Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Geldsake
Spaarmaand: 13 wenke as jy huis, inhoud verseker

Is jou huis en die inhoud van jou huis reg verseker? As dit by huisversekering kom, gaan dit oor meer as ’n paar rand op jou premie spaar – jy moet só verseker wees dat jy ’n dak oor jou kop sal hê as ’n brand of vloed jou huis beskadig. Jou huisinhoud moet ook reg verseker wees sodat jy dit ná ’n huisbraak of skade kan vervang.

Julie is Spaarmaand en dié week takel ons die onderwerp van versekering in verskeie artikels.

LEES OOK:

Spaarmaand: Spaar op versekering, maar oppas

Spaarmaand: Verseker só jou motor vir minder

1. Oppas vir onderversekering

Seker die grootste vloekwoord as dit by die versekering van jou huisinhoud kom, is “onderversekering”. Dis wanneer jy nie vir die volle vervangingswaarde van jou huisinhoud verseker is nie.

geldsake
Verseker jou huis asof jy dit van die fondamente af moet herbou. Foto: Pixabay

Met huisinhoud is dit belangrik dat jy verseker is vir wat dit vandag gaan kos om jou meubels, toestelle, juweliersware en ander inhoud te verseker. Jy verseker dit nié vir die bedrag wat jy daaraan bestee het tien jaar gelede nie. (Dis anders as jou motor, wat vir die boekie- of markwaarde verseker word, dus basies sodat jy ’n gebruikte model soos jou motor sou kon koop met die uitbetaling.)

Dis juis waarom dit so belangrik is om elke jaar jou polis by te werk en seker te maak jy is nog voldoende verseker.

Dís hoe onderversekering jou benadeel:

Jy het jou huisinhoud tien jaar gelede vir R500 000 verseker. Dalk was dit inderdaad voldoende, maar jy het dit nooit bygewerk nie. Daar is ’n huisbraak. Die assessor kom maak somme en bereken dat jou huisinhoud se vervangingswaarde eintlik R1 miljoen was. Jy was dus 50% onderverseker, oftewel jy het net die helfte van jou huisinhoud verseker. Nou eis jy vir R300 000 se goedere wat gesteel is, maar omdat jy eintlik net die helfte van alles verseker het, gaan net R150 000 aan jou uitbetaal word. Jy het dalk R100 per maand aan jou premie bespaar, maar jy is nou baie slegter daaraan toe as voorheen.

2. Beveilig jou woning

Hoe meer veiligheidsmaatreëls jy het, hoe laer is jou premie. Dit sluit in ’n alarmstelsel met gewapende reaksie, veiligheidshekke, diefwering en elektriese heinings.

Rookalarms is nie duur om te installeer nie en kan groot skade voorkom.

Sommige versekeraars sal ook in ag neem as jy groot honde het.

Let wel, die besparing aan jou premie as jy ’n huisalarm en gewapende reaksie het, is nooit so groot soos die betaling aan die veiligheidsmaatskappy nie. Dus, as jy voel jy kan nie meer jou veiligheidsmaatskappy bekostig nie, vind by jou versekeraar uit met hoeveel jou premie sal styg.

3. Skakel jou huisalarm aan

Indien jy jou huisinhoud verseker het op grond daarvan dat jy ’n alarmstelsel het, moet jy seker maak jou alarmstelsel werk. Toets dit gereeld. Maak ook doodseker dat die battery nog werk – gereelde beurtkrag kon meegebring het dat die alarm se leeftyd verkort is.

Jy móét jou alarmstelsel aanskakel wanneer niemand tuis is nie indien jy dit op jou polis gespesifiseer het.

4. Pas jou adres aan as jy verhuis

Versekering vir jou motor en huisinhoud behoort te daal as jy na ’n veiliger woonbuurt of van ’n alleenstaande huis na ’n kompleks trek. Moenie vergeet om jou adres by jou versekering aan te pas nie.

5. Maak seker jy het dekking vir persoonlike aanspreeklikheid

Omvattende versekering vir huisinhoud sluit gewoonlik dekking vir persoonlike aanspreeklikheid in. Dit is dekking vir as jou hond iemand op jou erf byt, as jou huiswerker aan diens beseer word of as ’n afdak op ’n gas se motor inval. Eise vir persoonlike aanspreeklikheid kan miljoene beloop en dekking is dus belangrik.

