Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Maatskappye
Steinhoff se belang in Pepkor kan tot 50% krimp

Die Steinhoff-groep se belang in Pepkor kan net meer as 50% beloop wanneer die partye wat hom dagvaar vir die skade wat hulle weens die jare lange ongerymdhede in sy boeke gely het, sy voorgestelde skikking aanvaar.

  

Steinhoff se hoofkantoor in Stellenbosch.

Steinhoff se belang in Pepkor beloop tans nagenoeg 68% nadat Pepkor einde Junie van sy onuitgereikte aandele aan beleggers verkoop het om geld in te samel. Voor dit het Steinhoff se belang 71% beloop.

Steinhoff het Maandag ’n voorstel gemaak om die sowat 90 regsgedinge teen hom te skik.

Die aanvanklike aanbod wat op die tafel gesit is, beloop 960 miljoen, volgens Louis du Preez, uitvoerende hoof van Steinhoff.

Dit is nagenoeg R18,7 miljard wanneer die wisselkoers van R19,50 teenoor die euro gebruik word om dit om te skakel, soos die maatskappy in die aanbod gebruik. (Die wisselkoers is tans om en by R19,30.)

Die aanbod aan die verskillende partye behels dat die skikkingsbedrag in die helfte kontant en die helfte Pepkor-aandele betaal word.

Die omskakeling van die skikkingsbedrag in Pepkor-aandele word gedoen teen ’n geagte waarde van R15 terwyl sy aandeelprys tans R10 is.

Nagenoeg 585 miljoen aandele of 15,7% gaan oorgedra word. Sien hieronder hoe dit aan die verskillende partye aangebied word.

David Shapiro, aandele-ontleder van Sasfin Sekuriteite, sê aan Fin24 met die skikkingsaanbod skop Steinhoff die pokerspel af en die partye sal moet bepaal of die maatskappy bluf of nie en moontlik sy aanbod kan verhoog.

Die grootste eiser, Christo Wiese, het dit ’n stap in die regte rigting genoem, terwyl minstens twee eisers met wie Netwerk24 gepraat het, die aanbod erg gekritiseer het.

Een van die eisers wat die eerste groepsgeding teen Steinhoff gebring het, het dit egter as positief beskryf vir aandeelhouers wat skade gely het, en het met onmiddellike ingang sy hofsaak onttrek.

Du Preez het gesê daar word oorweeg om ’n hofproses te volg met die skikkingsaanbod in Suid-Afrika en Nederland omdat nie almal dit sal aanvaar nie.

Louis du Preez, toe nog handelshoof van Steinhoff, en Heather Sonn, toe nog voorsitter van die toesighoudende direksie. Du Preez is nou uitvoerende hoof en Sonn het onlangs weens ’n belangebotsing bedank. Foto: Jaco Marais

Hy het Maandag ná die aankondiging in ’n onderhoud as volg op vrae geantwoord:

1. Het hierdie aanbod uit onderhandelinge gespruit?

Dit was ’n proses van 12 maande om hier uit te kom. Dit moet nog aanvaar word. Dit is ons voorstel wat ons glo billik is en in die beste belang van al die belanghebbendes is. Ek vra mense om dit te ondersteun en hul gewig daaragter in te gooi.

2. Het enige party dit al aanvaar?

Daar is positiewe tekens van sommige partye. Maar ons het nog niks formeel nie. Ek weet mense soos Christo ondersteun dit in beginsel, maar hoor self by hom, ek wil nie woorde in sy mond lê nie. Ons het gesprekke gehad met almal. Maar dit is een van die groot uitdagings wat ’n mens het, want die een kyk wat die ander een doen. Die plan is om te kyk of ons binne die volgende klompie weke in ’n posisie kan kom om eenstemmigheid te bereik.

