Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Geldsake
Spaarmaand: 30+ maniere om bankkoste te sny

Julie is Spaarmaand en Netwerk24 is op ’n missie om lesers met spaarwenke te help. Ons het reeds meer as 50 wenke gegee om aan krag te bespaar en amper 100 wenke om met kos te bespaar. Vandag kom bankkoste aan die beurt. Bankkoste gaan hand aan hande met finansiële beplanning en begroting. Hoe meer in beheer jy van jou geldsake is, hoe meer spaar jy!

  

1. Moenie van bank tot bank hop nie

Capitec se bankkoste is laag, maar as jy baie transaksies doen, kan dit duur raak.

Solidariteit se Navorsingsinstituut, wat jaarliks bankkoste vergelyk, het vanjaar bevind die bankkoste tussen verskillende banke wissel nou baie min.

Wanneer rente buite rekening gelaat word, is die verskil tussen die goedkoopste en duurste bankrekening met 17 transaksies nie eens R3 nie.

Dis daarom nie die stres en tyd werd om elke paar maande van bank tot bank te hop nie.

LEES OOK: Gaping in bankkoste word al hoe nouer

Aan die ander kant moet jy nie net omdat dit moeite is, by jou bank of by jou spesifieke bankpakket hou nie.

As jy ’n tweede rekening wil oopmaak of goeie rede het om keelvol vir jou bank te wees, kyk na Solidariteit se bevindings vir 2021:

  • Absa Transact is die heel goedkoopste bankrekening op intreevlak teen R33,10 vir 12 transaksies. Maar sodra die banksaldo tot R5 000 verhoog, is Capitec weer die goedkoopste teen R30,13.
  • In die kategorie vir middelklas-inkomste met meer gesofistikeerde bankbehoeftes is Absa se Gold Value Bundle die goedkoopste teen R128,25 vir 25 transaksies, terwyl FNB se Gold Unlimited die duurste is teen R171. As van die transaksies by ’n winkeltoonbank gedoen word plaas van by ’n kitsbank, sal FNB weer goedkoper wees, en Capitec se ekwivalente koste vir 25 transaksies sal steeds die heel goedkoopste wees teen R93,40.
  • In die kategorie vir die hoër middelklas sê Solidariteit dis bykans onmoontlik om net na koste te kyk. Al die banke het hul lys van gratis transaksies in hul duurder bondelrekeninge uitgebrei, behalwe kitsbankonttrekkings, wat by FNB duurder geword het.

2. Oorweeg ’n rekening by meer as een bank

Sommige banke het rekeninge wat aan jou bykomende voordele bied, selfs al is dit nie jou transaksierekening nie.

Jy kan byvoorbeeld ekstra Smart Shopper-punt by Pick n Pay verdien as jy ’n rekening by TymeBank oopmaak.

As jy by Discovery Vitality is en ook by Discovery Bank bank, kan jy baie meer geld terugkry vir gesonde kos by Pick n Pay (75% pleks van 25% net op Vitality).

Dié is slegs twee voorbeelde – vra rond onder jou vriende met ander bankrekeninge!

3. Kies die regte rekening vir jou

’n Mens kan maklik fokus op die enkelbedrag wat jy as bankkoste betaal, maar dis nie ál faktor wat jy in ag moet nee nie.

Kies eerder die rekening wat die beste in jou behoeftes voorsien. Bepaal wat jou transaksiebehoefte is en kies ’n rekening daarvolgens.

Byvoorbeeld: Jy dink dalk ’n bankrekening wat R20 per maand in bankkoste vra, is die beste, maar dan moet jy ook betaal vir elke transaksie, wat vinnig-vinnig kan oploop. Daarteenoor is ’n groot aantal transaksie dalk reeds ingesluit in ’n bankrekening wat “duur” lyk met ’n bankkoste van R100 per maand.

As jy min transaksies (soos onttrekkings, debietorders en elektroniese oordragte) per maand doen, is ’n betaal-per-transaksie-model ideaal vir jou. As jy baie transaksies wil doen, is ’n maandelikse koste wat ’n aantal onttrekkings en ander transaksies insluit, goedkoper.

4. Maak seker jy het die regte bankrekening vir jou ouderdom

Die meeste banke het spesiale pakkette vir jong mense en studente. Dit sluit in rekeninge wat rente betaal of wat lae of geen bankkoste het nie.

Sommige banke het ook spesiale rekeninge vir bejaardes, insluitend beter rentekoerse op beleggings.

5. Vind uit van pakkette vir paartjies of families

Absa
Absa stel jou in staat om iemand anders se bankkoste te borg. Foto: Bloomberg

As paartjies of gesinne saam bankrekeninge het of soortgelyke produkte by dieselfde bank het, is bankkoste soms goedkoper.

