Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Beleggings
Só sit SA beleggers die pot heeltemal mis

Die herstel in die mark die afgelope jaar is heeltemal misgeloop deur duisende beleggers in Suid-Afrikaanse effektetrustsfondse, volgens die Vereniging vir Spaar en Beleggings Suid-Afrika (Asisa).

Die jongste statistieke van Asisa toon die meeste geld nóg het in die afgelope jaar tot einde Maart in effektetrustfondse in die land ingestroom, maar die grootste deel daarvan is na beleggingsfondse wat in rentedraende instrumente belê, pleks van aandele.

k

Beleggers het in die jaar tot einde Maart R203,8 miljard meer belê as wat hulle onttrek het.

Asisa sê dié netto invloei is die hoogste nóg wat oor ’n 12 maande-tydperk gemeet is.

Effektetrustfondse word deur die Wet op Kollektiewe Beleggingskemas beheer.

Beleggers het in die eerste kwartaal van 2021 R13,6 miljard meer in effektetrusts belê as wat hulle onttrek het.

Sunette Mulder, ’n senior beleidsadviseur van Asisa, sê die bates onder bestuur in effektetrusts het in die eerste kwartaal ’n nuwe hoogtepunt bereik, naamlik R2 870 miljard teen einde Maart.

Dit volg op die sterk herstel in die plaaslike aandelemark oor die jaar tot einde Maart.

Die onrus oor die pandemie het veroorsaak dat die JSE se indeks van alle aandele (Alsi) op 19 Maart verlede jaar tot 37 963 gedaal het. Einde Maart vanjaar het dié indeks op 66 485 gesluit – ’n styging van 49% oor die loop van ’n jaar.

Herstel misgeloop

Die grootste deel van die netto invloei die afgelope 12 maande het na rentedraende portefeuljes gegaan.

Mulder sê dit beteken die meerderheid van die beleggings het die sterk herstel in die aandelemark misgeloop.

Rentedraende beleggingsfondse belê in skuldbriewe, geldmarkbeleggings en ander rentedraende sekuriteite.

Die fondse wat in instrumente van verskillende termyne belê en dié wat in instrumente met ’n vaste kort termyn belê, het R98,6 miljard se netto invloei in die tydperk gekry.

Rentedraende geldmarkfondse het R53,1 miljard gekry terwyl inkomstefondse wat in ’n verskeidenheid bates belê R28,5 miljard gekry het.

Dit beteken van die totale netto invloei in die bedryf, het dié soort fondse R180,2 miljard gekry.

In teenstelling daarmee het aandelefondse net R1,5 miljard gekry.

Einde Maart was 18% van die bates onder bestuur in die bedryf in aandelefondse, terwyl rentedraende beleggingsfondse 33% van die bates gehou het.

Net minder as die helfte is in multibatefondse gehou wat in alle bateklasse belê, insluitend aandele, effekte, eiendom en geldmarkte.

Die afgelope vyf jaar was daar ’n verskuiwing van aandelefondse en multibatefondse na rentedraende beleggingsfondse. Laasgenoemde het vyf jaar gelede net 24% van bates gehou.

k

Tydsberekening verkeerd

Volgens Mulder toon die geskiedenis dat finansiële markte geneig is om nie net van hul laagtepunte te herstel ná ’n ineenstorting nie, maar gewoonlik ook ’n nuwe hoogtepunt bereik.

Die hoogte- en laagtepunte van die mark kan beperk word met ’n goed gediversifiseerde portefeulje wat op lang termyn gehou word.

Ongelukkig neig beleggers om die fout te herhaal om te koop as dit goed gaan met die markte en in onstuimige markte in paniek te verkoop.

Dít wat meer as ’n dekade terug met die wêreldwye finansiële krisis waargeneem is, stem baie ooreen met wat die afgelope jaar in die markte gebeur het ná die uitbreking van die pandemie.

Die mark het destyds vroeg in 2009 gedurende die finansiële krisis tot sy laagste vlak nóg geval en daarna in die 12 maande wat gevolg het met 44% herstel.

Ook toe het beleggers hul papierverlies ’n werklikheid gemaak toe hulle aandele einde 2008 en vroeg in 2009 verkoop het toe die besef ingesink het dat hulle deel was van een van die verskriklikste insinkings in die geskiedenis.

Daarteenoor vereis ’n suksesvolle beleggingstrategie ’n langtermynverbintenis en die begrip dat dit “tyd in die mark is, in teenstelling met die tydsberekening van die mark”, wat die verskil maak, volgens haar.

“Die enigste manier om beleggingsopbrengste te verhoog, is deur ’n goed gediversifiseerde portefeulje oor verskillende bateklasse saam te stel met behulp van ’n betroubare finansiële adviseur.

Jy kan net die vrugte van jou beleggings pluk as jy op lang termyn daarmee volhou. Jy moet ’n doelbewuste besluit neem dat markwisselvalligheid jou nie gaan ontstel nie. Foto: iStock

“Wisselvalligheid is deel van die lewe as jy in effektetrustportefeuljes belê wat aandele besit, maar die hoogte- en laagtepunte van die mark kan beperk word met ’n goed gediversifiseerde portefeulje wat op lang termyn gehou word.”

Bateklasse se opbrengste

Die inligting oor die prestasie van die verskillende soorte beleggingsportefeuljes toon dat aandele- en multibatefondse met hoë en lae blootstelling aan aandele gemiddeld rentedraende beleggingsfondse oor die een, tien en 20 jaar tot einde Maart 2021 oortref het. Die opbrengs is nadat beleggingskoste afgetrek is.

Rentedraende korttermyn- en geldmarkfondse het gemiddeld beter gepresteer as beleggingsfondse met ’n hoë aandeleblootstelling oor die vyf jaar tot einde Maart.

k
Meer oor:  Asisa  |  Beleggings  |  Effektetrustfondse  |  Bateklasse  |  Aandele  |  Markte
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.