Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Geldsake
Covid-19 en jou geld: Niksdoen dalk nou beste raad

Jou vrees om geld te verloor is die een sekerheid in die huidige markwisselvalligheid oor die invloed van Covid-19 op beleggings, sê Johann Grandia van Alantra Financial Planning.

Die vrees word vererger deur nuus – of dit nou regte nuus of fopnuus is.

As daar na die syfers gekyk word, is die virus nog nie so erg soos vorige soortgelyke epidemies nie. Die dodetal onder geïnfekteerde mense is tans 3,4% van alle aangemelde gevalle – teenoor die 40%-dodetal van die Ebola-virus in 2014 tot 2016, en die 10% van Ears (SARS) in 2003.

Wat die beleggingsmarkte geraak het was die verskeie waarskuwings van maatskappye dat hul vermoë om sake te doen, erg geraak word, sê Grandia. Dit het aandeelpryse laat val en beleggers laat skarrel na veiliger beleggings, soos effekte op beleggingsgraad.

Grandia verduidelik beleggers kan op twee maniere reageer:

Reageer op vrees

Jy kan op jou vrees vir verliese reageer en die aandele verkoop wat jy dink verder sal val. Dit is ’n moeilike een om reg te kry, want dis moeilik om te voorspel of alle slegte nuus tot slegte aandeleopbrengste sal lei.

Om die risiko uit jou portefeulje te verwyder kan tot permanente verliese lei. Dit is ook baie moeilik om jou tydsberekening reg te kry as jy weer die mark wil betree, veral as die markte deur vrees gedryf word.

Beleggers wag dikwels te lank en loop ’n groot deel van die herstellopie mis. Hulle raak deel van ’n groot afdeling van die aanvanklike verliese, maar kry dit dan nie reg om saam te herstel nie.

Reageer op feite

Die ander benadering is om op feite te reageer. Wees op die uitkyk vir geleenthede om goeie aandele teen winskopies te koop wanneer pryse daal.

Grandia gee toe daar is gevalle waar dit geregverdig is om jou risiko te verlaag, soos met die tegnologieborrel in 1999 en 2000, en die internasionale geldkrisis in 2008 en 2009. In albei gevalle was die aandelemarkte aansienlik opgeblase. Tans is die Amerikaanse markte relatief duur, en dit is volgens Grandia nie ’n verrassing dat die S&P 500- en Nasdaq-indeks onlangs gedaal het nie.

Vra jouself hierdie vrae

Grandia meen beleggers moet hulle die volgende vrae afvra:

  • Is ek in die regte belegging gegewe my risikoprofiel en behoeftes? Verstaan ek die ingeboude risiko’s van aandelemarkte?
  • Verstaan ek die tydskaal van my belegging? Portefeuljes wat hoë opbrengste moet lewer, vereis dikwels tien jaar of langer.
  • Het ek inkomste of kapitaal nodig, en hoe sal ek my spaarplan in gevaar stel as ek nou beleggings onttrek?
  • As ek nuwe geld het om te belê, moet ek wag of inklim? Dit is dikwels ’n wyse stap om beleggings oor ’n tydperk in die mark in te faseer, eerder as om te probeer voorspel wanneer die laagste punt in die mark bereik is voordat jy inspring, sê Grandia.

Hy meen dis dikwels die beste om net niks te doen nie solank die belegger tevrede is dat sy portefeulje gepas is. Wisselvalligheid is nooit aangenaam nie, maar dit herinner jou aan die ingeboude risiko van beleggings.

Diversifisering

Adrian Saville, uitvoerende hoof van Cannon Asset Managers, meen die sukses van strategieë om te koop as pryse val, of te verkoop gegrond op streng verliesperke, is maar wisselvallig.

’n Illustrasie van bloed wat positief vir Covid-19 getoets het. Foto: Reuters

Hy meen diversifisering is ’n beter manier om hierdie soort risiko’s te bestuur. Hy waarsku teen die gebruik waar beleggers in onsekere tye soos tans hoërisikobates soos aandele sal verkoop en na “veilige hawens” met stabiele opbrengste skuif. Maar dis nie altyd so wys as jy ’n langtermynbeleggingshorison het nie.

