Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Geldsake
Spaarmaand: Spaar op versekering, maar oppas

As jy optel wat jy aan versekering betaal, is dit maklik om rooi te sien. Hoe kan ’n mens spaar op versekering sonder om dit net alles te kanselleer? Hier is 13 wenke wat dié Spaarmaand kan help.

  

versekering
Onthou dat versekering ’n veiligheidsnet is wat jou van baie groot finansiële probleme kan vrywaar. Dink dus aan die toekoms eerder as elke maand se premie wanneer jy aan jou versekering wil verander. Foto: Unsplash

Ons verdeel die onderwerp van versekering in verskillende artikels. Vandag kyk ons na algemene wenke en in daaropvolgende dae na motor- en huis- en huisinhoudversekering. Wees dus op die uitkyk nóg wenke oor die onderwerp.

1. Herinner jouself waarom jy versekering het

Voordat jy versekering opskort of verminder, en voordat jy op die randwaarde van jou premie konsentreer, onthou wat die doel van versekering is. Dit is om jou ná ’n ramp soos ’n huisbraak, brand of motorongeluk in dieselfde posisie te plaas wat jy nou is.

Met Suid-Afrika se hoë misdaad- en ongeluksyfer is dit byna ’n gegewe dat jy in jou lewe wel skade sal ly.

As jy nie behoorlik verseker is nie, of as jy kortpaaie geneem het wat jou polis ongedaan maak, bespaar jy dalk R100 hier of R200 daar op jou maandelikse premie – maar wanneer jy eis, het die bedrae ter sprake baie meer nulle. Kan jy dit byvoorbeeld bekostig om ’n nuwe motor te koop terwyl jy moet aanhou om jou afgeskryfde motor af te betaal omdat die versekering nie uitbetaal nie omdat jou motor onpadwaardig was?

Met versekering is die Engelse waarskuwing om nie “penny wise, pound foolish” te wees nie, uiters toepaslik. Moenie op jou premie probeer bespaar tot jou eie langtermynskade nie.

2. Betaal jou premies getrou

Maak doodseker jou premie word elke maand van jou bankrekening verhaal en dat daar genoeg geld in jou bankrekening daarvoor is.

As jy nie jou premies betaal nie, is jy nie gedek nie – dit help nie jy het die vorige 20 jaar getrou betaal, maar slaan dan twee maande se premies oor nie!

Daar is wel ’n grasietydperk van minstens 15 dae van die datum af wat jou premie betaalbaar is. Sommige versekeraars laat selfs 30 dae toe.

As jou premie altyd op die eerste van die maand per debietorder afgetrek word en jy een maand weens ’n krisis nie geld in die rekening het nie, sal jou polis geldig bly tot minstens die 15de van die maand. Sommige versekeraars sal jou polis geldig hou en dan die volgende maand twee premies probeer aftrek. As dit dan steeds nie afgetrek kan word nie, is jy nie meer gedek nie.

Sommige versekeraars sal ’n boete oplê vir laat betaling; jou bank sal jou ook beboet as ’n debietorder weens ’n gebrek aan geld nie kan deurgaan nie.

Bel jou versekeraar dadelik indien jou debietorder nie deurgaan nie – jy weet nie of jou versekeraar jou ná 15 dae gaan afsny nie! Sommige sal vereis dat jy die geld in kontant oorbetaal binne daardie 15 dae of jy verloor jou dekking.

Indien jou polis verval, sal jy ’n nuwe polis moet uitneem, en jou premie sal onvermydelik hoër wees.

3. Werk jou inligting gereeld by

Talle faktore bepaal jou versekeringspremie – van jou ouderdom tot waar jy bly en hoe gereeld jy met jou motor ry. Werk jou besonderhede by as iets groots gebeur soos wanneer jy verhuis, ’n nuwe motor koop of verloof raak. Kyk egter ook minstens een keer per jaar of jou versekering nog jou werklikhede weerspieël.

Vra jouself af:

  • Het die persoon wat jou motor gereeld bestuur, verander?
  • Parkeer jy die motor bedags en oornag nog op dieselfde plek?
  • Het jy verhuis?
  • Is jou kind, wie se motor op jou naam verseker is, nou ouer as 25 jaar?
  • Het jou buurt met ’n buurtwag begin?
  • Het jy afgetree?
  • Werk jy sedert die aanvang van Covid-19 heeltyds of meer gereeld van die huis af?
  • Het jy nuwe (en dus duurder) meubels of toestelle gekoop?
  • Het jy enige duur meubels, toestelle of juweliersware verkoop of weggegee?
  • Het jy iets kosbaars geërf of geskenk gekry?
  • Het jy aangebou aan jou huis?
  • Het jy jou huis se veiligheidstelsel opgegradeer?

4. Doen jou eie belwerk

Wanneer jy ’n nuwe motor koop, sal die motorhandelaar of -finansierder aanbied om vir jou ’n kwotasie vir versekering te kry. Jy word ook soms gebel met aanbiedinge van makelaars wat vir jou ’n beter premie wil beding.

As jy só versekering bekom, sal jy vir die duur van daardie polis ’n makelaarsgeld betaal. Dis dalk net ’n paar rand, maar dis geld waaruit jy nie noodwendig waarde kry nie.

Ook as jy ’n premievergelykingsdiens gebruik, sal jy ’n makelaarskoste betaal. Jy sal dit kan vermy as jy self elke versekeraar bel om ’n kwotasie te kry.

