 700 000 hooflede en afhanklikes. In die boekjaar tot einde Desember het sy lede bykans R18 miljard se premies bygedra.

Bonitas sê in sy jaarverslag hy het die afgelope boekjaar aan die eerste kollektiewe bedingingsproses deelgeneem saam met geslote mediese fondse wat deur Medscheme geadministreer word waarin daar met hospitale oor hul pryse onderhandel is.

Hospitaalkoste is mediese fondse se grootste uitgawe.

Die kollektiewe bedingingsproses volg op die bevinding van die markondersoek na die private gesondheidsektor dat kollektiewe bedinging nie ’n oortreding van die Wet op Mededinging is nie. Die markondersoek se bevinding en aanbevelings is in September 2019 uitgereik.

Die Mededingingskommissie het in September verlede jaar in ’n kennisgewing dié standpunt bevestig nadat talle navrae van belangegroepe ontvang is om duidelikheid oor die bevindinge van die markondersoek te kry.

“Bonitas het innoverende veranderinge aan die tradisionele benadering tot onderhandelinge met hospitale aangebring,” sê Lee Callakoppen, hoofbeampte.

Dit behels ’n strategie van kollektiewe bedinging.

Saam met ander mediese fondse is “die skaal van die gesamentlike ledetal (1,25 miljoen lewens) ingespan om ’n meer volhoubare verhoging in hospitaalpryse vir 2021 te onderhandel”.

“Die benadering was uiters doeltreffend,” sê hy.

Volgens hom kan die “baanbrekersproses van kollektiewe bedinging” vanjaar vir Bonitas ’n besparing van meer as R200 miljoen in hospitaalkoste bewerkstellig.

Gelyke speelveld

Die Mededingingskommissie sê in sy kennisgewing om die speelveld vir administrateurs meer gelyk te maak, kan ’n administrateur kollektief vir ’n verskeidenheid geslote mediese fondse en “op die meeste een enkele oop mediese fonds” onderhandel.

Van die ander kwessies wat opgeklaar is, is of multilaterale prysonderhandelinge tussen finansiers (administrateurs en mediese fondse) en praktisyns mag plaasvind asook hoe die uitslag van die veranderinge gemonitor gaan word.

Onderhandel met dokters

Die markondersoek het getoon daar is ’n “prysvakuum” ten opsigte van mediese praktisyns se pryse sedert die Mededingingskommissie in 2004 kollektiewe onderhandeling met hulle verbied het.

Die markondersoek het aanbeveel dat ’n multilaterale forum deur verteenwoordigers van mediese praktisyns (dokters, spesialiste, patoloë en radioloë), finansiers, die regering en die burgerlike samelewing saamgestel word.

Die forum moet deur ’n nuwe reguleerder oor gesondheidsverskaffers beheer word, wat nog geskep moet word. Intussen dien die Raad op Mediese Skemas (RMS) as die reguleerder.

Die markondersoek het getoon ’n belangrike probleem vir mededinging in die gesondheidstelsel is die gebrek aan betroubare en beskikbare inligting oor die uitkoms van gesondheidsorg.

Die multilaterale onderhandelingsforum moet ’n raamwerk vir onderhandeling ontwikkel om maksimum pryse vir voorgeskrewe minimum voordele (VMV’s) vas te stel en ’n verwysingspryslys vir ander voordele.

Die Mededingingskommissie was met die RMS in verbinding oor die skep van ’n werkkomitee waarin verskillende belangegroepe kan dien om die onderhandelingsraamwerk te ontwikkel.

Monitering

Die markondersoek het getoon ’n belangrike probleem vir mededinging in die gesondheidstelsel is die gebrek aan betroubare en beskikbare inligting oor die uitkoms van gesondheidsorg.

“Sulke inligting is ook belangrik wanneer pasiënte verskaffers wil vergelyk of kies en dit sal die vermoë van gesondheidsfinansiers verbeter om koste en gehalte te vergelyk wanneer daar gekontrakteer word.”

Die markondersoek het aanbeveel dat ’n onafhanklike organisasie sonder winsbejag gestig word met verteenwoordigers van verskeie belangegroepe wat die uitkoms van gesondheidsorg kan monitor en daaroor verslag kan doen.

Die aanbeveling is dat dit in fases plaasvind en begin met vrywillige deelname aan bestaande organisasies soos die Health Quality Assurance (HQA).

Die Mededingingskommissie het verlede jaar gesê hy het begin met gesprekke met die HQA en die RMS sodat daar begin word met monitering en verslagdoening soos aanbeveel is.

In Mei vanjaar is ’n memorandum van verstandhouding met die Mededingingskommissie gesluit, onder meer oor samewerking ten opsigte van die inwerkingstelling van die belangrike aanbevelings van die markondersoek.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.