Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Muntslim
6 uit 100 kan gemaklik aftree

Bitter min mense gaan in die toekoms gemaklik kan aftree, wys ’n nuwe peiling. Riana de Lange kyk na watter planne jy behoort te beraam.

Net sowat ses uit elke 100 mense wat tot ’n pensioenfonds bydra, gaan gemaklik kan aftree (met ’n inkomste gelyk aan 75% van hul laaste salaris), wys die finansiëledienstefirma Alexander Forbes se jaarlikse Member Watch-peiling.

Die gemiddelde lid van die pensioenfondse wat deelgeneem het, het ’n tekort van agt keer sy jaarlikse salaris in die pensioenfonds met aftrede.

Vickie Lange, hoof van beste praktyk by Alexander Forbes, sê Suid-Afrikaners behoort vir 40 jaar 17% van hul inkomste tot ’n pensioenfonds by te dra om te kan aftree met die vervangingskoers van 75%.

Eenvoudig gestel: Jy benodig meer as 12 keer jou jaarlikse pensioengewende salaris om in aftrede 75% van jou laaste salaris te kan vervang. Vir 65-jariges is die gemiddelde werklike bedrag in die fonds egter net 3,7 keer hul jaarlikse salaris, sê Vickie.

Data oor pensioenfondslede wat die laaste twee en ’n half jaar afgetree het, wys ongeveer die helfte van afgetredenes sal net 20% van hul salaris kan vervang met die pensioengeld wat hulle opgebou het. Daarenteen sal net sowat een uit tien van alle afgetredenes 80% of meer van hul laaste salaris met hul pensioengeld kan vervang.

Tydens die Covid-19-pandemie laat talle pensioenfondse boonop sukkelende lede toe om tydelik hul bydraes te verlaag. Volgens Vickie het sowat 20% van aftreefondse (insluitende deelnemende werkgewers in sambreelfondse) wat Alexander Forbes administreer van dié geleentheid gebruik gemaak. Sy sê as mense tydelik laer bydraes betaal, behoort hulle daarvoor te vergoed sodra hul finansiële situasie verbeter.

Die meeste aftreefondse maak voorsiening vir buigsame bydraekoerse, asook vir bykomende vrywillige bydraes.

pensioenfondse

Waarom het mense so min pensioengeld?

Vickie sê in Suid-Afrika is dit omdat mense te min bydra. Die gemiddelde bydrae per lid is 5%, terwyl die werkgewer gemiddeld 9,2% tot die pensioenfonds bydra, blyk uit 2019-syfers.

Suid-Afrikaners is ook nie baie goed daarmee om hul pensioengeld te bewaar wanneer hulle van werk verander nie. Net 8,8% van lede het verlede jaar hul geld in ’n bewaringsfonds geplaas, teenoor 11,5% in 2012.

Los jou pensioengeld uit, al is dit nog min

Een van die algemeenste redes waarom lede nie hul pensioengeld bewaar nie, is omdat hulle reken die bedrag is te klein vir die moeite wat dit verg om dit na ’n bewaringsfonds oor te plaas, blyk uit die Member Watch-peiling.

Sowat 60% van diegene wat kies om niks van hul pensioengeld te bewaar nie, het hoogstens R25 000 as krediet in die fonds gehad. Die res het reeds ’n aansienlike bedrag gespaar.

Belinda Sullivan van Alexander Forbes sê sou dié werknemers dié geld vir nog tien of 20 jaar belê, sal hulle die effek van saamgestelde rente verdien op ’n bedrag van R25 000 plus toekomstige bydraes. Die bedrag moet nie in isolasie gesien word nie.

Belinda sê individue gebruik dikwels die kontant in hul aftreefonds om skuld te delg, huisverbeteringe aan te bring of om vakansie te hou.

As jy die geld wil belê, is daar beter opsies beskikbaar; sonder dat belasting op die enkelbedrag-uitbetaling gehef word, soos om dit oor te dra na ’n goedgekeurde bewaringsfonds, aftree-annuïteit, die nuwe werkgewer se fonds of om ’n volwaardige lid te bly van die pensioenfonds waar jy was.

