Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Beleggings
Hoe om nié geld te maak nie

In Mei 2014 het ek in ’n artikel onder die opskrif Pasop vir truspieël-beleggings geskryf dit is hoogs onwaarskynlik dat die opbrengste uit plaaslike aandele in die voorafgaande dekade (dus sedert 2004) herhaal sou word en dat dit beleggers sou baat om hul batetoewysing aan hierdie bateklas te temper.

  

Net vir konteks, sien die meegaande grafiek vir die prestasie van vier van die “beste” algemene aandelefondse oor een, drie, vyf en tien jaar in daardie sta­dium.

k
Andró Griessel

Oor die voorafgaande vyf-jaar-tydperk het die JSE gemiddeld 20,98% per jaar opgelewer terwyl geldmark- en inkomstefondse oor dieselfde tydperk onderskeidelik ’n relatief “patetiese” 5,72% en 7,71% per jaar opgelewer het.

Vir enigiemand wat hierna sou kyk en bloot net sy instink sou volg, sou die versoeking groot gewees het om alle beskikbare geld in daardie stadium in die rigting van Suid-Afrikaanse aandele te kanaliseer.

Hierdie einste prestasie was egter die rede waarom ek en ander skrywers gewaarsku het teen die verwagting dat dit kan voortduur.

Onthou, selfs groot bome wat vinnig groei, groei nie tot by die maan nie.

Wat het beleggers egter in daardie stadium met hul geld gedoen?

Sien hiernaas die ontleding van geldvloei in die tweede kwartaal van 2014:

  • Fondse met hoë aandeleblootstelling kry R11,6 miljard se invloei;
  • Fondse met ’n gematigde aandeleblootstelling kry R2,1 miljard se invloei;
  • Fondse met ’n lae aandeleblootstelling kry R4,5 miljard se invloei; en
  • Kontant- en inkomstefondse kry absoluut geen aftrek nie en beleef in der waarheid ’n netto uitvloei oor hierdie tydperk.
k

    In die daaropvolgende vyf jaar – tot 30 Junie 2019 – behaal hierdie drie breë bateklasse waarna ek hierbo verwys toe die volgende opbrengste:

    • SA aandele = 5,64% per jaar
    • SA geldmark = 6,89% per jaar
    • SA inkomstefondse = 7,18%per jaar

    So wat doen beleggers nou? Jip, jy het reg geraai: Hulle verkoop op groot skaal hul relatief goedkoop Suid-Afrikaanse aandele nadat hulle dit vyf jaar gelede ten duurste gekoop het en parkeer al hul geld in geldmark- en inkomstefondse.

    Sien die meegaande grafika.

    k

    Die tweede kwartaal van 2019 het amper die presiese omgekeerde vloei van geld ervaar as die tweede kwartaal van 2014.

    Beleggings in aandele het wesenlike netto onttrekkings gehad terwyl geld amper uitsluitlik na kontant en inkomstefondse gevloei het.

    Wat vertel hierdie aan ons?

    • Dit is ironies dat beleggers belasting wil weerhou van ’n staat wat dit “uitmors”, maar dan belê hulle R30 miljard in een kwartaal in fondse wat amper 100% belasbare opbrengste lewer van ’n rapsie bo die inflasiekoers.
    • Ten spyte van verskeie “vat-alles-landuit”-pleidooie lyk dit asof beleggers in onseker tye steeds kontant verkies bo enigiets anders. In hierdie spesifieke kwartaal was daar nie wesenlike omskakelings na buitelandse beleggings nie. Dit is sprekend van die groot onsekerheid wat tans by baie mense heers. Onthou egter dat die grootste geleenthede in finansiële markte juis in onsekerheid gebore word.
    • Albei stelle data boesem nie vertroue by my in dat beleggers en/of hul adviseurs leer uit die foute van die verlede nie. Geld vloei steeds na fondse wanneer hulle histories goed gevaar het (met ander woorde wanneer hulle waarskynlik duur is) en uit fondse wanneer hulle histories sleg gevaar het (en dus waarskynlik goedkoop is).

    Lees gerus weer Verlede sê min oor die toekoms van 24 Augustus 2019.

      

    Wat staan ’n belegger te doen?

      

    Bou ’n gediversifiseerde portefeulje wat met verskeie uitkomste (soos ’n sterk rand, ’n swak rand, ’n afgradering, ’n opgradering, ’n tweede Trump-termyn, Brexit, en so meer) kan saamleef. Foto: iStock

    Die volgende vraag wat nou by jou opkom, is sekerlik iets soos: “Nou, mannetjie, as jy so slim is, sê jy vir my waar moet ek belê?”

    Natuurlik sou ek ’n paar mieliepitte verruil vir die spreekwoordelike kristalbal, maar helaas, niemand het een nie.

    In dieselfde asem is daar nie een skoen wat alle voete pas nie, so ’n algemene stellings oor waar om te belê sou nie net onverskillig wees nie, maar ook onvanpas.

    Wat ek wel kan sê, is dit: 

    • As beleggings intuïtief was, sou meer mense sukses daarmee behaal het. Die beste geleenthede doen hulself voor op plekke waar jy dit die minste verwag en gewoonlik in omstandighede van maksimum pessimisme.
    • Wat pessimisme aanbetref, is daar tans oorgenoeg van in Suid-Afrika en die meeste aandele op die JSE weerspieël daardie pessimisme.
    • Belastingtoegewings op sekere produkte (veral as jy op ’n hoë belastingkerf is) bied in sekere gevalle ’n “gratis maaltyd”. Deur dit nie te benut nie, kyk jy ’n gegewe perd in die bek.
    • Begin by die vrugte wat laag hang ten opsigte van waardasies en bou ’n gediversifiseerde portefeulje wat met verskeie uitkomste (soos ’n sterk rand, ’n swak rand, ’n afgradering, ’n opgradering, ’n tweede Trump-termyn, Brexit, en so meer) kan saamleef.

    Ten slotte: Nie ek of enigiemand anders kan regtig in die toekoms sien nie, maar ek sou uiters verbaas wees indien kontant- en inkomstefondse oor die volgende vyf jaar beter as Suid-Afrikaanse aandele op ’n bruto grondslag (wat nog te sê ná belasting) gaan vaar.

    Tog lyk dit asof die algemene belegger (a) óf glo dit gaan wel so wees, óf (b) glo hy/sy gaan die tydsberekening om weer terug in die mark te kom op ’n manier regkry. 

    Wat laasgenoemde strategie aanbetref, is historiese data nie aan jou kant nie.

    • Andró Griessel is ’n gesertifiseerde finansiële beplanner en besturende direkteur van ProVérte Wealth & Risk Management. Kontak hom by info@proverte.co.za. Hy skryf gereeld vir Sake.
    Meer oor:  Andró Griessel  |  Bateklasse  |  Aandele  |  Opbrengs  |  Inkomstefondse  |  Beleggings
    MyStem: Het jy meer op die hart?

    Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

    Ons kommentaarbeleid

    Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

    • INDEKS
    • GELDEENHEDE
    • KOMMODITEITE
    Data word met 15 min. vertraag
    • Gold Mining 2417,42 (6258)
    • Top 40 48865,06 (-69430)
    • All Share 54876,82 (-74598)
    • Resource 10 43434,32 (-38670)
    • Financial and Industrial 30 73805,91 (-119542)

    Sakegesprek

    Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

    Hallo, jy moet ingeteken wees of registreer om artikels te lees.