Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Aftrede
5 dinge wat jy moet doen in die jaar voor aftrede

Selfs as jy uitsien na die einde van jou werkslewe, kan die idee van aftrede vreesaanjaend wees.

Daar is dikwels ’n instinktiewe vrees om na ’n stadium van die lewe te beweeg waar jy uiteindelik jou kapitaal begin verbruik, asook kommer oor ’n kwynende lewenstyl. Soos die meeste uitdagings in die lewe is voorbereiding die sleutel.

Hier is ’n kontrolelys vir die jaar voor aftrede.

1. Verfyn jou begroting

Jou finansiële situasie sal waarskynlik tydens jou aftrede verander. Daarom is dit belangrik om ’n duidelike en gedefinieerde begroting te hê.

Voor jou aftrede was dit jou taak om ’n spaarpot te bou om die lewenstyl te finansier wat jy tydens jou aftrede wou hê.

Nadat jy afgetree het, sal jy moet werk met wat jy het en jou lewenstyl moet aanpas by wat jy kan bekostig.

Werkverwante uitgawes, soos reis- en kantoorklere, sal verdwyn, maar jou uitgawes kan op ander gebiede styg, soos mediese uitgawes. Deur jou begroting vooraf te verfyn, sal jy ’n beter idee hê van hoe jy jou geld tydens jou aftrede kan bestuur, in plaas daarvan dat geld jou beheer.

’n Paar dinge om oor na te dink:

  • Bereken ’n volhoubare inkomste wat die res van jou lewe sal hou deur ’n toepaslike hulpmiddel vir aftreebeplanning te raadpleeg, soos die 10X-sakrekenaar vir lewende annuïteite of deur met jou finansiële adviseur te praat.
  • Onthou dat jou uitgawes tydens jou aftrede sal verander.
  • Oorweeg dit om enkele veranderinge aan te bring voordat dit op jou afgedwing word, soos om jou luukse wiele in te ruil vir ’n goedkoper voertuig of om af te skaal na ’n kleiner huis.

2. Verstaan jou gesondheidsorgplan

Die werklikheid van veroudering kan vreesaanjaend wees, veral as jy faktore soos mediesefondspremies en stygende gesondheidsorgbehoeftes in ag neem. Onthou: Om oud te word, is ’n voorreg wat baie ontsê word.

Namate die persentasie ouer mense in ons bevolking toeneem, neem die algehele las van siektes toe wat geneig is om bejaardes te tref.

lessenaar
Hoe langer voor aftrede jy jou begroting uitwerk, hoe meer beheer het jy. Besluite wat in nood geneem moet word, kan jou geld kos. Foto: Unsplash

Statistieke Suid-Afrika het verlede jaar getoon dat die persentasie mense van 60 jaar en ouer nou 9,1% is, waar dit in 2002 net 7,6% was.

Die verslag lui: “In onlangse jare het Suid-Afrika verander van ’n land waar sterftes oorheers weens oordraagbare siektes soos tuberkulose en MIV/vigs – wat dikwels op jonger ouderdomme gekonsentreer is – na scenario’s waar die meeste oorsake van dood toe te skryf is aan nie-oordraagbare siektes wat op laat ouderdomme manifesteer, soos beroertes of hartsiektes.”

As jy nie ’n goeie gesondheidsorgplan het nie, kan jou aftrede ’n duur oefening word om mediese rekeninge af te betaal, om nie eens te praat van die potensiaal vir verdere stresverwante siektes nie.

Jy sal finansieel en emosioneel baie beter daaraan toe wees as jy vooraf weet wat jou mediese plan dek.

Hier is ’n paar dinge wat jy moet oorweeg:

  • Gesondheidsorgbehoeftes en -koste neem gewoonlik toe ná 55 jaar, veral as jy of jou maat chroniese siektes het.
  • Die dekking wat jy gedurende jou werkslewe vir mediese koste en/of ongeskiktheid het, kan tot ’n einde kom wanneer jy aftree. Selfs werknemers met ’n uitstekende gesondheidsorgdekking as deel van hul vergoeding moet nagaan of die voordele daarvan tot in hul pensioen voortduur.

3. Besluit tussen ’n lewende annuïteit en ’n gewaarborgde annuïteit

’n Belangrike besluit in jou naderende aftrede is hoe jy die beste inkomste uit jou aftreespaargeld kan trek. Daar is twee hoofprodukkeuses tot jou beskikking:

  • ’n Versekeringsproduk genaamd ’n gewaarborgde annuïteit; en
  • ’n Beleggingsproduk genaamd ’n lewende annuïteit.

Die produkte voldoen aan verskillende behoeftes, dus moet jy besluit watter een die beste vir jou is.

Jy moet ’n aantal faktore uniek aan jou in ag neem, insluitend:

  • Jou gesondheid, ouderdom en lewensverwagting;
  • Hoeveel jy gespaar het;
  • Jou gewenste inkomste;
  • Of jy ’n veilige of buigsame inkomste verkies;
  • Die behoeftes van ’n finansieel afhanklike lewensmaat; en
  • Of jy geld aan erfgename wil oorlaat.

Onthou dat daar wel deesdae produkte is wat vir jou ’n kombinasie van ’n gewaarborgde en lewende annuïteit bied.

4. Dink aan jou boedel

Jy moet jou testament en enige benoemingsvorms op jou polisse gereeld bywerk om jou jongste voornemens en omstandighede te weerspieël.

Die grootste bekommernis vir baie mense is om hul maat finansieel te beveilig voordat hulle enige ander bemakings oorweeg.

Dis egter belangrik om altyd inligting oor al jou afhanklikes en begunstigdes op datum te hou.

5. Dink aan hoe jy jou tyd wil bestee

So aanloklik as wat die vooruitsig is dat jy die verantwoordelikhede van werk kan afwerp, kan die werklikheid van eindelose vrye tyd vinnig oorweldigend voel.

Vir die meeste mense sal ’n gelukkige aftrede ’n mate van dissipline vereis, dikwels in die vorm van roetines wat die dae en weke struktuur gee.

Dit kan handig wees om tyd af te staan om spesifieke take te verrig, soos huiswerk, oefening, sosiale aktiwiteite en intellektuele aktiwiteite.

As jy ’n soort roetine of struktuur in plek het, kan jy ongestruktureerde tyd soos naweke of vakansies meer waardeer.

Benewens daaglikse roetines, kan jy ook begin nadink oor die belangstellings en aktiwiteite wat jou plesier gee. Vra jouself af wat jou vreugde verskaf.

Al wat dan oorbly, is om jou goue jare te geniet!

  • Asavela Gwele behartig kliënteverhoudinge by 10X Investments.
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.