Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Beleggings
Rowwe 6 maande vir beleggers
Theo Vorster

Die eerste ses maande van 2020 was ’n ongemaklike en wisselvallige rit vir enige belegger – hetsy of jy spaar of op jou beleggings moet oorleef.

As ’n mens terugkyk, is die JSE se indeks van alle aandele tans net enkele persentasiepunte van die vlak waarop ons 2020 afgeskop het – trouens, die indeks is tans rondom 3% laer as die vlakke waarmee ons 2020 begin het.

Dit was egter ’n erge wipplankrit. Die laagtepunt was rondom die derde week in Maart toe die JSE met meer as 35% laer as die vlakke in Januarie verhandel het, net om met amper 50% in die daaropvolgende drie maande te styg.

Die meegaande grafiek wys die beweging baie duidelik en gee maar ’n indruk van die vlakke van wisselvalligheid en onsekerheid in markte.

Die vraag is wat ’n mens hieruit moet leer, nie wat volgende gaan gebeur nie, aangesien niemand met enige mate van sekerheid kan raai of voorspel nie (kies die woord waarmee jy die gemaklikste is, onthou net die ou gesegde – dié wat nie weet nie, voorspel; dié wat weet, voorspel nie).

Vir my is hier basies drie groot lesse wat in die afgelope drie maande se wisselvalligheid en onsekerheid uitstaan:

  • Suid-Afrika is in ’n staat van inperking geplaas op 27 Maart en ook dieselfde aand finaal op die rommelstatus-ashoop gegooi – die volgende drie maande was van die sterkste groeimaande wat die JSE in dekades beleef het. Dit is onmoontlik om te voorspel wanneer die markte gaan loop, en dit gebeur gewoonlik juis wanneer mense dit nie verwag nie;
  • As ek na die sektore kyk in die grafiese voorstelling – terwyl die nywerheids- (+10%) en hulpbronaandele (+5%) reeds verby die vlakke van die begin van die jaar verhandel, is die finansiële sektor (-25%) en die eiendomsaandele (-42%) steeds nie naby die vlakke van Januarie nie. Die les draai rondom die noodsaaklikheid van gesonde diversifisering sodat die risiko van jou portefeulje oor sektore, aandele en geldeenhede versprei is.
  • Pasop vir emosie, veral vrees en paniek – dit kan veroorsaak dat jy verkoop juis wanneer die mark reeds gedaal het en jy dan die verliese vasmaak en die opswaaie mis.
Beurs

Spekulante volg die dag-tot-dag-pryse van bates soos wat die emosionele toestand van markdeelnemers tussen optimisme en pessimisme swaai, terwyl beleggers fokus op die langtermynwaarde van die onderliggende bates – vandaar Warren Buffett se opmerking dat die “prys wat jy betaal, die waarde is wat jy kry”.

Ek weet nie waarheen die markte volgende gaan beweeg nie, net soos wat ek nie weet wanneer ons die pes gaan afskud nie. Wat ek wel weet, is dat ’n goeie bate ’n goeie bate gaan bly oor ’n 5-, 10- of 20-jaar-periode. Die fokus moenie wees op die daaglikse prysbewegings nie, maar op die gehalte van die onderliggende bates en die metodiek wat gevolg word om die beleggingsportefeulje saam te stel.

  • Theo Vorster is uitvoerende hoof van Galileo Capital.
Meer oor:  Jse  |  Beleggers
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.