Steinhoff se aandeelprys het Dinsdag skerp gestyg ná ’n berig oor die moontlikheid dat sy Europese winkelgroep Pepco oorgeneem gaan word.
Die aandeel het in ’n stadium selfs 52,8% hoër op R1,65 gestaan voordat dit 47,2% hoër op R1,59 gesluit het.
Pepco besit 1 600 winkels in Sentraal- en Oos-Europa, die Britse kettingwinkelgroep Poundland en Dealz, wat sake in Ierland, Pole en Spanje doen.
Pepco, wat 1 300 winkels in onder meer Pole en Roemenië bedryf, word as een van Steinhoff se winsgewendste ondernemings beskryf.
Sky News het Maandag berig die voormalige eienaar van Poundland oorweeg dit om ’n oorname saam met twee private beleggingsgroepe te doen.
Die transaksie wat oorweeg word, waardeer Pepco op nagenoeg R74 miljard (€4,5 miljard).
Advent International, wat Poundland ’n dekade gelede aan Steinhoff verkoop het, werk saam met Hellman & Friedman en Mid Europa Partners, luidens die berig.
Steinhoff het reeds Maandag 20% tot bo R1 gespring nadat hy vir lank onder dié prys geboer het.
Sy aandeelprys van R1,58 is laas in Mei 2019 gesien.
Dis nog ver van die aandeelprys waarteen hy verhandel het einde November 2017, voor die skandaal om sy kop losgebars het dat hy nie sy geouditeerde jaarstate kan uitreik nie oor sy boeke gekook is. – Fin24
