Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Maatskappye
Zeder: PepsiCo-verkryging is ‘opwindend’
MIAMI - MARCH 22: In this photo illustration cans
PepsiCo wil al Pioneer se aandele teen R110 elk koop. Foto: Getty Images

Die voorgenome verkryging van Pioneer Foods deur PepsiCo skep ’n “baie opwindende geleentheid” vir sy grootste aandeelhouer om homself te “herposisioneer”.

Zeder, ’n beleggingsbeheerfirma in die landbousektor wat 28,23% van Pioneer besit, gaan nagenoeg R6,4 miljard in die sak steek indien die transaksie deurgevoer word. PepsiCo wil al Pioneer se aandele teen R110 elk koop; Zeder besit meer as 58 miljoen Pioneer-aandele.

Norman Celliers, uitvoerende hoof van Zeder, sê dit gaan Zeder in die baie goeie posisie plaas dat hy “baie kontant, lae skuld, en beleggings in maatskappye wat lekker groei”, sal hê. Die maatskappy sal kapitaal tot sy beskikking hê om te belê, wat hy as “verskriklik opwindend” beskryf.

Die transaksie in sy geheel, vir al Pioneer se aandele, is nagenoeg R23 miljard werd en sal tot die denotering van Pioneer lei. Dis PepsiCo se grootste verkryging nóg buite die VSA.

Indien alles vlot verloop, sal die transaksie teen Februarie 2020 voltrek word.

Zeder se direksie en bestuur steun die verkryging “ten volle”, sê Celliers.

Die maatskappy wil ’n deel van die geld wat hy kan verdien, gebruik om sy skuld te verminder en om ’n spesiale dividend uit te keer.

Celliers sê die aanbod is onderhewig aan goedkeuring deur sowel Pioneer Foods en Zeder se aandeelhouers, maar gesprekke was tot dusver “baie positief”.

“Ons het reeds onherroeplike ondernemings van steun van die meerderheid van Zeder se aandeelhouers gekry, en is vol vertroue dat die aanbod die vereiste steun sal ontvang. Die voorstel is versigtig oorweeg en ons glo dis ’n goeie transaksie vir alle belanghebbendes.”

Celliers sê die besluit is nie ligtelik geneem nie. “Dis altyd moeilik om ’n strategiese belegging te verkoop. Dis ook nie maklik om die perfekte prys te bepaal nie, maar ons glo die aanbod verteenwoordig ’n goeie premie aan aandeelhouers en is in die belang van alle belanghebbendes.”

Zeder is nou al 13 jaar lank Pioneer se grootste aandeelhouer en het Pioneer help uitbrei tot een van die grootste kosprodusente in die land.

Celliers sê hulle het Pioneer se belange eerste gestel toe hulle oor die verkryging besin het. Dit sal Pioneer se produkte ’n groter voetspoor in die res van Afrika gee.

Die voorstel is versigtig oorweeg en ons glo dis ’n goeie transaksie vir alle belanghebbendes.
Zeder

“Zeder se oorblywende portefeulje sluit minder volwasse maatskappye met opwindende groeitrajekte in en ons sal aanhou fokus daarop om hulle te laat groei en waarde aan aandeelhouers te ontsluit, soos en wanneer dit geskik is.”

Benewens sy belang in Pioneer besit Zeder onder meer 97,4% van die vrugte-uitvoergroep CapeSpan, 41,1% van die landboudienstefirma Kaap Agri, 29,3% van die hoender- en eierprodusent Quantum Foods, en 95,3% van die saadprodusent Zaad.

Celliers sê hulle het breed gekonsulteer oor die transaksie, nie net met aandeelhouers nie, maar met alle belanghebbendes. Tot dusver wat gesprekke met almal wat geraak sal word, baie positief.

In antwoord op die vraag oor of hy nie bekommerd is oor die lot van Suid-Afrikaanse handelsmerke soos Ceres, Marmite en Sasko in die hande van ’n Amerikaanse reus nie, sê Celliers nee.

Hy is ook nie bekommerd oor werkverliese nie.

“Ek het gemoedsrus, want in onderhandelinge het PepsiCo baie duidelike ondernemings gegee. Hul boodskap is dat hulle wil uitbou en uitbrei. Hulle wil juis probeer om Pioneer Foods te laat groei, nie net in Suid-Afrika nie, maar ook in omliggende lande.”

Zeder sal die transaksie volgende week op sy algemene jaarvergadering bespreek, maar die spesiale vergadering waarop aandeelhouers daaroor moet stem, sal waarskynlik in September gehou word. ’n Datum is nog nie daarvoor bekend nie.

Die Mededingingskommissie moet die transaksie goedkeur, asook die Reserwebank en die JSE.

Die Mededingingskommissie het in die verlede belangrike voorwaardes gestel met groot verkrygings, soos toe Walmart vir Massmart gekoop het en toe Anheuser-Busch InBev vir SABMiller gekoop het. Dit het ingesluit beloftes dat niemand vir ’n aantal jaar ná die verkryging hul werk as gevolg daarvan verloor nie, en vir die ontwikkeling van verskaffers, insluitende kleinboere en kleinsakeondernemings.

Meer oor:  Pepsico  |  Zeder  |  Pepsi  |  Pioneer Foods  |  Maatskappye
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.