Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Beleggings
Theo Vorster: Bly kalm en dink soos Buffett
Theo Vorster

Die afgelope naweek was die jaarlikse Berkshire Hathaway-jaarvergadering.

Op dié jaarlikse “Woodstock vir kapitaliste” beantwoord die 87-jarige Warren Buffett en sy vennoot van amper 60 jaar, die 94-jarige Charlie Munger, vir ses ure lank allerlei vrae uit die gehoor onder meer oor hul beleggings, beleggingsfilosofie en dan ook ’n paar lewenslesse wat die twee wyshere met die gehoor deel.

Ek was gelukkig genoeg om, saam met sowat 40 000 ander Warren- en Charlie-geesdriftiges, die Berkshire Hathaway-jaarvergadering twee keer in die afgelope vyf jaar te kon bywoon. Ongelukkig moes ek die 2018-jaarvergadering via sosiale media volg, met die een oog op die stryd tussen die Stormers en Bulle en die ander op my Twitter-tydlyn.

In die aanloop tot die samekoms het Buffett ’n paar opmerkings gemaak wat die boublokke van sy beleggingsfilosofie nogal lekker saamvat.

Hy het dit gestel dat ’n boer nie ’n plaas koop omdat hy/sy dink dit gaan volgende jaar reën nie, maar omdat die boer reken die plaas gaan oor tien of 20 jaar goeie opbrengste lewer.

Hy het dié vertrekpunt opgevolg deur oor die verskil tussen ’n belegger en ’n spekulant te praat. “ ’n Spekulant kyk na prysbewegings, terwyl ’n belegger fokus op die onderliggende besighede.”

Die reaksie op die prysbeweginge van die JSE en die uitwerking daarvan op beleggings sedert die ANC- nasionale kongres in Desember het my nogal aan die toepaslikheid van dié beginsel laat dink.

Ná Desember het baie mense gemeen die mark en hul beleggingsportefeuljes moet onmiddellik begin reageer (die scenario “dit gaan volgende jaar reën”) op grond van die verwagting van ’n beter bestuurde ekonomie en gepaardgaande sterker groeivooruitsigte.

Dié beleggers en kommentators was baie teleurgesteld toe die mark en hul portefeuljes nie hoër begin verhandel het soos 2018 sy loop geneem het nie (die scenario van “kyk na die prysbewegings”).

Sedert die ANC-konferensie het die teendeel gebeur.

My ervaring is dat te veel mense vasgevang word in veranderinge in sentiment en dan korttermyn-prysbewegings as grondslag vir langtermyn-besluite gebruik.
Theo Vorster

In die eerste drie maande van 2018 het die JSE se indeks van alle aandele met meer as 7% gedaal (van begin Januarie tot einde Maart). Dit het beleggers (of eerder spekulante, volgens Buffett) erg ontsenu aangesien die goeie politieke nuus nie aan hul markprysverwagtinge voldoen het nie. Wie sou kon spekuleer dat die mark sowaar toe in April alleen met bykans 5% sou styg?

In antwoord op ’n vraag het Munger genoem ’n deel van Berkshire Hathaway se geheim is om in baie gevalle bloot niks te doen nie: “Warren is baie goed daarmee.”

Die opmerking sluit baie goed aan by Buffett se antwoord dat die beste tydperk om ’n goeie bate te hou “vir altyd” is. My ervaring is dat te veel mense vasgevang word in veranderinge in sentiment en dan korttermyn-prysbewegings as grondslag vir langtermynbesluite gebruik.

As jy fokus op pryse, is jy ’n spekulant en as jy op die onderliggende bates fokus, is jy ’n belegger á la Warren Buffett.

Op ’n vraag oor langtermynbeleggings en bateklasse het Buffett weer beklemtoon die grootste deel van jou beleggings moet in produktiewe bates wees. In ’n vorige nuusbrief het hy produktiewe bates omskryf as ’n belang of aandeel in ’n besigheid, kommersiële eiendom of ’n plaas.

Buffett het ook beklemtoon nieproduktiewe bates lewer nie oor lang tydperke vir jou reële opbrengste nie.

As voorbeeld het Buffett veral goud uitgesonder, wat sedert die tye van Christus tot vandag vir jou opbrengste in “breukdele van een persent” gelewer het.

Beleggings in kriptogeldeenhede is ’n belegging in ’n nieproduktiewe bate wat jy koop suiwer omrede jy hoop die skaarsheid daarvan gaan dit in waarde laat toeneem. Hy beskryf ’n belegging in bitcoin as “rotgif kwadraat” wat nog baie sleg gaan eindig.

Op een van my besoeke aan die jaarvergadering is die vraag gestel oor wat sy advies sou wees indien hy nie meer daar is nie en sy vrou se erflating belê moet word. Sy antwoord was dat 95% van die kapitaal in laekoste-indeksfondse belê moet word en die ander 5% in kontant, wat kan dien as ’n noodfonds.

Dit bly gesonde en toepaslike advies wat elke belegger ter harte moet neem.

  • Theo Vorster is die uitvoerende hoof van Galileo Capital en ’n spreker oor beleggings, landbou en politiek-ekonomiese vraagstukke. Dié rubriek is deel van die nuusbrief MuntSlim, wat Woensdae aan intekenare wat dit wil ontvang, gestuur word. Gaan na jou Netwerk24-profiel of klik op die skakel op MuntSlim as jy ook die nuusbrief in jou e-posmandjie wil ontvang.
Meer oor:  Warren Buffett  |  Theo Vorster  |  Beleggings  |  Beleggers  |  Kriptogeld
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.