As jy voel die tyd en stres wat jy bespaar, is daardie makelaarsgeld werd, kan jy dit gerus betaal. Eweneens, as jou persoonlike makelaar of finansiële adviseur meer doen as net ’n polis vir jou kry, maar jou ook bystaan wanneer jy ’n eis het, kry jy waarde vir daardie geld.

Daar is ongelukkig net te veel makelaarsdienste wat geen waarde toevoeg vir die geld wat hulle by duisende huiseienaars en motoriste verdien nie.

5. Wees op die uitkyk vir nuwe produkte

Nuwe spelers in die versekeringsbedryf stel gereeld nuwe produkte bekend, of welbekende maatskappye bring nuwe produkte op die mark. Só kan jy nou deesdae nét jou duur bergfiets verseker pleks van al jou huisinhoud, of jy kan lewensversekering net vir ’n naweek se avontuursport uitneem.

Advertensies vir versekering is iets wat jy gerus maar kan kyk om te weet wat in dié mark as toonaangewend beskou word. Dit kan jou ook bedingingsmag gee as jy met jou eie versekeraar wil onderhandel.

6. Lees jou polisdokument

As jy dit nog nooit gedoen het nie of pas verseker is, lees jou polisdokument. Maak seker jy verstaan waarvoor jy gedek is en onder watter voorwaardes, en ook wat die bybetalings onder bepaalde omstandighede is. Vra vrae as jy nie seker is waarvoor jy gedek is nie.

7. Vra kwotasies by mededingers

Dit is goeie praktyk om so elke twee of drie jaar mededingende kwotasies van ander versekeraars te kry. Indien jy ’n kwotasie op skrif kry, kan jy dit gebruik om met jou huidige versekeraar te beding.

Wees egter versigtig dat jy nie appels met pere vergelyk nie. Kyk na die dekking, bybetalings, uitsluitings en geeneisbonus voordat jy skuif.

Wees egter versigtig dat jy nie appels met pere vergelyk nie. Kyk na die dekking, bybetalings, uitsluitings en geeneisbonus voordat jy skuif.

Doen ook navraag by ander mense wat by daardie versekeraar verseker is voordat jy skuif.

8. Beding ’n laer premie of ’n laer styging in jou premie

As jy al jare lank by dieselfde versekeraar is en min of glad nie eis nie, sal hulle jou wil behou. Moenie skaam wees om te bel en te sê jy is ontevrede met jou premie of met jou jaarlikse verhoging in die premie nie.

Jy sal meer bedingingsmag hê as jy ’n goeie rede kan aanvoer waarom jy ongelukkig is, en ook as jy ’n alternatiewe kwotasie het.

9. Oppas vir rondspring tussen versekeraars

Jy is nie met jou versekeraar getroud nie en jy betaal vir ’n diens, dus is jy hulle ook nie tot in ewigheid lojaliteit verskuldig nie. Verander dus beslis van versekeraar as jy nie tevrede is met jou premie of die diens wat jy kry nie.

Onthou net dat versekeraars jou probeer lok met ’n lae aanvanklike premie, maar dan bes moontlik in die tweede jaar ’n buitensporige verhoging kan instel (waarteen jy natuurlik beswaar kan aanteken).

Onthou ook dat sommige versekeraars vir jou ’n beter premie sal aanbied indien jy drie jaar of langer by jou huidige versekeraar is – mense wat elke jaar rondspring, benadeel hulself dus effektiewelik.

10. Geeneisbonus of nié?

Vind uit of jy ’n geeneisbonus as deel van jou polis het. Sommige versekeraars verhoog jou premie om daardie geeneisbonus te (help) betaal.

Vind uit of jou premie sal daal, en met hoeveel, as jy daardie geeneisbonus prysgee. En dan moet jy maar die somme doen – vind uit wat jou geeneisbonus is en of dit méér of minder is as die laer premie daarsonder (maal die aantal maande wat jy dit moet betaal voordat jou geeneisbonus uitbetaal).

Indien jy wel ’n geeneisbonus het, dink twee keer voordat jy vir klein items eis.

Moenie jou motor ná ’n ongeluk self laat regmaak sonder om jou versekeraar in te lig nie – die versekeraar moet weet as ’n motor groot skade opgedoen het, selfs al betaal jy uit jou eie sak vir die herstelwerk. (Jy hoef nie klein skade aan te meld nie, maar bel indien jy onseker is.)

11. Kombineer dekking

Dis dikwels goedkoper om jou huis-, huisinhoud- en motorversekering by dieselfde maatskappy te hê.

Jy kan ook bespaar as jy en jou lewensmaat jul motor by dieselfde versekeraar verseker of as jy die motors van volwasse kinders wat nog by jou woon, op jou polis sit (let net daarop dat die regte persoon aangegee moet word as die gereelde bestuurder van elke motor).

Jóú premie sal uiteraard styg as jy meer as een motor verseker, maar die totale premie sal minder wees as elkeen van die afsonderlike premies. Maak net seker die kinders dra by na vermoë!

12. Moenie sloer nie

Meld skade aan jou huis of motor so gou as moontlik aan. Daar is gewoonlik ’n afsnytyd vir die indien van enige eis. Motorongelukke moet gewoonlik binne 24 uur by ’n polisiekantoor aangemeld word, en versekeringseise moet binne 30 dae aangemeld word.

13. Gebruik geakkrediteerde kontrakteurs

As jy herstelwerk laat doen ná ’n ongeluk of huisbraak of as jou huis se geiser gebars het, vind eers by jou versekeraar uit of jy spesifieke kontrakteurs moet gebruik.

Meer oor:  Spaarwenke  |  Korttermynversekering  |  Versekering  |  Spaar  |  Spaarmaand  |  Geldsake
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.