Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Beleggings
Theo Vorster: Hoe sal rommelstatus my geld raak?

Dié vraag word deurlopend gevra deur bekommerde beleggers, veral diegene wat vir hul maandelikse inkomste van hul beleggings en pensioene afhanklik is.

Theo Vorster

Kom ek probeer die raamwerk skets van wat moontlik kan uitspeel indien Moody’s Investors Service, die laaste van die groot drie graderingsagentskappe wat ons staatseffekte steeds as ’n belegging beskou, ook besluit om Suid-Afrikaanse skuld af te gradeer tot onder beleggingstatus. Ek probeer geensins voorspel dat dit wel gaan gebeur nie, eerder om te probeer postuleer hoe ’n gebalanseerde beleggingsportefeulje moontlik kan reageer.

Die eerste, en waarskynlik ook die moeilikste vraag, is of so ’n afgradering reeds deur die finansiële markte verreken is en of so ’n stap ’n verrassing vir hulle gaan wees. Indien die afgradering ’n verrassing is, kan ’n mens verwag dat markte hewig op so ’n skuif sal reageer, maar indien die afgradering verwag word en amper as ’n logiese volgende stap gesien word, kan ’n mens aanneem dit is in ’n groot mate reeds verdiskonteer en dat die markbewegings redelik beperk gaan wees.

Trouens, elders waar so ’n stap ook verwag is, het die markte eerder matig positief gereageer aangesien dit ’n klomp onsekerheid uit die weg geruim het.

effekte
So vergelyk die reële opbrengs van Suid-Afrikaanse staatseffekte met die van 'n paar ander lande.

Die koers waarteen staatseffekte verhandel, gee gewoonlik ’n baie goeie aanduiding in watter mate nuus reeds verdiskonteer is. As ’n mens Suid-Afrika vergelyk met ander lande in dieselfde bootjie, is ons koerse reeds hoog en verdiskonteer dit reeds baie van die slegte nuus. Teen ’n 10-jaar-opbrengskoers van 8,4% en ’n inflasiekoers van 4,5%, wat vir die belegger ’n reële opbrengskoers van 3,9% gee, kan ’n mens sekerlik argumenteer dat baie slegte nuus reeds verdiskonteer is.

Die wêreldwye ervaring dui daarop dat, hoewel die onmiddellike effek negatief kan wees, die uitwerking ná 12 maande nie noodwendig verder negatiewe gevolge inhou nie. In van die lande waar die afgradering reeds ingeprys was, was die 12-maande-gevolg selfs positief. Om hierdie onmiddellike en 12-maande-effek te probeer voorstel, is egter uiters kompleks en waarskynlik onmoontlik.

bateklasse
Die verdeling van bates in 'n tipiese gebalanseerde beleggingsfonds.

Om die effek op die gemiddelde gebalanseerde beleggingsfonds te probeer bereken, het my kollega Monique Bräsler my gehelp om die vyf grootste gebalanseerde fondse te neem (saam sowat R340 miljard se bates of 60% van die totale geld in gebalanseerde fondse) en hul bateklassamestelling te ontleed:

  • Die grootste blootstelling is die 39%-blootstelling aan Suid-Afrikaanse aandele. As ’n mens aanneem dat ongeveer die helfte hiervan in randverskanste aandele is (Naspers, Richemont en die mynhuise), kan ’n mens reken die negatiewe effek behoort redelik klein te wees aangesien die randverskanste komponent ’n teenwig sal vorm.
  • Die tweede grootste blootstelling, van 24%, is internasionale aandele. ’n Negatiewe afgradering sal geen impak hierop hê nie. Inteendeel, sou die rand verswak, sal die impak positief wees.
  • Die blootstelling van 21% aan plaaslike effekte kan wel negatief reageer, hoewel die vergelykende syfers (soos in die tabel) aandui so ’n afgradering is waarskynlik reeds in ’n groot mate verdiskonteer.
  • Die 6% in Suid-Afrikaanse kontant gaan konstant bly, hoewel die renteopbrengs matig kan styg as die proses nie ordelik verloop nie.
  • Die ander sowat 10% gaan mekaar waarskynlik uitkanselleer, want die helfte daarvan is internasionaal en die ander helfte plaaslik.

My gevoel is dat die netto effek van ’n afgradering deur Moody’s op ’n gebalanseerde beleggingsportefeulje matig behoort te wees. Die regstreekse buitelandse blootstelling van ongeveer 30% met ’n verdere amper 20% onregstreekse blootstelling deur die plaaslike randverskanste aandele in so ’n gebalanseerde portefeulje, behoort dit redelik te pantser teen die effek van ’n afgradering.

  • Theo Vorster is die uitvoerende hoof van Galileo Capital en ’n spreker oor beleggings, landbou en politiek-ekonomiese vraagstukke. Dié rubriek is deel van die nuusbrief Sakegesprek, wat Dinsdae aan intekenare wat dit wil ontvang, gestuur word. Gaan na jou Netwerk24-profiel as jy ook op die nuusbrief wil inteken.
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

  • INDEKS
  • GELDEENHEDE
  • KOMMODITEITE
Data word met 15 min. vertraag
  • Gold Mining 2513,49 (2872)
  • Top 40 48837 (29138)
  • All Share 54638,02 (35723)
  • Resource 10 42784,46 (-20864)
  • Financial and Industrial 30 74012,44 (75945)

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.