Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Beleggings
#JouVraag: Moet ek dié aandeel koop?

Het jy ’n vraag oor jou geldsake? Stuur dit gerus aan muntslim@netwerk24.com en ons sal kundiges vra om dit vir jou te beantwoord. Sluit asseblief soveel moontlik inligting in.

   

As jy regstreeks geld in aandele wil belê, moet jy ook tyd en moeite daarin belê. Foto: Pixabay

Vraag:

Lesers vra gereeld of ’n spesifieke maatskappy se aandeel of ’n spesifieke sektor se aandele (soos banke of goudmynmaatskappye) op die oomblik ’n goeie belegging is.

   

Johann Grandia van K2 Capital antwoord:

Regstreekse beleggings in aandele as ’n bateklas is gereeld die oorsaak van baie interessante gesprekke met beleggers en kliënte. Na my mening is een van grootste redes hiervoor die persepsie van beleggers dat aandele ’n maklike en vinnige manier is om hoë groei op jou kapitaal te verkry.

Dit word veroorsaak deur stories van ’n familielid of kennis wat hul kapitaal oornag verdubbel of dalk verdriedubbel het deur in aandele te belê.

Ek verstaan hierdie is nie noodwendig net stories nie, maar dit is meer die uitsondering op die reël as die norm. Hoewel dit goeie geselskap om ’n kampvuur is, moet beleggers bewus wees van die risiko wat ’n regstreekse belegging in aandele inhou.

Daar is basies twee maniere hoe beleggers in aandele kan belê. Die eerste is om aandele te koop wat op die beurs verhandel. Jy kan gebruik maak van die dienste van ’n aandelemakelaar of deur ’n aandeleplatform – verskeie banke en batebestuurders het so ’n funksionaliteit.

Die tweede manier is deur belegging in effektetrustfondse, waar die fondsbestuurder namens jou aandele verhandel. Jy is dus ’n indirekte aandeelhouer.

Die groot fonds-bestuurders het spanne ontleders en portefeulje-bestuurders wie se daaglikse werk behels om maatskappye en aandele te ontleed.
Johann Grandia van K2 Capital

Die punt van die artikel gaan nie wees om lesers te probeer oortuig watter een van die twee metodes die beste is nie, maar liewer om die eienskappe van elk te bespreek sodat jy dan self kan besluit watter metode jy wil volg.

Wanneer jy die beleggingspotensiaal van ’n aandeel ontleed, is daar twee metodes wat jy kan volg: tegniese of fundamentele ontleding.

1. Tegniese ontleding

Tegniese ontleding (wat Frans de Klerk weekliks vir Netwerk24 doen; soek onder “Tegniese ontleding”) behels die evaluasie van ’n aandeel gegrond op tegniese data oor die aandeelprys, met ander woorde die belegger probeer voorspel of die aandeel se prys op of af gaan beweeg gegrond op onlangse prysbewegings.

Dié metode is gewoonlik meer kort termyn van aard, omdat die belegger prysbeweging gebruik om aandele te verhandel.

Frases wat jy in dié konteks sal hoor, is bewegende gemiddelde, weerstandsvlak, dalende wig, kop-en-skouer-formasie en so meer.

2. Fundamentele ontleding

Fundamentele ontleding probeer die intrinsieke waarde van ’n aandeel bepaal gegrond op die finansiële state van die maatskappy, die gehalte van die onderneming, die produkte of dienste en baie ander faktore.

Die doel is om die intrinsieke waarde te vergelyk met die heersende markprys en indien die aandeel onder die intrinsieke waarde verhandel (diskonto), dui die ontleding daarop dat dit ’n goeie belegging behoort te wees.

Jy koop die aandeel vir minder as wat dit werd behoort te wees.

Dié metode is daarop gegrond dat sentiment veroorsaak dat die mark aandele nie optimaal prys nie en dat ’n aandeel se prys oor tyd sal terugbeweeg na die intrinsieke waarde.

Bogenoemde beteken na gelang van die metode wat jy gebruik om aandele te ontleed, kan jy twee verskillende uitkomste vir dieselfde aandeel kry.

Om dus kommentaar te lewer oor die beleggingspotensiaal van spesifieke aandele moet jy eers bepaal watter metode gebruik word en of dit ooreenstem met die beleggingsfilosofie van die aandeelhouer.

Effektetrustfondse

Indien jy in aandele belê deur ’n effektetrustfonds, is die fondsbestuurder verantwoordelik vir die verhandeling van aandele binne die fonds. Die groot fondsbestuurders het spanne ontleders en portefeuljebestuurders wie se daaglikse werk behels om maatskappye en aandele te ontleed. Daarom is my voorstel aan die gemiddelde belegger om liewer dié metode te volg, wat baie eenvoudiger en soms meer koste-effektief kan wees as om regstreeks in aandele te belê.

As belegger hoef jy nie tegniese of fundamentele ontledings toe te pas om te bepaal of sekere aandele beleggingspotensiaal het of nie.

Jy kan ook makliker ’n gediversifiseerde portefeulje opbou pleks van ’n belegging in net een aandeel. Jy het ’n minimum van R20 000 nodig om regstreeks in aandele te belê.

Dis my ondervinding dat, tensy jy aktief aandele op ’n gereelde basis ontleed en die nodige tyd bestee om maatskappye se jaarverslae en finansiële state deeglik deur te lees en verder genoegsame kapitaal het om ’n regstreekse aandeleportefeulje te regverdig, is die effektetrustmetode die mees effektiewe opsie vir die meeste beleggers.

  • Johann Grandia is ’n gesertifiseerde finansiële beplanner van K2 Capital, ’n welvaartbestuursmaatskappy met takke in Bryanston en die Paarl.
  • Onthou dat die antwoord nie finansiële advies verteenwoordig nie – jy word steeds aanbeveel om finansiële advies in te win om ’n omvattende finansiële plan daar te stel gegrond op jou risikoprofiel, beleggingshorison en persoonlike omstandighede en doelwitte.
Meer oor:  Tegniese Ontleding  |  #Jouvraag  |  Aandele
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

  • INDEKS
  • GELDEENHEDE
  • KOMMODITEITE
Data word met 15 min. vertraag
  • Gold Mining 1108,65 (2792)
  • Top 40 45929,03 (12363)
  • All Share 52146,04 (14659)
  • Resource 10 39470,3 (2238)
  • Financial and Industrial 30 69022,22 (28521)

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.