Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Beleggings
SA aandele wys hul hakskene

Suid-Afrikaanse aandele het die afgelope jaar in randwaarde ’n baie beter opbrengs opgelewer as buitelandse aandele – en nóg groei lê dalk voor.

Selfs met die insinking verlede jaar sou mense beter gevaar het as hulle in Suid-Afrikaanse effekte en aandele gebly het, eerder as om rond e spring. Foto: Pixabay

“Die vooruitsigte vir plaaslike aandele is steeds goed,” sê Izak Odendaal en Dave Mohr, beleggingstrateë van Old Mutual Wealth Investment, in ’n ontleding.

Die beleggingsopbrengste van gebalanseerde fondse wat aan regulasie 28 van die pensioenfondswet voldoen, was die afgelope paar jaar teleurstellend. Dit was hoofsaaklik omdat Suid-Afrikaanse aandele baie swakker as wêreldaandele gevaar het, want dié regulasies beperk blootstelling aan laasgenoemde.

Die afgelope jaar het dié verhaal egter verander. Danksy die aansienlike versterking van die rand het Suid-Afrikaanse beleggings beter gevaar as oorsese beleggings.

Gemeet in rand het wêreldaandele die afgelope jaar ’n opbrengs van 11% gelewer.

k

Daarenteen het Suid-Afrikaanse aandele 38% gelewer, gemeet aan die JSE se indeks vir alle aandele (Alsi).

Die opbrengs wat die indeks gelewer het wat aandele se markwaarde beperk, die JSE se Capped Swix-indeks, was 41%. (Hoewel dié indeks alle aandele se blootstelling beperk tot 10% van die indeks, is dit in praktyk net Naspers-aandele wat beperk word.)

Odendaal-hulle sê hoewel dié buitengewone opbrengs toon hoe depressief die basis ’n jaar gelede nog was, het die Capped Swix van die begin van die jaar 14% gelewer en sedert die begin van 2020 18% – ’n tydperk wat die ineenstorting van verlede jaar insluit.

“Met ander woorde, beleggers sou beter daaraan toe gewees het om deur die ineenstorting belê te gebly het as om die hele tyd op kontant te sit.”

Die styging in plaaslike aandeelpryse die afgelope jaar verhoog die langtermyn-opbrengssyfers en by implikasie dié van Suid-Afrikaanse gebalanseerde fondse. Die langtermyn- gemiddelde opbrengs van Suid-Afrikaanse aandele is ongeveer 13% per jaar (7% in reële terme, wat aandui wat die opbrengs bo die inflasiekoers was).

Die jaarlikse opbrengste vir die Capped Swix-indeks oor die afgelope drie jaar is verhoog tot 7% (9% vir die Alsi) en 6% oor die afgelope vyf jaar (8% vir die Alsi).

Die Capped Swix het nie ’n geskiedenis vir ’n tienjaartydperk nie, maar die Alsi het 11% gelewer.

Om belê te gebly het gedurende die onsekerheid van die afgelope jaar, was die regte ding om te doen, al was dit ook hoe moeilik.

Hoewel plaaslike aandele die afgelope jaar in dieselfde geldeenheid beter presteer het as wêreldaandele, is hulle oor tydperke van vyf en tien jaar agter. Dit is hoofsaaklik vanweë die tegnologiereuse op die VSA se aandeelmarkte.

As Amerika uitgesluit word, het Suid-Afrikaanse aandele oor die vyfjaartydperk wêreldaandele (gemeet aan die MSCI AC World Ex US-indeks) ingehaal en oor die tienjaartydperk byna. Met ander woorde, plaaslike aandele het min of meer dieselfde gevaar as die res van die wêreld, die VSA uitgesluit.

Odendaal-hulle sê dis onwaarskynlik dat Amerikaanse aandele die uitsonderlike opbrengste van die afgelope dekade gaan herhaal, bloot omdat die aanvangswaardasies nou soveel hoër is.

Volgens hulle was die prysverdiensteverhouding (p/v) gegrond op voorspelde winste van die S&P 500 ’n dekade terug 12; vandag is dit 21. Hoe hoër die syfer, hoe hoër is die waardasie. Hoewel die waardasies van wêreldaandele aan die duurder kant van billike waarde is, bied plaaslike aandele steeds waarde, sê hulle. Die vooruit-p/v is 10, wat laer is as wat dit ’n dekade gelede was.

“Die vooruitsigte vir plaaslike aandele is dus steeds goed,” sê Odendaal en Mohr.

k

Effekte en kontant

Effektemarkte internasionaal en kontant het in die jaar tot einde Mei ongeveer 20% elk verloor as gevolg van die sterker rand.

