Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Geldsake
Groepfonds ’n goedkoop opsie om voorsorg te tref

As jy ’n salaris verdien en ’n deel van jou salarispakket is om lid te wees van jou werkgewer se groepfonds, hoop ek jy vind waarde in die volgende paar artikels waarin ek gaan verduidelik presies hoe groepfondse werk.

Die manier hoe voorsorgfondse uitbetaal (by onttrekking of by aftrede) gaan verander, maar slegs ten opsigte van jou nuwe bydraes van Maart 2021 af. Foto: unsplash

Daar is van 1 Maart 2021 belangrike wetlike veranderinge vir lede van voorsorgfondse wat ek in die reeks sal bespreek, asook die belastingimplikasies terwyl jy tot die fonds bydra teenoor wanneer jy aftree, bedank of afgedank word.

Elke groepfonds het ’n stel fondsreëls en dit kan verskil van dié van ander groepfondse. Die trustees van die groepfonds moet die fonds bestuur kragtens hierdie reëls, asook die toepaslike wetgewing wat vir alle groepfondse geld.

Sekere voordele is verpligtend vir lede en ander opsioneel, maar nuwe werknemers moet lid word van die fonds.

’n Lid het gewoonlik toegang tot vyf voordele, of ’n kombinasie daarvan, naamlik doods-, ongeskiktheids-, trauma-/gevreesde-siekte- en begrafnisdekking en/of ’n spaarfonds. Sommige groepfondse het opsies waar jy voordele vir jou gade en/of kinders kan byvoeg.

Die voordele word aangebied in die vorm van òf ’n pensioenfonds òf ’n voorsorgfonds. Sedert 2016 is die belastingvoordele van die fondsbydraes wat jy aan enige van dié soort groepfondse betaal, in ooreenstemming met mekaar gebring.

Die manier hoe voorsorgfondse uitbetaal (by onttrekking of by aftrede) gaan verander, maar slegs ten opsigte van jou nuwe bydraes van Maart 2021 af. Meer daaroor in ’n opvolgende rubriek.

Dit is belangrik om die groepfonds waarvan jy lid is se reëls te verstaan, te weet waarvoor jy gedek is (en waarvoor nie) en om te weet hoe en wanneer om daardie voordele in ag te neem wanneer jy lewensversekering in jou persoonlike naam uitneem, en wanneer nie.

Jy kry gewoonlik een keer ’n jaar ’n staat van jou groepvoordele, maar die meeste lede het enige tyd aanlyn toegang tot die inligting. Gesels met jou finansiële adviseur of kontak jou werkgewer se mensehulpbronafdeling as jy nie seker is watter voordele jy het nie.

Voordele van ’n groepfonds ) Groepvoordele is baie goedkoper is as wat jy daarvoor sou betaal het as jy dit in jou eie naam moes uitneem.) Jy kan lid word van die meeste groepfondse met geen of beperkte mediese toetse (soos ’n negatiewe MIV-toets). Dit sal afhang van hoe die groepfonds saamgestel is en wat die vereistes is van die versekeraar wat die fonds se voordele onderskryf.) By die meeste fondse dra die werkgewer ’n persentasie van jou salaris by tot jou spaarfonds, en jy ’n ander persentasie. By sommige fondse kan jy jou eie persentasie jaarliks verhoog of verlaag, onderhewig aan ’n minimum persentasie.) Die deel van jou bydrae wat na die spaarfonds gaan, verminder jou maandelikse inkomstebelasting.

Nadele van ’n groepfondsLidmaatskap van ’n groepfonds het ook nadele. Ek lys die grootste vier en my raad hoe jy daardie nadeel se impak kan uitskakel of beperk: ) As jy nie meer ’n werknemer is nie, verloor jy jou groepvoordele. As jy byvoorbeeld op 60 jaar aftree, wil jy graag nog doodsdekking in stand hou.

Die oplossing: Aangesien groepvoordele so goedkoop is, raai ek my kliënte aan dat ons die ontleding doen mét en sonder hierdie voordele. Eerstens mét die voordele sodat ons die kliënt se boedelbelasting korrek bereken, maar dan beplan ons verder sonder die groepvoordele.

  • As jy sterf, is enige groepvoordele ’n bonus vir jou familie en kan hulle byvoorbeeld meer skuld delg of ’n tweede eiendom kontant koop vir ’n bykomende maandelikse inkomste. By sommige groepfondse kan jy die voordele omskep in ’n private polis, maar dit is meestal duur, veral vir ouer lede. In ander gevalle is daar mediese vereistes wat kan veroorsaak dat jy nie die voordele kry nie, al kan jy dit bekostig.
  • Die oplossing: As jy doen wat ek by die vorige punt voorstel, is jy nie onder druk om met hierdie dekking in jou eie naam voort te gaan nie. Lede van groepfondse mag die geld in hul spaarfonds onttrek as hulle ophou werk. Daar is meer belasting betaalbaar as jy onder 55 jaar is. Gewoonlik word die geld wat só onttrek word, vermors.
  • Die oplossing: Die beste is om, voordat jy aftree of as jy van werk verwissel, hierdie geld belastingvry oor te plaas na òf jou nuwe werkgewer se groepfonds òf ’n private bewaringsfonds.
Meer oor die skrywer

Charné van der Walt (The Lemon Lady), is ’n finansiële raadgewer en belastingpraktisyn in Stellenbosch. Kontak haar by info@ lemons.co.za met vrae vir opvolgende rubrieke of vir ad hoc-advies.

Die artikel is in leketaal geskryf en bevat nie spesifieke of persoonlike raad nie.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.