African Bank het byvoorbeeld ’n buigsame familie-rekening, MyWorld.

Absa het ook ’n spesiale voordeel waardeur mense die bankkoste van ’n geliefde kan “borg”, die Bank-On-Me-funksie.

   

6. Weet wat jou bankkoste dek en wat nié

Banke se pakkette wissel baie. Jou bankkoste dek dalk vier kontantonttrekkings per maand, waarna jy moet opdok. Beplan jou onttrekkings beter sodat jy nie méér moet betaal nie.

Vind uit of internetbankdienste en die bank se app gratis is, asook hoeveel debietorders of elektroniese oordragte ingesluit is in jou bankkoste.

Vind ook uit of jy jou krediet- of debietkaart onbeperk kan gebruik sonder om meer te betaal.

Bestuur jou banksake met dié kennis in gedagte!

7. Meng en pas jou bankbehoeftes

Net omdat jy jou huis deur een bank gefinansier het, beteken nie jy moet jou motor ook deur daardie bank finansier nie. Onderhandel altyd vir die beste rentekoers en die beste produkte vir jou behoeftes.

8. Moenie ander banke se kitsbanke gebruik nie

Transaksies by jou eie bank se kitsbank is goedkoper. Foto: Reuters

Selfs indien jou bank jou toelaat om geld gratis te onttrek, gaan jy lag en betaal by ’n ander bank se kitsbank. Jy gaan straks ’n transaksiekoste betaal sowel as ’n persentasie van die bedrag wat jy onttrek.

9. Vermy jou banktak

Dis deur die bank goedkoper om jou banksake aanlyn of selfs by ’n kitsbank te doen. Jy betaal ’n enorme kontanthanteringstarief as jy geld by ’n tak inbetaal.

Jy bespaar ook tyd en petrolgeld deur ’n besoek aan die bank te vermy.

Die meeste banke se apps laat jou nou toe om byna alles daarop te doen.

10. Gebruik jou kaart eerder as kontant

Benewens die koste van kontantonttrekking is daar ’n onregstreekse koste om kontant te gebruik, soos die koste van reis na punte waar jy kontant kan onttrek of inbetaal, die werktyd (en dikwels inkomste) wat verlore gaan, sowel as die risiko van diefstal.

FNB wys boonop daarop dat jy met jou bank se lojaliteitsprogram punte of kontant terug kan verdien deur ’n kaart te gebruik, nie deur kontant nie.

Een van die voordele van kontant is wel dat jy meer bewus is van hoeveel geld jy bestee – dis maklik om ietsie ekstra in die trollie te laai indien jy met die plastiek betaal. Hou by jou begroting, ongeag hoe jy betaal!

11. Onttrek kontant eerder by kasregister

As jy wel kontant nodig het, onttrek dit by die supermark se kasregister. Die meeste banke laat jou toe om by die meeste supermarkte kontant te onttrek.

12. Betaal met jou foon

Pleks van kontant of met ’n kaart betaal, kan jy deesdae ook met apps soos SnapScan of Zapper betaal of met jou foon of slimhorlosie se app, soos Samsung Pay, Apple Pay, Garmin Pay en Fitbit Pay.

Dis handig as jy een is wat maklik jou beursie laat rondlê of moeg is vir ’n hoop kaarte ronddra. Jou besparing lê daarin dat jy nie sommer ’n kaart sal moet vervang omdat jy dit verloor het nie!

13. Dra geld oor sonder ’n notifikasie

As jy geld elektronies vir iemand oordra, moenie ’n notifikasie (per SMS of e-pos) stuur nie, tensy dit ’n onderneming is wat op ’n amptelike bewys van betaling aandring. Jy betaal bes moontlik vir daardie SMS of e-pos wat die bank uitstuur. Die meeste mense ontvang in elk geval ’n SMS van hul bank af om te sê wanneer geld inbetaal is, maak net seker hulle kan sien van wie dit kom.

14. Oppas vir kitsbetalings

Die meeste banke maak dit moontlik om geld onmiddellik aan iemand te betaal. Daar is egter ’n bykomende koste. Hoewel dié koste wel by sommige banke gedaal het (byvoorbeeld van R50 tot R10 by Standard Bank), is dit onnodige koste tensy daar werklik nood is by die ontvanger.

Betalings na iemand wat ook by jou bank ’n rekening het, vind deesdae meestal dadelik of minstens oornag plaas, terwyl betalings tussen banke ook oornag of hoogstens oor twee nagte plaasvind.

15. Vermy “boetes”

As jy te min geld in jou rekening het op die datum wat ’n debietorder deurgaan, gaan jou bank jou swaar beboet.

