Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Beleggings
Bang vir belê? Dit help as jy dié terme baasraak
Die vier grootste bateklasse is aandee, effekte, kontant en eiendom. Ander beleggings, wat meer geskik is vir spesialiste, sluit in edelmetale, munte, kuns en selfs iets soos veteraanmotors. Foto: iStock

Vaktaal in die beleggingswêreld kan baie intimiderend wees en selfs ’n hindernis vir voornemende nuwe beleggers, sê Sheldon Friedericksen, finansiële hoof van die Suid-Afrikaanse finansiëledienstegroep Fedgroup.

As jy beter vertroud is met van die basiese terminologie, soos hieronder verduidelik, sal jy beter sin maak van die finansiële landskap, jou risiko beter bestuur en finansiële slaggate kan identifiseer.

  • Alpha vs. Beta

Dié terminologie word gebruik om te meet hoe ’n aandeel, fonds of beleggingsportefeulje vaar. Alpha meet hoe ’n belegging gevaar het vergeleke met die mark-indeks of norm/standaard, terwyl Beta meet hoe die beleggingsopbrengs verskil van die mark as geheel.

  • Aktief vs. passief bestuurde fondse

Om beter as die mark te presteer, gebruik aktief bestuurde fondse ’n span van professionele fondsbestuurders wat op hoogte bly van hoe ’n beleggingsportefeulje vaar. Hulle besluit gereeld oor wat om te koop, te hou of te verkoop gegrond op die beleggingsontleding van spesifieke aandele en bedrywe, navorsing en voorspellings om beter as die algehele mark te vaar.

Passiewe bestuur (of indeksering) is die teenoorgestelde en verwys na ’n koop-en-hou-strategie ontwerp om die opbrengs van die algehele mark te weerspieël. Dit ignoreer die dag-tot-dag-fluktuasies in die mark.

  • Appresiasie en depresiasie

Bates soos aandele, effekte, geldeenhede of eiendom, wat na verwagting in die toekoms meer werd sal wees, appresieer, terwyl bates wat depresieer, verwys na bates soos voertuie en rekenaars wat stelselmatig waarde verloor.

  • Effekte vs. aandele

Kortliks is effekte eintlik skuld, terwyl aandele presies verwys na ’n aandeel wat jy in ’n bepaalde maatskappy hou. Effekte word beskou as ’n veiliger belegging as aandele omdat, sou ’n maatskappy ondergaan, aandeelbeleggers die laaste is wat betalings ontvang. Die waarde van aandele word ook geraak deur hoe die maatskappy vaar en ander faktore soos die maatskappywins. (Effekte moenie verwar word met effektetrustfondse nie. Laasgenoemde is wanneer ’n klomp beleggers se geld gebruik word om in verskillende bateklasse te belê, insluitend aandele, effekte, kontant en eiendom.)

  • Diversifikasie

Dit verwys na hoe ’n belegging oor verskillende bateklasse verdeel word met blootstelling aan onder meer aandele, effekte en eiendom. Deur diversifikasie versprei jy jou risiko. Sou jy ’n verlies ly in een bateklas, maar ’n ander presteer goed, neutraliseer dit verliese.

  • Dividende vs. opbrengs

Kontantbetalings aan aandeelhouers, gegrond op die koste van die belegging, huidige markwaarde of sigwaarde, is dividende. Opbrengste is wat jy oor ’n sekere tydperk op jou belegging verdien, en kan rente, dividende en ’n styging in die aandeelprys wees. Opbrengste kan positief of negatief wees.

  • Geldmark vs. kapitaalmark

Die geldmark is ’n korttermyn leenstelsel wat leners toegang gee tot kontant en uitleners die kans bied om meer geld te verdien. Vergeleke met die kapitaalmark is die risiko laer, maar die opbrengs ook laer.

Die kapitaalmark is gerig op langtermynbelegging. Maatskappye reik aandele en effekte uit om kapitaal te kry vir groei- en uitbreidingsgeleenthede en beleggers deel dan in dié groei.

Meer oor:  Kontant  |  Bates  |  Beleggings  |  Genoteerde Eiendom  |  Bateklasse  |  Effekte  |  Aandele
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.