3. Verstaan ek dit reg dat julle kontant en aandele in Pepkor aanbied en dat dit sowat R18,5 miljard in totaal beloop?

Die totale skikkingsbedrag wat aangebied word, beloop in euro sowat 960 miljoen, dan deel ’n mens die helfte in kontant en die helfte in Pepkor-aandele. Om te bepaal hoeveel aandele iemand kry, deel ons die bedrag deur 15, en dit is hoeveel aandele ’n party kry. Dit is behalwe aan die Pepkor-bestuur vir wie die transaksie ’n bietjie anders is.

4. Hoeveel beloop die eise in totaal?

Die huidige waarde van die eise beloop tans R137 miljard (in die verklaring is ook na 7 miljard verwys wat omgeskakel is teen die wisselkoers wat gebruik word), maar ’n mens moet onthou dat daar van die eise is waarvan die kwantiteit nog nie op die tafel gesit is nie.

5. Beloop die aanbod aan almal omtrent 10% van wat hulle eis?

Dit hang af of jou eis teen die Suid-Afrikaanse Steinhoff International (SIHPL) is of teen die Nederlandse Steinhoff International N.V. is. Daar is nie ’n algemene persentasie vir almal nie. Wat die slim mense vir ons sê, is as ’n mens na die tipe skikkings kyk internasionaal, is die norm vir eisers om tussen 5% en 8% te kry. Dit is vir eisers wat hul aandele in die mark gekoop het. Ons is binne daardie band.

6. Wat is die verdere stap, gaan julle nou begin onderhandel en gaan almal om ’n tafel sit?

Ons breek dit op in die kontraktuele eise en dit sal in aparte gesprekke plaasvind, en met die aandeelhouers wat hul aandele in die mark gekoop het wat deur ses stelle prokureurs verteenwoordig word, met wie gepraat sal word.

Ons beoog om in die komende dae ’n vorm op die webtuiste te sit vir individue wat nie deur prokureurs verteenwoordig word nie, vir hulle om dit te steun, sou hulle wou. Ons sal ook vrae wat gereeld gevra word op die webtuiste beantwoord om leiding te gee aan mense wat nie verteenwoordig word nie.

Daar was in Desember 2017 omtrent 90 000 aandeelhouers en dit is hul eise wat aandele in die mark gekoop het.

7. Is daar ’n spertyd wanneer julle dit wil afhandel?

Nog nie formeel nie, dit hang af van hoe die volgende paar weke verloop.

Ons moet ons finansiële skuldeisers se goedkeuring en formele goedkeuring van die Reserwebank kry. En ons gaan in die komende weke ook kyk of ons die eisers vir die aandeelhouers wat hul aandele in die mark gekoop het, in die kraal kan kry.

Sodra ons ’n beter prentjie het oor waar ons staan, sal ons weer na die mark met ’n aangepaste aankondiging kom.

8. So as dit aanvaar word, gaan die eisers ooreenkom om hul hofsake te staak?

Ons dink een van die opsies waarna ons kyk, is om dit deur ’n formele hofproses in Suid-Afrika en Nederland te doen. Ons het nog nie ’n finale besluit daaroor geneem nie. Dit sal ’n voorvereiste wees. Ons wil met almal skik en as jy dit aanvaar, is die litigasie tot ’n einde.

Ons kyk na ’n tipe hofproses want realisties gaan jy nie almal kry om te teken nie. Een van die opsies is ’n art. 155-reëlingskema in Suid-Afrika ingevolge die Maatskappyewet waarvoor jy dan 50% in getalle en 75% in waarde van die eise benodig. As dit daardeur goedgekeur word, is dit bindend vir almal.

9. Wat is die skuld wat oorbly?

Die skuld is omtrent 10 miljard, maar wat wel belangrik is, is dat ons as deel van die skikking al die finansiële skuldeisers vra om enige eise wat hulle mag hê, ook te skik vir 1. So hulle stap weg en kry niks daarvoor nie. Tweedens vra ons dat hulle vir ons ’n termynverlenging van 18 maande gee tot Junie 2023 voordat hul skuld opeisbaar word, en dan nog ’n verdere ses maande.

Die skuld sou einde volgende jaar opeisbaar geword het, maar soos ons bates verkoop het, is hulle geregtig daarop.

