Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Beleggings
Waar het spaarvarkies die vetste geword?

Laat ons nou maar eerlik wees: Die meeste beleggers is ’n bietjie vuisvoos ná die afgelope drie jaar in die finansiële markte. Dis ’n baie lang tyd om geduldig te moet wees as jy die kwartaallikse state trotseer.

  

Andró Griessel

Ek wys hiernaas die opbrengste op die agt hoofgroepe van bateklasse oor die afgelope 24 jaar.

Plaaslik genoteerde eiendom het in 2018 ’n semi-ineenstorting beleef en dié indeks op die JSE het met meer as 25% gedaal.

Dit was verreweg die grootste daling in hierdie bateklas oor die 24 jaar se data. Twee groot rolspelers in hierdie sektor – Resilient en Hyprop – het met onderskeidelik 62% en 29% gedaal.

Buitelandse kontant (Amerikaanse dollar) het in rand ’n opbrengs van sowat 18% gelewer in 2018. Hierdie syfer verander egter vinniger as ’n Suid-Afrikaanse finansminister, want presies wanneer jy dit meet, speel ’n groot rol.

Dit is wel belangrik om in ag te neem dat buitelandse kontant oor die 24 jaar die laagste gemiddelde opbrengs van alle bateklasse gelewer het.

Behalwe as jy dus die vermoë het om geldeenhede se bewegings teenoor mekaar akkuraat te voorspel, is dit na my mening nie ’n sinvolle langtermyntoedeling in ’n plaaslike portefeulje nie omdat die wisselvalligheid in hierdie bateklas soortgelyk aan dié van aandele is terwyl die opbrengs soortgelyk aan dié van plaaslike kontant is.

beleggings

As ons in ag neem dat 2017 nie naastenby so rooskleurig was soos die 21%-opbrengs uit plaaslike aandele (grootliks danksy Naspers) suggereer nie, kan ons verstaan waarom mense nou wysigings aan hul portefeuljes wil aanbring.

Die meeste beleggers het oor minstens die afgelope drie jaar power opbrengste gehad.

Dit is egter nie die eerste of die laaste keer dat dit gebeur nie en dit sal ook nie die eerste of die laaste keer wees dat veranderings wat jy nóú aanbring oor drie jaar met terugskouing waarskynlik na ’n fout gaan lyk nie.

Ondanks die groot dalings oor die afgelope jaar is Suid-Afrikaanse genoteerde eiendom steeds gemaklik voor wat betref die gemiddelde opbrengs oor 20 jaar en 15 jaar, terwyl buitelandse eiendom die beste opbrengs oor tien jaar en vyf jaar gelewer het.

Dit beteken natuurlik nie dat hierdie voorsprong oor tien jaar van nou af nog daar gaan wees nie.

Om iets te koop nét omdat die prys baie gedaal het, is nie ’n sinvolle beleggingstrategie nie. Jy moet jouself vergewis van die waarde sowel as die prys. Suid-Afrikaanse aandele en ­eiendom kon oor die afgelope vyf jaar slegs onderskeidelik 5,8% en 5,7% oplewer.

Onthou weereens dat as jy in duur strukture was en met batebestuurders gewerk het wat nie beter as die indekse kon vaar nie, was jou werklike ervaring nog heelwat slegter.

Wanneer jy so ’n lang tydperk beleef waarin die sogenaamde risiko-bates swakker as kontant vaar, moet jy verwag dat die volgende vyf jaar anders gaan lyk, nie dieselfde nie. Ek het dit verlede jaar ook genoem, maar dit regverdig herhaling.

’n Gebalanseerde portejeulje wat eenvoudig uitgelos word, lewer steeds die beste opbrengste. Foto: iStock

Die strategie om die vorige jaar se wenner te kies om in te belê vir die daaropvolgende jaar is ’n swakker strategie as om ­elke keer jou geld op die verloor-perd van die vorige jaar te sit.

Oor die 24 jaar onder oorsig sou ’n strategie om jaarliks op die vorige jaar se wenperd te wed vir jou ’n gemiddelde opbrengs van 9,82% (net effens beter as geldmark) gelewer het, terwyl ’n strategie om op die verloorperd te wed jou 10,9% per jaar (steeds wesenlik minder as ’n koop-en-hou-strategie) in die sak sou bring.

’n Gebalanseerde portefeulje wat eenvoudig uitgelos word, sou wesenlik beter as enigeen van hierdie ander twee strategieë gevaar het.

Die versoeking om in dié stadium aan jou beleggingspot te roer, of erger nog, die inhoud heeltemal uit te gooi en heel nuwe bestanddele in te gooi, is baie groot.

Ons weet uit ondervinding dat dit normaalweg tot swakker uitkomstes lei vir die belegger, maar dit lyk asof dit nie saakmaak hoeveel artikels daaroor geskryf word nie, mense glo dit eenvoudig nie.

Daar is altyd ’n storie of ’n rede waarom dit hierdie keer anders gaan wees.

aandele

Nou wat sê ek nou eintlik moet jy doen? hoor ek jou hardop dink.

Soos oom Jan onlangs een oggend aan my sê in sy hersieningsafspraak: “ ’n Mens moet darem ook nie te vaag wees nie.”

Gereelde lesers van hierdie rubriek sal weet dat ek dink voorspellings is gevaarlik en het op sy beste slegs vermaaklikheidswaarde, maar vir wat dit werd is, gaan ek my hand waag aan ’n voorspelling oor die rangorde (maar nie die omvang nie) van beleggingsopbrengste vir 2019.

Vir konteks rangeer ek hulle volgens beste tot swakste langtermyn-opbrengs, 2018-opbrengs en my geskatte 2019-opbrengs.

Slaan op eie risiko ag op my siening vir die jaar wat voorlê, want soos ek genoem het, is voorspellings vir die dapperes en die dwase.

Alle voorspoed vir die stukkie van 2019 wat oor is! 

  • Andró Griessel is ’n gesertifiseerde finansiële beplanner en besturende direkteur van ProVérte Wealth & Risk Management. Kontak hom by info@proverte.co.za. Hy skryf gereeld vir Sake.
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.