As jy wel kontant nodig het, kan jy advies inwin oor hoe om ’n gedeelte te onttrek – onderhewig aan belasting – voordat die oorblywende voordeel na ’n ander goedgekeurde fonds of produk oorgedra word.

Sou die individu by ’n nuwe aftreefonds aansluit, kan hy/sy ’n hoër bydraekoers kies (indien beskikbaar) om die aftreegeld ’n hupstoot te gee. Sekere fondse bied ook ’n bykomende gerief vir vrywillige bydraes waar ’n lid meer tot die pensioenfonds kan bydra.

Dié bydraes is belastingaftrekbaar, onderhewig aan sekere wetlike perke, en kom meestal sonder bykomende administrasiekoste, sê Belinda

aftrede

.

Kry raad

Volgens haar kan daar nie genoeg klem gelê word op finansiële advies om vir die lang termyn te beplan nie.

Boonop sal dit individue help om te bepaal of daar enige diskresionêre spaaropsies is wat hulle kan gebruik om hul aftreefondse aan te vul.

Baie mense is skepties om ’n finan­siële adviseur te nader omdat hulle skrikkerig is vir die koste. Volgens Belinda hang die koste wat ’n kliënt betaal, af van hoe ingewikkeld sy behoeftes is, asook van die adviseursdiens en hoe die koste bereken word.

Voer ’n deursigtige en eerlike gesprek oor koste met die adviseur sodat jy verstaan watter dienste vir die geld gelewer word. Die koste kan onderhandel word op grond van die kliënt se siening van die “waarde” wat hy ontvang.

Dit kan ook uitgeskakel word, maar Belinda maan dit is riskant.

Kry advies

Oorweeg advies voordat jy enige groot finansiële besluite neem. Hoewel jy finansiële besluite sal moet neem, beteken dit ook behoorlike begroting en besnoeiings, maar dit moet deeglik deurdink word, sê Vickie Lange, hoof van beste praktyk by Alexander Forbes.

Betaal steeds jou mediesefonds-bydrae en versekeringspremies

Op dié manier kan jy verdere finansiële stres vermy ingeval iets onvoorsiens gebeur. Maak seker jy en jou gesin het ’n mediesefondsplan wat aan jou behoeftes voldoen. Besnoei eerder luukses en skakel vermorsing uit sodat jy die premies kan bybring.

Rek jou skeidingspakket

Omdat persoonlike omstandighede van individu tot individu verskil, kan ’n geakkrediteerde finansiële adviseur baie help om jou uitgawes te beperk en jou geld beter te bestuur. Aftreefondse het ook advies­opsies beskikbaar. As jy jou werk verloor, is jy geregtig op ’n skeidingspakket van een week se salaris vir elke jaar wat jy aaneenlopend by die werkgewer was.

Doen deeglike beplanning sodat jou skeidingspakket sover moontlik strek. Probeer om nie jou aftreegeld te gebruik nie, tensy jy geen ander uitweg het nie.

Maak seker jy weet wat die belastingimplikasies is vir jou skeidingspakkette en aftreegeld sou jy dit uit die fonds onttrek.

Belinda Sullivan van Alexander Forbes sê as jy byvoorbeeld net R10 000 per maand verdien, beteken ’n bydrae van 17% van jou pensioengewende salaris R1 700 per maand.

Soos jy in jou werklewe vorder, sal jy waarskynlik inflasie- en merieteverhogings kry wat beteken die vergoeding van R10 000 per maand word meer en dus sal jou bydrae tot jou aftreefonds ook styg.

“Elke individu moet sy bydrae bereken in verhouding tot sy/haar doelwit.

“Onthou, met salarisverhogings verander jou doelwitte dalk ook. Daarom is dit belangrik om toegang te hê tot finansiële advies, om ’n finansiële plan te hê en dié plan te monitor omdat daar baie veranderlikes is wat jou persoonlike omstandighede oor tyd kan beïnvloed.”

Meer oor:  Beplanning  |  Aftrede  |  Finansies  |  Spaar
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.