Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Maatskappye
Steinhoff gaan R15 mjd. uit Pepco-notering kry

Steinhoff gaan met die notering van sy oorsese filiaal Pepco sowat 20% van die aandele teen R15 miljard verkoop.

Die groep het Vrydag aangekondig dat Pepco se aandele in die aanvanklike openbare aanbod teen 8,80 per aandeel verkoop sal word.

steinhoff
’n Pepco-winkel in Krakow, Pole. Foto: Getty Images

Dit bring Pepco se markwaarde met notering op 5 miljard (nagenoeg R85,6 miljard teen Vrydag se wisselkoers) te staan. Met notering is sy markwaarde dus meer as die R66 miljard (3,8 miljard) van Steinhoff se filiaal Pepkor – wat meer tot sy wins bydra.

Pepco word beskryf as ’n snelgroeiende kleinhandelgroep met 3 200 winkels in 16 Europese lande. Sowat 50 miljoen klante koop maandeliks in die winkels.

Sy winkels sluit in Pepco en Dealz in Europa en Poundland in Brittanje.

Louis du Preez, uitvoerende hoof van Steinhoff, het onlangs op die jaarvergadering gesê die hoofvoordeel van die Pepco-notering is dat die opbrengs gebruik kan word om van die groep se skuld te verminder.

Steinhoff steier onder ’n skuldlas van bykans R170 miljard (10 miljard).

LEES OOK: Steinhoff sal likwidasie ‘kragdadig’ teenstaan

Casparus Treurnicht, ’n portefeuljebestuurder van Gryphon Batebestuur, sê die notering en waardasie verander niks aan Steinhoff se finansiële verknorsing nie.

’n Likwidasie-aansoek is vandeesweek in Kaapstad teen Steinhoff ingedien omdat sy laste sy bates oorskry.

“Dit gaan nie enige van Steinhoff se probleme oplos nie. Die groep is steeds kniediep in die moeilikheid.”

Steinhoff het in die aankondiging Vrydag gesê hy gaan 102,2 miljoen aandele in die aanvanklike openbare aanbod verkoop. Teen die aanbodprys kan dit vir hom ’n opbrengs van sowat 900 miljoen (R15,4 miljard in vandag se wisselkoers) meebring.

Die internasionale bank Goldman Sachs International, wat as die stabiliseringsbestuurder van die notering optree, kry die opsie om 12 miljoen aandele op te neem.

Van die openbare aanbod is 23,1 miljoen aandele aan sekere leners van Steinhoff verkoop kragtens die skuldooreenkomste wat met hulle gesluit is.

As al die aandele opgeneem word, gaan Steinhoff 78,9% van Pepco se uitgereikte aandele oorhou. Hy hou tans 98,8%.

Steinhoff se belang van 68% in Pepkor beloop 2,6 miljard en sy belang in Pepco ná notering 3,9 miljard.

Treurnicht sê as Steinhoff in dié stadium sy hele belang in Pepkor en in Pepco verkoop, sal hy steeds nie al sy skuld kan delg nie.

Dit is die enigste van sy ondernemings wat beduidend tot sy wins bydra.

Hy meen Pepco noteer teen ’n baie sterk waardasie.

“ ’n Mens sal maar die aandeelprys moet dophou vorentoe. Baie nuwe ondernemings verhandel sterk met die aanvanklike openbare aanbod, maar die aandeelpryse sak dan later terug.”

Pepco se aandele begin op 26 Mei op die Warskou-aandelebeurs in Pole verhandel.

Meer oor:  Steinhoff  |  Pepco  |  Pole  |  Meubelhandel  |  Bedrog  |  Kleinhandel  |  Sakeredding
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.