Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Beleggings
Bly konsekwent in jou benadering tot beleggings

Beleggers wat slapelose nagte oor onsekerheid op die wêreldmarkte het, moet die lawaai ignoreer en eerder op die fundamentele faktore bly fokus.

’n Konsekwente beleggingsbenadering dra op die duur vrugte, ongeag markgeraas op kort termyn. Een van die hoekstene van ’n portefeulje se prestasie is juis die wyse waarop die bates op lang termyn toegewys word, sê Dawie Carstens, kleinsake-ontwikkelaar by die batebestuurder Prescient Investment Management.

Dié batebestuurder is een van die deelnemers aan Volksblad, Jenwil BlouSter Finansiële Adviesdienste, Glacier van Sanlam en Radio Rosestad se Welvaartkongres in Bloemfontein op 25 September.

Hy sê ’n multi-bestuurde effektetrustfonds of ’n multibatefonds kan beleggers help om vas te hou aan ’n batetoewysing wat in ooreenstemming met hul risiko-aptyt en beleggingshorison gekies is.

“Daar is baie navorsing gedoen oor die faktore wat die grootste bydrae tot ’n portefeulje se prestasie lewer en daar is oorweldigende bewyse dat batetoewysing die grootste bydraende faktor is.”

Carstens sê daar is baie min voordeel daarin om die markte se beweging vooraf te probeer bepaal (die sogenaamde “tydsberekening” van die mark) of om individuele aandele te kies.

“Sulke pogings lei tot bykomende koste, risiko en laer opbrengste oor tyd.”

In onsekere tye soos dié is ’n sterk beleggingsfilosofie noodsaaklik om gedragsvooroordele, wat beleggers verkeerde besluite kan laat neem, te bestuur.

’n Multi-bestuurde fonds, in sy eenvoudigste vorm, stel verskeie batebestuurders aan om ’n fonds te bestuur.

Die grootste voordeel hiervan is om die risiko te versprei wat aan ’n spesifieke bestuurder of bestuurstyl gekoppel kan word.

Maar ’n mens moet ook onderskei tussen ’n effektetrustfonds wat uit ’n enkele bate bestaan en ’n multibatefonds.

“In ’n fonds met ’n enkele bateklas bestaan die fonds net uit een bateklas, byvoorbeeld eiendom, effekte, aandele of kontant. Die multibestuurder kies ’n aantal onderliggende bestuurders met verskillende style of beleggingsfilosofieë sodat hy kan diversifiseer en ’n meer egalige opbrengsprofiel kry,” verduidelik Carstens.

Só ’n fonds bestaan uit ’n mengsel van aandele, effekte, kontant en eiendom, soos ’n tipiese gebalanseerde fonds.

Die multibestuurder kies spesialiste vir elkeen van die onderliggende boublokke van die fonds, maar is self vir die batetoewysing verantwoordelik.

“Alternatiewelik kan dit ook ’n samevoeging wees van verskillende gebalanseerde fondse waar die multibestuurder die batetoewysing aan die onderliggende fondsbestuurders oorlaat.”

Kommer oor koste

Dawie Carstens

Daar is egter deesdae kommer oor die koste van sulke fondse. In ’n bulmark maak die koste nie soveel saak nie, maar as die mark daal of sywaarts beweeg, vreet koste ’n groter persentasie van jou opbrengs op.

Maak dit sin om in sulke fondse te belê?

Carstens gee toe dat multi-bestuurde fondse ’n ekstra koste inhou.

“Maar onthou dat multibestuurders tipies ’n beter tarief kan onderhandel danksy die grootte van die belegging wat hulle by die batebestuurder plaas.”

Hy sê kliënte trek steeds voordeel uit die gebruik van ’n multi-bestuurde fonds omdat dit hulle help om by hul langtermyndoelwitte te hou en foute te vermy wat potensieel duur kan wees.

“Aangesien batetoewysing ’n belangrike faktor is wat die algehele prestasie van ’n portefeulje beïnvloed, kan passiewe fondse in kombinasie met aktiewe fondse ’n manier wees om die algehele koste te verlaag.”

Hy sê Suid-Afrikaners hou daarvan om aktiewe fondsbestuurders te ondersteun omdat ons hulle as die “wenners” in die bedryf beskou of omdat ons glo in die storie wat hulle verkoop.

“Maar tot 80% van alle aktiewe aandelefondse se bestuurders het in die afgelope dekade swakker as die indeks gevaar, of swakker as aktiewe fondse gepresteer.”

Die probleem is om deurlopend die toppresterende bestuurder of bestuurders te kies. Oor tyd is dit feitlik onmoontlik.

“In die verlede is aktiewe bestuurders saamgevoeg om ’n portefeulje te verkry wat deurlopend standvastig presteer – maar die nadeel is dat ’n mens net ’n gemiddelde prestasie teen ’n hoë tarief kry.”

Wat multi-bestuurders deesdae doen, is om die koste te verlaag deur passiewe fondse saam met minder, maar meer bedrewe, aktiewe bestuurders te gebruik.

“Dit het tot gevolg dat portefeuljes oor tyd beter presteer teen laer koste.”

Carstens sê Prescient fokus op die kernvaardighede wat hy deur passiewe fondse kon skep wat beter as indekse presteer nadat bestuursgelde en die koste van verhandeling afgetrek is.

“Ons Prescient Core Equity-fonds is een van die min fondse wat beter as die indeks gepresteer het teen ’n passiewe fonds se tarief.”

Kom woon die Welvaartkongres gratis by

Op Dinsdag 25 September kom ’n span van die land se voorste fondsbestuurders Bloemfontein toe om lesers se vrae oor die geleenthede en slaggate in die huidige beleggingsklimaat te beantwoord.

Die tema vanjaar is: Is onsekerheid die nuwe norm? Die gasspreker is die politieke ontleder Theo Venter van die Noordwes-Universiteit se sakeskool. Jenwil BlouSter, Volksblad en Glacier se Welvaartkongres word by Summerwood gehou, om 17:00 vir 17:30. Verversings word bedien en ’n kontantkroeg is beskikbaar. Bywoning is gratis, maar dit is noodsaaklik dat plek bespreek word by office@jenwil.co.za of deur 051 447 0463 te skakel.


MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

  • INDEKS
  • GELDEENHEDE
  • KOMMODITEITE
Data word met 15 min. vertraag
  • Gold Mining 1036,35 (-1197)
  • Top 40 50987,15 (58996)
  • All Share 57164,25 (61745)
  • Resource 10 43731,91 (12908)
  • Financial and Industrial 30 76406,35 (116772)

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.