“Die grootste moontlike fout wat ’n plaaslike belegger dus ’n jaar gelede kon maak, was om paniekerig te raak oor plaaslike vooruitsigte en die geld na die buiteland te neem, na die waargenome veiligheid van ontwikkelde markte se vasteinkomstebeleggings.

“Die rand sal onredelik baie moet verswak om dié verlies te vergoed, en boonop word die geleentheidskoste verloor van om elders belê te wees,” sê hulle.

“Aangesien Suid-Afrikaanse rentekoerse histories baie hoër is as in ontwikkelde markte, is dit beter om tuis op kontant te sit as elders”

Die verswakking van die rand op lang termyn gaan nie die verskil vergoed nie.

In teenstelling daarmee het die plaaslike effektemark ’n ordentlike opbrengs gelewer ten spyte van al die kommer oor die snelgroeiende skuldlas van die regering. Die indeks van alle effekte (Albi) het die afgelope jaar 11% gelewer. Hulle sê dit is interessant dat dit dieselfde was as die opbrengs wat wêreldaandele in rand getoon het.

Die hoofrede is dat die Albi se opbrengskoers ’n jaar gelede 10% was en einde Mei effens laer. Die grootste deel van die opbrengste was dus van rentebetalings eerder as wat kapitaal gegroei het.

Die staat se skuldprobleme het nie verdwyn nie, maar die opbloei in hulpbronpryse beteken dat die staat se finansies ’n klein hupstoot sal kry uit myne se wins.

Met die opbrengskoers wat steeds hoog is vir toekomstige beleggings (meer as dubbel die Reserwebank se inflasieteiken), bly dit ’n aantreklike beleggingsopsie, sê Odendaal-hulle.

Ondanks die opbrengs van 16% sedert die begin van die jaar en 37% die afgelope jaar het die JSE se indeks vir eiendomsaandele nog nie teruggekeer na waar dit voor die pandemie was nie. Dié aandele het reeds voor die pandemie swak opbrengste gelewer.

Kontant nie nou goeie keuse

Wat beteken dit alles vir die opbrengste wat beleggingsfondse lewer? ’n Jaar gelede (einde Mei 2020) was die opbrengs oor ’n jaartydperk van die gemiddelde gebalanseerde fonds vir gewone beleggers -0,2%. Die jaarlikse opbrengs oor ’n vyfjaartydperk was toe 2,9%, volgens Morningstar. Dié syfers is vandag onderskeidelik 20% en 5,2%.

Die opbrengs oor die vyfjaartydperk is nou effens beter as inflasie, maar steeds minder as wat kontant oor dieselfde tydperk per jaar gelewer het, naamlik 6,3%.

“Wat dit toon, is dat kontant vir ’n tydperk van ongeveer vyf jaar beter as ’n gebalanseerde fonds kan vaar, maar oor langer tydperke (10, 16 of 20 jaar) sal dit sukkel om dit te doen.”

Hulle sê met nabetragting was kontant die afgelope vyf jaar ’n aantreklike alternatief vir ’n markgekoppelde belegging omdat die reële korttermynrentekoerse hoog was. Dit is egter nie meer nie en kontant is nie meer ’n volhoubare alternatief nie. Die afgelope jaar was die opbrengs van die geldmark-maatstaf (die Stefi-indeks) slegs 4%, in ooreenstemming met die laer repokoers.

“Die rentekoerse sal waarskynlik nog geruime tyd naby dié vlakke bly en daar is min vooruitsig om die volgende paar jaar ’n reële opbrengs uit kontant te verdien.”

Lesse uit die verhaal

Odendaal-hulle sê die herstel ná die ineenstorting in die mark verlede jaar was baie vinniger as wat die meeste mense gedink het dit sou wees en te vinnig om in en uit die mark te spring.

“Om belê te gebly het gedurende die onsekerheid van die afgelope jaar, was die regte ding om te doen, al was dit ook hoe moeilik.

“Ten spyte van al die onsekerhede van die toekoms, insluitende die vrae oor die hoë waardasie van wêreldaandele, is dit steeds die regte strategie om belê te bly.”

Diversifisering bly belangrik.

“Hoeveel mense het ’n jaar gelede gedink dat Suid-Afrikaanse beleggings beter sou vaar as wêreldaandele?”

Hulle sê dit is waar dat baie nog moet gebeur om Suid-Afrika se sake in orde te kry. “Maar baie van wat in die plaaslike finansiële markte gebeur, word deur wêreldwye faktore beïnvloed. Die markte het verlede jaar ineengestort en daarna begin herstel selfs voordat Suid-Afrika ’n beduidende Covid-19-uitbreking gehad het.

“Suid-Afrika bly ’n klein bootjie in ’n groot see.”

Meer oor:  Markte  |  Beleggings  |  Effektetrustfondse  |  Bateklasse  |  Aandele
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.