Maar dit is belangrik om te verstaan dat hierdie uit die Suid-Afrikaanse bates word gefinansier. Die kontant wat ons wil gebruik om dit te implementeer is kontant op die Suid-Afrikaanse balansstaat en die Pepkor-aandele is ’n Suid-Afrikaanse bate.

10. Hoeveel van Pepkor gaan julle oorhou?

Ná die transaksie, as dit geïmplementeer word, wil ons steeds meer as 50% van Pepkor hou. Dit gaan net oor die 50% wees. Dit sal afhang van hoeveel mense na vore kom om dit te aanvaar.

11. Waarom moet julle goedkeuring van die Reserwebank kry? Is dit omdat van die kontant uit die land moet gaan?

Korrek, dit is omtrent die helfte van die 960 miljoen kontant is. Maar dan moet jy onmiddellik daarvan aftrek wat die Suid-Afrikaanse aandeelhouers en eisers is. Volgens ons somme was meer as 50% van die aandeelhouers in Desember 2017 Suid-Afrikaners. En hoewel van die eise teen Steinhoff N.V. is, glo ons nie die geld sal fisiek die land uitgaan nie, en dat mense wat in Suid-Afrika is, hier betaal sal word. So die presiese bedrag wat landuit gaan, is drasties minder as die helfte van 960 miljoen.

12. Hoekom kry almal Pepkor-aandele teen ’n geagte waarde van R15 terwyl die Pepkor-bestuur wat ’n eis het, dit teen R13 kry?

Almal kry aandele omdat ons meen dit is ’n manier om in die toekoms baie meer waarde te kry omdat ons glo dat daar baie groeipotensiaal in Pepkor se aandeelprys is. En om dít te doen moet jy jou bestuurspan gemotiveer hou. Ons vra ook vir hulle om hul aandele vir drie jaar te hou, terwyl ander dit 180 dae moet hou.

Só lyk skikkingsvoorstelle

So lyk die voorstel aan die verskillende groepe eisers:

  • Gewone aandeelhouers

Die eerste groep word as die aandeelhouers beskryf wat in die mark hul aandele gekoop het en wat meestal in groepsgedinge verteenwoordig word. Die eise teen Steinhoff N.V. en SIHPL gaan vir ’n totale waarde van 266 miljoen geskik word, wat 50% in kontant betaal sal word.

Sowat 173 miljoen Pepkor-aandele (of 4,6% van sy totale uitgereikte aandeelkapitaal) gaan na verwagting aan dié eisers oorgedra word.

Daarbenewens oorweeg Steinhoff dit om die proses te vergemaklik om €30 miljoen vir sekere fooie, koste en werk gedoen in die groepsgedinge, te betaal.

Sowat €15 miljoen sal ook verskaf word vir ’n liggaam in Nederland wat die administrasie en verspreiding van die aandele en kontant sal hanteer.

  • Kontraktuele eise teen Steinhoff in Nederland

Die kontraktuele eise teen Steinhoff N.V. sal teen nagenoeg 104 miljoen geskik word. Die helfte daarvan sal in Pepkor-aandele betaal word. Dit sal na raming 67 miljoen aandele beloop (1,8% van die totale uitgereikte aandele van Pepkor).

  • Kontraktuele eise teen Steinhoff in Suid-Afrika (SIHPL)

Uitgesluit die maatskappye wat aan Christo Wiese behoort, gaan R1,5 miljard (76 miljoen) aan ander eisers betaal word.

Wiese se Thibault en Wiesfam word R7,9 miljard (€406 miljoen) aangebied.

Die eise van die spesialedoelvoertuig Business Venture Investments No. 1499 (RF) (BVI) en die huidige werknemers en bestuur van Pepkor sal 100% in Pepkor-aandele teen ’n geagte prys van R13,50 per aandeel betaal word en hulle moet die aandele vir drie jaar hou.

Na raming sal altesaam 345 miljoen Pepkor-aandele (9,3% van sy totale uitgereikte aandele) aan hierdie hele groep eisers betaal word.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.