Volgens Absa is die algemeenste rede dat debietorders afgaan voordat mense hul salaris ontvang het. As dit gereeld met jou gebeur, dalk omdat jou salaris nie altyd op dieselfde dag van die maand betaal word nie, maak seker debietorders gaan ’n dag of twee ná jou salaris af sodat jy seker is daar is wel genoeg geld in die rekening.

16. Oppas vir oortrokke geriewe

Vind uit hoe jou bank jou laat opdok vir oortrokke geriewe.

Baie banke hef ’n vaste tarief vir die voorreg om ’n oortrokke gerief te hê, selfs al gebruik jy dit nie. Kanselleer in so ’n geval jou oortrokke gerief indien jy dit nie gebruik nie.

Baie banke laat jou wel toe om tot sowat R500 oortrokke te gaan sónder dat jy daardie tarief hoef te betaal – jy betaal net rente op enige oortrokke bedrag.

Enkele banke hef slegs ’n oortrokke tarief indien jy wel in die rooi ingaan, sowel as rente.

17. Laat jou bankstaat aan jou e-pos

Laat jou bankrekening aan jouself e-pos, want al hoe meer banke hef ’n tarief indien jy dit per slakkepos laat aflewer. En e-posse kan nie in die pos wegraak nie!

18. Stoor jou elektroniese bankstaat veilig

Skep ’n lêer op jou foon of rekenaar of gebruik ’n datastokkie om finansiële inligting te bêre. Jy kry bankrekeninge dalk later weer nodig, en om dit by die bank te laat uitdruk, is ontsaglik duur. Dit kan jou ook help wanneer jy jou belastingopgawe moet indien.

Sommige banke se digitale platforms bêre gewoonlik slegs drie maande se bankstate, hoewel ander dit moontlik maak om ou bankstate af te laai.

19. Gaan elke maand deur jou bankstaat

Maak seker daar is geen koste wat verkeerdelik verhaal word nie. Kyk uit vir bedrieglike debietorders – dikwels is dit bedrae van R45 of R99 – vir produkte of dienste wat jy nie gekies het nie. Laat dit onmiddellik deur die bank regstel.

20. Pas jou kaarte op

Moenie jou bankkaarte verloor nie. Die meeste banke laat jou opdok as jy tussen geskeduleerde vervangings ’n nuwe kaart nodig het.

21. Moet nooit kommunikasie van jou bank ignoreer nie

Jou bank stuur byvoorbeeld jaarliks vir jou ’n brief of e-pos waarin die volgende jaar se bankkoste aangedui word. Lees dit en maak seker jy verstaan die impak van enige verandering op hoeveel bankkoste jy gaan betaal.

22. Laai jou bank se app op jou foon

By sommige banke gebruik jy geen datakoste om die app te gebruik nie.

23. Gaan jou bankbalans op jou app na

Vind uit of jy betaal om jou bankbalans na te slaan op ’n kitsbank. Indien wel, moet dit nie doen nie! Dis gratis om op die bank se app te kyk hoeveel geld jy het.

24. Bly veilig as jy internet- of selfoonbankdienste gebruik

Hier is wenke om te voorkom dat jy die slagoffer van kuberskelms word:

  • Ignoreer e-pos wat lyk of dit van ’n bank kom en waarin jou persoonlike besonderhede gevra word.
  • Moet nooit ’n skakel in e-pos volg na jou “bank se webwerf” nie. Tik die amptelike webadres in en let op die klein slot-ikoon wat die webwerf se kuberveiligheid bevestig voordat jy aanmeld.
  • Moet nooit jou aanlyn wagwoord of PIN deel of neerskryf nie. Verander dit ook gereeld.
  • Moenie die wagwoord op jou rekenaarskerm stoor of persoonlik maak nie.
  • Vermy banktransaksies op openbare plekke soos internet-kafees.
  • Rus jou rekenaar met die jongste anti-virus-sagteware toe.
  • Onthou, banke sal nooit jou vertroulike inligting (PIN of geheime kode) telefonies verifieer nie.
  • Moenie reageer op oproepe of teksboodskappe van onbekende nommers af nie, veral as persoonlike inligting gevra word.
  • As jy ’n OTP (“one time password”) ontvang, maar nie ’n transaksie gedoen het nie, moet jy lont ruik. Laat weet dadelik jou bank.
  • Stel ondersoek in as jou gewone selfoonverbinding onderbreek word. Jy is dalk die slagoffer van ’n SIM-ruiling.
  • Gebruik ’n wagwoord en skermslot op jou selfoon.
  • Kyk mooi wie dit aanbied voordat jy jou selfoon vir kompetisie-inskrywings of oënskynlik “gratis” dienste gebruik.

