Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Beleggings
Veilige goud blink weer oor Korona
Goud is ’n toevlugsoord-belegging in tye van groot onsekerheid soos nou met die uitbreek van die Covid-19-pandemie. Foto: Getty Images/iStock

Wanneer die wêreld in beroering is, skarrel beleggers om goud in die hande te kry, soos wat die sterk lopie in die goudprys reeds die afgelope 18 maande bewys.

Die stewige toename in die goudprys is tekenend daarvan dat daar ’n premie is op goud as ’n bateklas wat waarde stoor, sê Johan Gouws, hoof van adviesdienste by Sasfin Securities.

Beleggers wat in goud in randwaarde belê het (soos deur middel van ’n beursverhandelde fonds), is die afgelope 20 jaar reeds goed beloon.

Van einde Maart 2019 tot einde Maart vanjaar het beleggings in goud met 53% gegroei. Van die vierde kwartaal in 2019 tot aan die einde van die eerste kwartaal in 2020 het dit met 35% geklim; en oor die afgelope 20 jaar tot aan die einde van 2019 met 13,3%, sê Gouws.

Sedert die uitbreking van die Covid-19-pandemie het beleggers wêreldwyd hulle opnuut tot goud gewend omdat die edelmetaal ’n sogenaamde toevlugsoord-belegging is.

Goud as ’n veilige belegging, veral in ’n hoë­risiko-omgewing, soos met onbestendige markte, spruit uit die feit dat die edelmetaal nie gekorreleer is met bateklasse soos aandele wat daal in krisistye nie, sê Herman van Papendorp, hoof van beleggingsnavorsing en bateklastoewysing by Momentum Investments. Goud as ’n bateklas het egter ook beperkinge en die geleentheidskoste om daarin te belê kan hoog wees omdat dit nie soos aandele dividende lewer of rente betaal soos in die geval van staatseffekte nie.

As aandele en eiendom byvoorbeeld goed vertoon, sal die goudprys nie daarmee saam klim nie – trouens, sy waarde kan selfs afneem.

“Juis daarom moet ’n mens klem daarop lê dat goud ’n deel moet wees van ’n gediversifiseerde portefeulje. Dit is ’n goeie beskermer teen risiko, maar dit is ook nie goed om net goud te hê nie,” sê Van Papendorp.

Gouws sê in ’n omgewing waar baie maatskappye nou hul dividende opskort en waar die rente op effekte uiters gering is, is die geleentheidskoste (van goud) skielik nie meer so groot om dividende of rente-inkomste te verbeur nie.

Nog ’n rede waarom mense tans in goud belê, is vanweë die verskeie maatreëls wat sentrale banke wêreldwyd instel om hul lande se ekonomieë aan die gang te hou terwyl daar ’n staat van inperking heers. “As ’n mens gaan kyk na wat die stimulusmaatreëls se uitwerking is op die balansstate van sentrale banke en regerings, dan is die vraag hoe volhoubaar hierdie finansiële bestel is met al die geld wat gedruk word en nie weer terugvloei na die ekonomie of behoorlik gerugsteun word nie. Goud is dan ’n goeie manier om waarde te stoor,” sê Gouws.

Die vraag is wat die goudprys inhou vir die toekoms, veral in ’n omgewing waar goudproduksie – nie net in Suid-Afrika nie, maar ook in ander wêreldlande – gestaak is te midde van die pandemie. Tradisioneel sal die prys van ’n bateklas klim wanneer aanbod daal, maar dis nie so eenvoudig in die huidige klimaat nie, sê Van Papendorp.

“Daar is wel minder goud in omloop en wanneer die aanbod daal, sal dit gewoonlik pryse opdruk. Maar die vraagkant word ook nou (met die inperkings wêreldwyd) negatief beïnvloed. Mense wat in hul huise toegesluit is, sal byvoorbeeld nie nou uitgaan en goud by hul juweliers gaan koop nie.”

Hoewel goud tans verhandel teen sowat $1 600 per ons, is dit nie ’n uitgemaakte saak dat die goudprys sal aanhou klim nie.

Van Papendorp verduidelik dat die dollar-goudprys die laaste paar dekades aangedryf is deur reële rentekoerse, soos inflasiegekoppelde Amerikaanse staatseffekte. Reële rentekoerse het sedert die ekonomiese wêreldkrisis skerp gedaal.

Volgens Van Papendorp het die lopie in die goudprys in November 2018 begin, toe die prys in die omgewing van $1 200 per ons was en reële rentekoerse net bokant 1%. “Reële rentekoerse is tans op -0,3% en goud verhandel tans rondom $1 600 per ons. Maar goud verdiskonteer eintlik maar die omgewing waarin reële rentekoerse negatief is en dit beteken nie daar is noodwendig opwaartse potensiaal nie,” sê Van Papendorp.

Kortom: Beleggers behoort twee keer te dink voordat hulle skarrel om grootskaals in goud te belê, want op $1 600 per ons is die goudprys nie meer werklik goedkoop as ’n bateklas nie, benadruk hy. “Die goudprys is op sy huidige vlak reg gewaardeer.”

Meer oor:  Ekonomie  |  Koronavirus  |  Beleggings  |  Goudprys  |  Covid-19  |  Geldsake
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.