Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Beleggings
Oppas as markte net nie sin maak nie

Baie van ons, ek inkluis, het 2020 begin met die bravade van die bestuurder van ’n Datsun 1400-bakkie. Teen middel Maart het 2020 egter, soos baie van die bakkietjies, op sy dak beland.

Andró Griessel

Draai die horlosie egter aan na 31 Desember, en 2020 se opbrengssyfers lyk soos dié van enige ander doodgewone jaar. Dit maak my nogal senuagtig, maar meer hieroor later.

In die tabel hieronder van die bygewerkte bateklas-opbrengste sedert 1995 (26 jaar), dui die oranje in elke gegewe jaar die bateklas aan wat die swakste gevaar het en die blou die bes presterende bateklas. Alle groeisyfers is reeds in rand omgeskakel.

k

Dit wys:

  • Buitelandse aandele het vir die tweede opeenvolgende jaar die beste gevaar.
  • Suid-Afrikaanse genoteerde eiendom was verreweg die swakste bateklas met ’n daling van 34,5%.
  • Suid-Afrikaanse aandele het 7% gelewer.
  • Buitelandse eiendom het ook negatiewe opbrengste in dollar en rand opgelewer.
  • Suid-Afrikaanse kontant en die VSA-dollar het presies dieselfde opbrengs in rand opgelewer.

  

Lesse vir die langer termyn

Op langer termyn wys die tabel onder meer die volgende:

Plaaslik genoteerde eiendom, in ’n stadium verreweg die bateklas met die beste opbrengs oor alle metingstye, is ná die afgelope drie jaar se treurmare die swakste bateklas oor vyf jaar sowel as tien jaar. Dit behoort ’n tydige herinnering te wees dat bome nie tot in die hemel groei nie en dat die verskynsel dat bates terugkeer na hul langtermyn- gemiddelde opbrengs, ’n werklikheid is.

Daar is bykans geen verskil in die 25 jaar- gemiddelde opbrengste van aandele en eiendom nie, plaaslik of in die buiteland.

Die afgelope tien jaar was daar egter ’n wesenlike verskil in opbrengste.

Die rede waarom dit so is, kan deels gevind word in die vertrekpunt van die wisselkoers tien jaar gelede (rand sterk) sowel as relatiewe waardasies tussen ontluikende markte en ontwikkelde markte (ontwikkelde lande goedkoop).

My ou rympie geld: Wat jy vir ’n bate betaal, speel ’n baie groot rol in die opbrengs wat jy daaruit gaan verdien.

Dollar-kontant was die swakste bateklas oor vyf jaar, 15 jaar, 20 jaar en 25 jaar.

   

Wat lê vir 2021 voor?

So, gaan 2021 maar net business as usual wees in die markte? Ek het geen idee nie, maar ek het genoem dat ek effens senuagtig is oor wat vir ons voorlê.

Die rede hiervoor is dat daar getrou aan 2020 dinge plaasgevind het wat enige rasionele persoon se brein breek. Hier is ’n paar.

Tesla

Elon Musk se maatskappy Tesla word tans op sowat $830 miljard gewaardeer nadat die aandeelprys sedert begin 2020 met meer as 800% gestyg het. Dit maak Tesla op papier meer werd as al die ander motorvervaardigers, soos Toyota, Volkswagen, BMW, Mercedes-Benz ensovoorts, saam.

In 2020 het Tesla sowat 500 000 voertuie verkoop uit die internasionale motorverkope van 62 miljoen – dus minder as 1%.

Terwyl die prys van Tesla-aandele met 800% opgeskiet het, het sy verdienste in 2020 met “slegs” 26% gegroei. Tesla se prys per aandeel is ligjare voor die waarde per aandeel, maar getroue volgelinge glo die maatskappy sal in hierdie waardasie ingroei, en dit boonop teen die spoed van wit lig.

Signal

Lesers is waarskynlik bewus van die herrie oor WhatsApp en jou privaatheid. Elon Musk het op Twitter slegs die woorde “Use Signal” getwiet. Signal is die naam van ’n mededinger van WhatsApp.

Spekulante het onmiddelik op die wa gespring en probeer munt slaan uit die feit dat baie meer mense Signal gaan gebruik ná Musk se twiet en het met mening ingeklim in ’n maatskappy met die naam Signal Advance.

Sy aandeelprys het op een dag met 527% gestyg. Net een probleem . . . die obskure klein maatskappy het niks te make met die Signal waarna Musk verwys het nie.

Bitcoin

’n Jaar gelede het 1 bitcoin sowat $7 000 gekos. Die huidige prys van 1 bitcoin is sowat $35 000, ’n 400%-styging in een jaar. Bitcoin het steeds geen gebruiksaanwending nie, het nie vorm of materie nie en is net ’n inskrywing in ’n digitale register, dit betaal geen dividend nie en het geen waarde behalwe persepsuele waarde nie.

Daar word geraam dat al die rekenaars wat besig is om bit­coin te myn, die ekwivalent van Switserland se krag verbruik.

Skuld

Die wêreld verdrink in skuld. Net in 2020, weens die pandemie en regerings se stappe daarteen, het die verhouding van internasionale skuld tot BBP van 83% toegeneem tot 100%, Die grootste ekonomie – die VSA – se skuld-tot-BBP-verhouding is sowat 130%, die grootste sedert die Tweede Wêreldoorlog.

Vreemde verskynsels

Amper elke tweede werklose persoon, student of huisvrou (veral in die VSA) verhandel deesdae komplekse finansiële instrumente. Die ergste van alles is, baie van hulle blyk baie suksesvol te wees.

Om op te som wat my bekommer: Daar is tans sekere segmente van die finansiële wêreld waar fundamentele waarhede skynbaar uitgedien geraak het en waar ’n aura van selfversekerdheid die lug vul.

Kom ons weer maar eerlik, die ewige pessimis vermag niks en my bekommernis kom nie uit ’n plek van pessimisme nie.

Al wat ek weet, is dat dit ongelooflik goed kan gaan met ’n man in die casino, maar as hy lank genoeg daar bly, loop hy met net sy broek aan sy lyf en sy stert tussen sy bene daar uit.

  • Andró Griessel is ’n gesertifiseerde finansiële beplanner en besturende direkteur van ProVérte Wealth & Risk Management. Kontak hom by info@proverte.co.za. Hy skryf gereeld vir Sake.
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.