Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Beleggings
Genoteerde eiendom spartel voort

In wat as die uitdagendste ekonomiese toestande in generasies bestempel word, het die Suid-Afrikaanse genoteerde eiendomsektor – eens ’n uitblinker – 2019 weer met teleurstellende opbrengste afgesluit.

Keillen Ndlovu, hoof van Stanlib se eiendomsfondse

Die indeks vir genoteerde eiendom (Sapy) het verlede jaar ’n totale opbrengs (inkomste en kapitaal) van 1,9% gelewer en die indeks van alle eiendom (Alpi) -0,4%.

Hoewel dit ’n verbetering is op die rampspoedige -25% in 2018, bly dit ’n druppel aan die emmer vergeleke met die totale opbrengs van 50% in 2005.

Die Sapy sluit die top-20 mees likiede eiendomsbeleggingstrusts (reits) met ’n primêre notering op die JSE in, terwyl die Alpi ook buitelandse eiendomsreuse soos Intu, EPP en Hammerson inkorporeer.

“Die opbrengste is swakker as wat verwag is en weerspieël die taai ekonomiese toestande wat leegstaansyfers laat klim en huurwaardes laat daal,” sê Keillen Ndlovu, hoof van Stanlib se eiendomsfondse. Dit het tot gevolg gehad dat van die maatskappye hul dividend moes verlaag om kapitaal te beskerm, sê hy.

Die nasionale leegstaansyfer in die kantooreiendomsektor staan tans op 11%, dié van kleinhandeleiendom op 4,3% en van nywerheidseiendom op 4%.

Hy sê die eiendomsektor het verder deurgeloop onder stygende munisipale, nutsdiens- en finansieringskoste, wat winsmarges geknou het, veral vir die eiendomsmaatskappye met swakker portefeuljes en geen blootstelling aan die buiteland nie. Dié stygings het tot gevolg dat eiendomsmaatskappye se bedryfskoste tans op R57,16/m² staan, teenoor die R19,64/m² van 2005.

Ndlovu sê die vertoning van die plaaslike genoteerde eiendomsektor is in teenstelling met die sterk vertoning van internasionale eiendomme wat verlede jaar ’n totale opbrengs van 24% in Amerikaanse dollar en 20% in rand gelewer het.

Blootstelling aan buitelandse markte bly vir tientalle Suid-Afrikaanse eiendomsmaatskappye ’n buffer teen die uitdagende plaaslike toestande. Die sektor het tans 47% blootstelling aan buitelandse markte wat saamgestel is uit 7% in Wes-Europa, 29% in Oos-Europa, 8% in Australië, 2% in die Verenigde Koninkryk en 1% in die res van Afrika.

Ndlovu verwag dat gunstige toestande in van die buitelandse markte dit vanjaar tot meer as 50% kan laat toeneem. Van die maatskappye wat in die buiteland gediversifiseer is, was die afgelope jaar in staat om verder te groei deur kapitaal te verkry vir verkrygings en ontwikkelings. “Aan die plaaslike front beperk lae aandeelpryse die vermoë om kapitaal te verkry.”

Wat die vooruitsigte vir vanjaar betref voorsien hy dat die sektor steeds gaan kleitrap, veral weens die swak sake- en verbruikersvertroue en Eskom se voortgesette beurtkrag, wat ekonomiese groei kniehalter.

Sy bul-scenario vir die 2020-kalenderjaar is ’n totale opbrengs van 11,42%, die beer-scenario 1,20% en die mees waarskynlike scenario, gegrond op Stanlib se aannames, 6,04%. Oor vier jaar is die waarskynlikste scenario ’n geannualiseerde 11,45%.

Meer oor:  Beleggings  |  Genoteerde Eiendom  |  Bateklasse
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.