6. Wees ’n goeie huiseienaar

Hou jou huis in stand deur byvoorbeeld lekplekke reg te maak, geute skoon te hou, die geiser jaarliks te laat versien en so meer.

Dit klink teenstrydig om geld te bestee ten einde geld te spaar, maar as jou huis skade kry weens swak instandhouding, mag jou versekeraar weier om uit te betaal. ’n Assessor sal kan vasstel wanneer skade deur swak instandhouding of verwaarlosing veroorsaak is.

Dit maak dit dubbeld so belangrik dat die geld wat jy wél aan die instandhouding van jou huis bestee, vir die beste vakmanskap betaal.

  • Hier is ’n kontrolelys:
  • Herstel lekplekke, veral van die dak.
  • Maak jou kaggel en braaigebiede skoon.
  • Hou die geute skoon.
  • Laat die geiser jaarliks versien.

7. Oorweeg dekking vir noodgevalle

Baie polisse sluit dekking vir noodgevalle in, soos as jy ’n loodgieter nodig het wanneer ’n geiser gebars het.

8. Selfverseker

As jy op jou premie moet bespaar, kanselleer gespesifiseerde versekering (oftewel allerisiko-dekking) vir artikels wat jy uit die huis uit neem. Dit kan insluit jou selfoon, skootrekenaar of verloof- en trouring. Dis artikels waarvan die premie relatief hoog is en waarop daar dikwels ’n groterige bybetaling is.

Dis relatief duur en die bybetaling is hoog om jou slimfoon te verseker. Foto: Unsplash

Jy sal dit ook effens makliker kan vervang as dit gesteel of beskadig word.

“Selfverseker” sekere artikels soos selfone en skootrekenaars. Dit beteken dat jy elke maand geld opsysit totdat jy die waarde van daardie artikel gespaar het. Jy bespaar baie aan jou premie en verdien boonop rente op dié “noodfonds”.

11. Moenie dié waarde verseker nie

Moenie die waarde van artikels probeer verseker wat net sentimentele waarde het en dus eintlik nie vervang kan word nie.

12. Moenie op assessor staatmaak nie

Moenie dink omdat die bank se assessor jou huis kom waardeer het voordat ’n huisverband of tweede verband aan jou toegestaan is, beteken dit die gebou se defekte is outomaties verseker nie. Dit bly jou verantwoordelikheid om seker te maak foute word herstel en die gebou word in stand gehou, anders kan eise geweier word, het die ombud vir korttermynversekering onlangs gewaarsku.

13. Bepaal boukoste

Onthou dat jy jou huis (die gebou self) nie moet verseker teen die markwaarde daarvan nie, maar teen die koste om dit te herbou sou dit heeltemal afbrand. Boukoste is hoër as markwaarde.

Die waardasiefirma Mirfin het ’n basiese boukoste-sakrekenaar op sy webwerf. Dit sal vir jou ’n baie rowwe beraming gee van die herboukoste van jou huis.

Die verbandbemiddelaar Ooba bereken boukoste as volg:

  • R5 000 per vierkante meter vir ’n billike huis;
  • R8 000 tot R13 000 per vierkante meter vir ’n huis in die middelinkomstegroep; en
  • R20 000 per vierkante meter vir ’n luukse woning.

Ligging (byvoorbeeld plat of skuins terrein, of dit ’n afgeleë gebied is, of dit by die see of in ’n gebied met hoë reënval is), ontwerp en die afronding wat jy gekies het, bepaal ook die boukoste.

As jy jou eie huis gebou het, onthou om nie jou huis se waarde vir daardie koste te verseker nie – jy moet inflasie byreken en ook in ag neem dat jy met die aanvanklike bouwerk waarskynlik afslag gekry het op sekere aspekte. Ná ’n ramp moet jou huis dringend herbou word en sal daar waarskynlik nie afslag toegestaan word nie.

Foto ter illustrasie: Gallo Images/Getty Images
Jy het ’n bykomende premie vir dinge soos juweliersware wat jy uit die huis uit neem. Maak seker jy het ’n waardasiesertifikaat vir jou kosbare juweliersware. Foto: Gallo Images/Getty Images
Meer oor:  Spaarwenke  |  Korttermynversekering  |  Versekering  |  Spaar  |  Spaarmaand  |  Geldsake
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.