Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Beleggings
Meet jou belegging in dollar, pond, euro

Al die menings, gesprekke en raad oor buitelandse belegging, hoeveel blootstelling daaraan jy in jou portefeulje moet hê en hoe jy meer geld landuit kan neem, laat waarskynlik jou ore tuit. Maarten Ackerman, hoofekonoom en adviserende vennoot by Citadel, beantwoord ’n paar vrae.

Deur jou belegging uit te brei na ander dele van die wêreld, kry jy veel meer geleenthede en diversifikasie-opsies wat waarde tot jou portefeulje sal voeg.

Waarom moet beleggers buitelandse blootstelling in hul portefeulje insluit?

Die eenvoudigste antwoord is vir diversifikasie. As jy net in Suid-Afrika belê, rugsteun jy basies ’n deel van die wêreld wat minder as 0,5% van die wêreldekonomie uitmaak.

Deur jou belegging uit te brei na ander dele van die wêreld, kry jy veel meer geleenthede en diversifikasie­opsies wat waarde tot jou portefeulje sal voeg.

Jy sal byvoorbeeld blootstelling kry aan bedrywe wat nie in Suid-Afrika bestaan nie en jy sal kan belê in lande wie se ekonomieë vinniger ná Covid-19 sal herstel danksy meer beoogde stimulus wat maatskappye se verdienste en winsgewendheid sal aanhelp.

Diversifikasie verseker dus toegang tot breër markte en bedrywe, asook tot meer lande en maatskappye wat beter sal vaar as sou jy net blootstelling aan die plaaslike mark hê.

Daar is ook ’n wisselkoersverband tussen plaaslike en buitelandse bates. Omdat die plaaslike geldeenheid tipies oor tyd waarde verloor, gee dit die wind van agter vir enige geld wat oorsee belê is.

Wat behoort die huidige verdeling tussen plaaslike en buitelandse beleggings te wees?

Dit hang van die kliënt se spesifieke situasie en doelwit af. Waar wil die kliënt aftree, vir die grootste deel van sy of haar lewe woon en in watter geldeenheid wil hy of sy bestee? Hoeveel geld jy nodig het om in Suid-Afrika te leef, speel ook ’n rol omdat dit meer beleggings beteken in bates wat plaaslik gevestig is.

Vanuit ’n waardeperspektief, verkies Citadel tans meer buitelandse as plaaslike blootstelling. Vir ’n tipiese Citadel-kliënt is dit 30% tot 40% in die plaaslike mark en die res in die buiteland. Dit word gewoonlik gedryf deur sekere plaaslike kontantvloeibehoeftes en ook waarom jy sekere plaaslike bates sal hou.

Kliënte wat nie groot kontantvloei­behoeftes het nie, kan 80% tot 100% in buitelandse beleggings hê.

Wat is ’n behoorlike opbrengs op buitelandse beleggings op mediumtermyn?

Maarten Ackerman, hoofekonoom en adviserende vennoot by Citadel.

Ons verwag laer opbrengste vir die volgende dekade vergeleke met die vorige tien jaar, bloot weens die uitdagings in die wêreldekonomie. Tans bied globale kontant en effekte (Amerika uitgesluit) zero tot negatiewe opbrengste en dit is nié waar jy jou geld wil belê nie. Maar selfs in Amerika is die rentekoers byna op nul en die opbrengskoers op effekte sowat 0,6%.

Beleggers moet belê in goeie gehalte internasionale maatskappye wat dinamies is, by ’n veranderende wêreld kan aanpas en moontlik inflasie kan klop.

As jy jou risiko wil verminder, moet jy ook ander alternatiewe oorweeg soos verskansingsfondse, beskermde ekwiteit (wat beteken jy voeg afgeleide instrumente by om wisselvalligheid te bekamp) en selfs goud.

Om perspektief te gee: Teen die huidige opbrengs op ’n kontantdeposito in Amerika sal dit jou sowat 900 jaar neem om jou geld te verdubbel as jy dit in kontant hou. Dit kan sowat 103 jaar neem om te verdubbel sou die geld in effekte belê wees, en sowat 14 jaar as dit in aandele is.

Watter geldeenhede is tans die aantreklikste vir beleggers?

Weer eens, ’n gediversifiseerde valutamandjie omdat geldeenhede by tye baie wisselvallig kan wees. Uiteindelik moet jy jou belegging in ’n bepaalde geldeenheid meet. Dit kan dollar, pond of euro wees, maar waar ons ons nou bevind, meen ons die dollar het goed gedoen die laaste dekade, maar gaan op mediumtermyn stoom verloor. Beleggers sal besef, en ons sien dit reeds gebeur, daar is geen opbrengs om langer dollars te hou nie, want daar is geen sprake van rente nie.

Die euro of pond kan dus hieruit voordeel trek. Die Britse pond is op sy laagste vlak in drie dekades vergeleke met die dollar. Die geldeenheid sal waarskynlik onder druk wees totdat daar ’n oplossing of duidelikheid is oor die pad vorentoe met Brexit.

Kyk dus na ’n goed gediversifiseerde valutamandjie tussen die drie grootste geldeenhede en voeg dan ook geldeenhede van ontluikende markte by.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.