Saville wys daarop dat ’n gediversifiseerde portefeulje met ’n gemiddelde opbrengs van 5% per jaar beter kan vaar as ’n enkele stabiele bate wat ook teen gemiddeld 5% per jaar presteer. Die geheim is die saamgestelde groei in die hoë-opbrengsbates in die gediversifiseerde portefeulje, wat oor ’n lang genoeg tydperk meer as vergoed vir die swakker opbrengste in die portefeulje, soos kontant of metale. Dit word die diversifiseringspremie genoem, en Saville meen dit is ’n kragtige manier om te sorg dat jou belegging krisisse soos Covid-19 kan oorleef.

Verwag nog wisselvalligheid

Johanna Kyrklund, beleggingshoof van Schroders se multibatebeleggings, sê beleggers kan oor die volgende weke baie wisselvalligheid verwag, maar die markte word ondersteun deur die feit dat daar baie geld is wat op die kantlyn sit en wag om belê te word.

Effekte-opbrengste bly baie laag, wat aandeleopbrengste aanlokliker laat lyk.

Een sektor wat dopgehou moet word is die opkomende markte waar waarde begin opduik in van hul aandele en geldeenhede, sê Kyrklund.

Positief oor aandele

Schroders is oor die algemeen steeds positief oor aandele, met die klem op die Amerikaanse aandelebeurse ondanks die potensiaal van hoër wisselvalligheid oor die komende weke weens die verspreiding van die virus. Die likiditeit van die mark en die lae effekte-opbrengste bied steun vir beter aandelewaardasies.

Oor staatseffekte sê Schroders hulle verkies tans langertermyneffekte soos inflasiegekoppelde effekte weens die groter likiditeit.

Die pryse van kommoditeite soos goud en platinum is steeds onder druk, met geen styging in vraag nie en ’n voortgesette verlangsaming in aanbod.

Voorspellings onmoontlik

Toby Hudson, hoof van Schroders se afdeling vir aandeelbeleggings in Asië buiten Japan, sê dis bykans onmoontlik om die uiteindelike omvang en invloed van die virus te voorspel. Hy meen nie dit hou ’n strukturele verandering in die groeivooruitsigte vir China of ander streekekonomieë in nie, maar eerder ’n kort en skerp sikliese insinking van ’n paar maande lank.


Handel word ontwrig

Keith Wade, Schroders se hoofekonoom, waarsku egter Covid-19 se uitwerking versprei van Asië na die res van die wêreldekonomie namate voorsieningskettings ontwrig word. Hoewel die virus teen die tweede kwartaal vanjaar in bedwang kan wees, kan die uitwerking daarvan op besteding en bedrywighede nog daarna vir ’n tyd lank voortduur omdat mense steeds versigtig is.

Die invloed op die aandelemarkte word reeds gesien in die MSCI-wêreldindeks wat skerp geval het toe die Wêreldgesondheidsorganisasie teen einde Januarie verklaar het dat Covid-19 ’n internasionale noodsituasie is. Die indeks het nog skerper en verder geval toe daar teen einde Februarie al hoe meer gevalle van die siekte buite China aangemeld is, byvoorbeeld in Suid-Korea, Italië en Iran.

Dit het reeds China se verbruik van kommoditeite soos steenkool geraak, en dit het implikasies vir die groot kommoditeitsuitvoerders. Brasilië, Chili, Colombia en Peru het reeds skerp wisselvalligheid in hul aandeel- en valutamarkte ervaar.

Houerskip-rederye het hul vaarte na Chinese hawens afgeskaal en die vragte in die Chinese hawens hoop op. As dit voortduur en vererger sal dit wêreldhandel knou, sê Schroders.

Meer oor:  Ekonomie  |  Koronavirus  |  Ekonomiese Impak  |  Markte  |  Beleggings  |  Covid-19  |  Aandele  |  Geldsake
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.