Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Beleggings
Genoteerde eiendom beste bateklas in April
Genoteerde eiendom was die beste bateklas in April, maar oor ’n jaar gemeet was effekte jou beste keuse.

Beleggers met hoë blootstelling aan Suid-Afrikaanse aandele het die afgelope paar maande maar benoud na hul opbrengsstate gekyk, maar hulle kan dalk weer ontspan.

In April het plaaslike aandele ’n stewige maandopbrengs van 5,4% opgelewer, teenoor die maandopbrengs van -4,18% in Maart, -1,97% in Februarie en net 0,1% in Januarie.

Dié syfers verteenwoordig die opbrengs slegs vir een maand, soos gemeet aan die JSE se indeks van alle aandele. Om dit in perspektief te plaas, van Februarie tot Maart het verbruikerspryse met 0,4% gestyg, wat beteken aandele het inflasie gemaklik geklop. (Die inflasiekoers vir Maart tot April is nog nie bekend nie, maar sal na verwagting net onder 1% wees.)

Die selfs groter verligting is dat genoteerde eiendom – nog ’n sogenaamde groeibate waaraan langtermynbeleggers groterige blootstelling wil hê – in April vir die eerste keer in vier maande ’n positiewe maandopbrengs opgelewer het.

Om die waarheid te sê, jou opbrengs op genoteerde eiendom, soos gemeet aan die Suid-Afrikaanse eiendomsindeks (Sapy), was die beste moontlike belegging vir April uit al vier die groot bateklasse, met ’n opbrengs van 7,68%. Dis vergeleke met ’n maandopbrengs van -0,96% in Maart, -9,9% in Februarie en -9,91% in Januarie.

Genoteerde eiendom in die spervuur

Daar is egter steeds vrese oor genoteerde eiendom as bateklas.

Die slagting in die eerste kwartaal in die aandeelprys van genoteerde eiendomsmaatskappye was die gevolg van groot vraagtekens oor Resilient en maatskappye waarin hy belange het, onder meer Nepi Rockcastle, Fortress en Greenbay. Resilient se aandeelprys toon nog geen teken van herstel nie en het sedert begin 2018 byna 55% van sy waarde verloor.

Resilient is onder die vergrootglas weens die beweerde manipulering van sy aandeelprys en van sy inkomste. Shauket Fakie, ’n voormalige ouditeur-generaal, is aangestel om ’n interne ondersoek te doen en het geen bewys van binnehandel gevind nie. Daar is egter steeds voortslepende ondersoeke deur die JSE en die Gedragsowerheid vir die Finansiële Sektor (wat die Raad op Finansiële Dienste in April vervang het).

Onlangs het dit ook aan die lig gekom dat Rebosis, nog ’n eiendomsfirma, dalk die waarde van sy bates oordryf het.

Asof interne probleme nie genoeg is nie, sukkel eiendomsmaatskappye op die oomblik om kantoorruimte te vul.

Volgens die jongste peiling van die Suid-Afrikaanse Vereniging van Eiendomseienaars (Sapoa) staan 11,5% van kantore op die oomblik leeg, vergeleke met 11,2% ’n jaar gelede. Dit maak dit vir maatskappye moeilik om hul huur op te stoot, met ’n gemiddelde styging van net 3,1% in huur.

Dis veral ’n probleem vir A-graadkantore, waar al hoe meer eiendom leegstaan soos wat maatskappye afgradeer na B- of C-graadkantore om koste te bespaar.

Intussen gaan ontwikkelaars egter voort om kantore te bou, met ontwikkelings van 567 000 m² onder konstruksie waarvan net 50,5% vooraf verhuur is.

Naeem Tilly van die eiendomsfondsbestuurder Catalyst verwag dat leegstaansyfers hoog sal bly oor die volgende 12 maande.

Effekte, soos gemeet aan die JSE se indeks van alle effekte, was die enigste groot bateklas wat in April op ’n maandgrondslag veld verloor het, met ’n opbrengs van -0,68%. Dit kom nadat effekte in die eerste drie maande van 2018 die beste bateklas op ’n maandgrondslag was.

Beste bateklasse oor 12 maande gemeet

As die maand-tot-maand-skommelinge egter tersyde gelaat word, was die beste bateklas oor die afgelope 12 maande steeds effekte, wat dié kroon ook in Maart gedra het. Die jaaropbrengs op ’n mandjie plaaslike effekte was in April 13,8%.

Ian Scott van PSG Batebestuur skryf in sy kwartaallikse oorsig hy bly optimisties oor plaaslike effekte, veral staatseffekte met ’n lang looptyd. “Selfs ná die onlangse daling in plaaslike effekte-opbrengskoerse verwag ons aanloklike reële opbrengste gegewe ons konstruktiewe siening oor plaaslike inflasie en verbeterde vlakke van staatsbestuur.”

Aandele het oor die afgelope 12 maande 11,45% opgelewer en kontant 7,47%. Die opbrengs op kontant word gemeet aan die STeFi, ’n geldmarkindeks.

Die JSE se prestasie oor die afgelope 12 maande kan grootliks toegeskryf word aan die styging in Naspers se aandeelprys van 15,45%. Naspers se gewig op die JSE beloop baie na aan 20%.

Die jaaropbrengs op genoteerde eiendom was steeds negatief op -0,45%, maar April se goeie vertoning het die daling aansienlik verklein. In Maart het genoteerde eiendom met -7,09% gedaal en in Februarie met -6,09%. Nog ’n goeie maand in dié bateklas sal straks die negatiewe jaaropbrengs in ’n wins omskep.

Die jaaropbrengste toon dat drie uit die vier groot bateklasse inflasie gemaklik geklop het. Hoewel die jaar-tot-jaar-inflasiekoers vir April nog nie uitgereik is nie, sal dit na verwagting in die omgewing van 4% tot 4,2% wees (dit was in Maart 3,8%, maar in April sal dit die stewige styging in die petrolprys in dié maand weerspieël).

Só lyk April se opbrengskoerse op Suid-Afrikaanse bateklasse:

Maandopbrengs

  • Genoteerde eiendom 7,68%
  • Aandele 5,4%
  • Kontant 0,62%
  • Effekte -0,68%

Jaaropbrengs

  • Effekte 13,8%
  • Aandele 11,45%
  • Kontant 7,47%
  • Genoteerde eiendom -0,45%
Meer oor:  Kontant  |  Genoteerde Eiendom  |  Bateklasse  |  Effekte  |  Geldmark  |  Aandele
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

  • INDEKS
  • GELDEENHEDE
  • KOMMODITEITE
Data word met 15 min. vertraag
  • Gold Mining 1375,9 (-3901)
  • Top 40 48427,67 (13755)
  • All Share 54423,55 (15232)
  • Resource 10 42754,47 (37147)
  • Financial and Industrial 30 72753,67 (6357)

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.