 

25. Betaal jou kredietkaartrekening betyds en ten volle

Vermy finansieringskoste en rente deur jou rekening betyds en ten volle te betaal. As jy geneig is om te vergeet, vra die bank om die bedrag van jou rekening te verhaal.

Betaal met kaarte of met jou foon eerder as met kontant. Jy kan nie lojaliteitspunte met kontant verdien nie! Foto: Pixabay

Natuurlik beteken dit jy moet begroot en binne jou begroting bly – makliker gesê as gedaan, ons verstaan!

26. Onderhandel oor rentekoers

Jy behoort minstens tweejaarliks met die bank te onderhandel oor ’n laer rentekoers op jou huisverband. Jy gaan nié elke keer suksesvol wees nie, maar dit kos jou niks om te probeer nie. Mense wat min skuld het (by alle kredietverskaffers) en hul rekening getrou betaal, staan ’n beter kans.

27. Laat jou geld vir jou werk

Die meeste transaksierekeninge verdien nie vir jou rente nie, maar daar is uitsonderings.

As jy nie rente op ’n positiewe balans kan verdien nie, skep ’n spaarrekening wat wel rente betaal, selfs al is dit net ’n paar persentasiepunte, waarheen jy jou salaris skuif wanneer dit inbetaal word en waaruit jy dit maklik kan skuif voordat debietorders betaalbaar word (dus, nie ’n vastedeposito-bankrekening nie!).

Indien jy geen kredietkaartskuld het nie, trek jy ook ’n klein bietjie rente op ’n positiewe balans op jou kredietkaart.

Nog ’n opsie is om die geld na jou huisverband te skuif – vir die tyd wat dit daar lê, betaal jy minder rente op jou uitstaande verband.

Dié opsies moet net versigtig opgeweeg word teen enige moontlike bank- en transaksiekoste op ’n spaarrekening.

Onthou ook dat jou langtermynspaargeld in ’n effektetrustfonds, beursverhandelde produk of geldmarkrekening gestort moet word – moenie net in jou bankrekening probeer spaar vir groot uitgawes nie.

Minstens een bank waarvan ons weet, FNB, het ’n rekening wat uit twee dele – jou transaksierekening en ’n spaarrekening – bestaan. Dit stel jou kosteloos in staat om geld heen en weer te skuif.

28. Behou ’n positiewe balans in jou bankrekening

Enkele banke betaal rente of gee afslag op bankkoste indien daar ’n positiewe balans vir die hele maand is. Dikwels is dit ’n minimum van ’n spesifieke bedrag. Vind uit wat jou bank aanbied en hoeveel jy sal kan spaar.

 

29. Maak seker jy kry kennisgewings van jou bank af

As jy nog nie het nie, registreer vir die notifikasiediens van jou bank wat jou inlig indien daar enige betaling in of onttrekking uit jou bankrekening was.

30. Verstaan jou bank se lojaliteitsprogram

Lojaliteitsprogramme is ’n goeie manier om voordele te geniet, maar net as jy dit slim gebruik. Vind uit wat dit kos om aan te sluit, weet waar jy punte kan verdien, en moenie jou punte laat verval nie.

Wat lojaliteitsprogramme betref, loop FNB se eBucks los voor, op grond van ’n lys transaksies wat Solidariteit gebruik het om die banke se programme te vergelyk.

As alledaagse aankope by die voorgeskrewe winkels gedoen word, sal ’n verbruiker by FNB soveel as R463,20 terugkry, terwyl dieselfde lys transaksies by Standard Bank jou net R174,30 sal teruggee.

Volgens Solidariteit is al die banke behalwe Nedbank volkome deursigtig oor hoe punte verdien en toegeken word in hul lojaliteitsprogramme.

31. Pleit vir ’n betaalvakansie

In 2020 het baie Suid-Afrikaners wat hul werk tydelik verloor het, aansoek gedoen op betaalvakansies op hul huis- en motorskuld en persoonlike lenings. Dit beteken hulle is vir drie tot ses maande daarvan vrygestel om paaiemente te betaal.

Indien jy wel ’n betaalvakansie oorweeg, maak net seker jy verstaan die voorwaardes. Rente hoop gewoonlik op vir die tydperk, wat beteken jy sal ’n hoër paaiement hê wanneer die afbetalings hervat word.

Banke gaan meer geneë wees om te help indien jy nog altyd ten volle en betyds betaal het en indien die rede vir jou kontantknyp buite jou beheer was, soos aflegging of ’n mediese krisis.

Mense wat reeds in 2020 ’n betaalvakansie benut het, gaan bes moontlik nie weer hulp kry nie.

Meer oor:  Spaarwenke  |  Banke  |  Bankbedryf  |  Spaar  |  Spaarmaand  |  Geldsake
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.