Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Mediese Fondse
Dokters word gou só vasgevat

Dit lyk nou meer seker dat dokters se tariewe eersdaags streng gereguleer gaan word.

Een van die bevindings van die markondersoek oor die koste van private gesondheidsorg is dat mense in hospitale behandel word omdat hulle dan beter dekking van hul mediese fonds kry. Foto: Pixabay

Dr. Aaron Motsoaledi, minister van gesondheid, het twee weke gelede met die bekendstelling van die Wetsontwerp op Nasionale Gesondheidsversekering (NGV) en Wysigingswetsontwerp op Mediese Skemas die regering se beleid oor prys­ingryping beklemtoon.

Donderdag het die lank verwagte verslag van die Mededingingskommissie oor die private gesondheidsektor verder gegaan en ’n reguleerder voorgestel wat binne ses jaar gestig behoort te word.

Dié reguleerder sal nie net pryse vir sekere prosedures vasstel en basistariewe vir alle ander prosedures opstel nie, maar ook ander aspekte soos hospitaaltariewe en lisensies vir hospitale hanteer.

Tot dusver is dokters se grootste beswaar teen prysregulering dat dit onmededingend sou wees.

Die departement van gesondheid het in 2010 ’n verwysingspryslys gepubliseer. Medici het dit suksesvol in die hof beveg omdat dié pryslys irrasioneel opgestel is en die pryse onmededingend was. Die regering het die afgelope agt jaar nog nie weer probeer om wegholpryse in toom te hou nie.

Nou het die land se mededingingsowerheid in die ondersoek bevind ’n pryslys is nie net in die pas met mededingingswetgewing nie, maar inderdaad noodsaaklik om mededingendheid in die private gesondheidsbedryf te bevorder en die publiek te beskerm.

Boonop is dokters klaarblyklik gewillig om in te stem tot prysregulering op sekere voorwaardes.

Casper Venter van die konsultantegroep HealthMan, wat in 2010 by die hofsaak betrokke was, sê aan Rapport hul kliënte-organisasies, wat duisende dokters verteenwoordig, is nie in beginsel gekant teen regulering nie. “Dit moet net onderhewig wees aan regverdige reëls en navorsing.”

Ook die Suid-Afrikaanse Mediese Vereniging (Sama) sê sy lede sal saamwerk, mits hulle ’n regverdige tarief kan vra wat ’n behoorlike opbrengs op hul beleggings bied.

Die markondersoek se voorlopige bevindings sluit in:

  • Die land se drie groot hospitaalgroepe – Life Healthcare, Netcare en MediClinic – toon volgehoue en groot winste. Hulle beheer 83% van die land se private geriewe en is verantwoordelik vir 90% van alle hospitaalopnames. Die regering staan lisensies vir nuwe hospitale toe, al is daar ’n ooraanbod van private hospitaalbeddens in sekere gebiede. Die kommissie stel voor dat ’n moratorium op lisensies vir dié drie groepe geplaas word. ’n Ooraanbod van beddens lei tot hoër kostes omdat mense oorbehandel word.
  • Mediese fondse verwar verbruikers met meer as 270 opsies. Almal behoort een standaard-minimum-opsie te hê, wat alle lede kan vergelyk, asook meer omvattende opsies. Hoewel daar 22 oop mediese skemas is, beheer twee skemas 70% van die mark. Meer as die helfte van dié lede (55%) behoort aan Discovery Health. Die administrateurs wat wins maak uit hul dienste aan mediese fondse, word feitlik oorheers deur Med­scheme – wat dienste lewer aan fondse soos Gems, Polmed en Bonitas – en Discovery Health, wat die Discovery-skema en ’n klomp kleiner fondse bestuur. “Daar is geen aanduiding dat die tekortkominge in die mark sal self-korrigeer nie,” bevind die kommissie.
  • Sommige dokters oorbehandel pasiënte om verskeie redes. Dit kan vasgevat word deur buitehospitaal-voordele te verbeter sodat hospitalisasie minder nodig is en deur tariewe te reguleer.

Die kommissie, wat deur oudhoofregter Sandile Ngcobo gelei is, se voorlopige verslag is relatief goed ontvang deur rolspelers.

Dit skep egter ook onduidelikheid oor die toekoms van die private mediese bedryf omdat die aanbevelings in verskeie opsigte Motsoaledi se onlangse inisiatiewe weerspreek.

Martin Versfeld van die prokureursfirma Webber Wentzel sê die kommissie se aanbevelings is nie bindend nie. Kommentaar kan tot 7 September gelewer word, waarna die paneel sy finale verslag en aanbevelings teen einde November gereed sal hê.

Neil Kirby, ’n direkteur van Werksmans, sê kragtens die Mededingingswet moet die finale verslag aan die parlement voorgelê word vir ingeval aanbevelings ’n verandering in regeringsbeleid sal vereis.

Hy sê hy is besorg oor aspekte van die voorlopige verslag wat nie genoegsaam erkenning gee aan die voorgestelde wetswysigings van Motsoaledi nie. “Ek sou dink dit moes die voorgestelde wetlike veranderinge in die gesondheidsorgsektor in ag neem. Dit kan wel nog gebeur voor die finalisering van die verslag.”

Ngcobo het met die bekendstelling van die verslag toegegee sy verslag weerspreek soms Motsoaledi se idees. Die verskille is:

  • Makelaars: Hoewel Motsoaledi in Junie gesê het daar gaan weggedoen word met makelaars vir mediese fondse, is dit nie wat in sy wetsontwerp staan nie, sê Venter. Die markondersoek erken ook die rol van makelaars, maar definieer dit duideliker en beveel aan dat ’n lid kan kies of hy deur ’n makelaar wil werk, of regstreeks met ’n mediese fonds, teen minder betaling. Venter sê hy kan nie sien hoe oop skemas sonder makelaars kan werk nie.
  • Bybetalings: Motsoaledi het gesê bybetalings moet geskrap word. Dit is weer eens nie heeltemal wat in die wetsontwerp staan nie, sê Venter. Die amptelike voorstel is dat bybetalings nie vir ’n stel ooreengekome prosedures gehef word nie. Venter sê dit verskil dus nie van wat tans in die regulasies oor voorgeskrewe minimum voordele (VMV’s) vervat is nie. Dr. Ntuthuko Bhengu, een van die kommissie se paneellede, het gesê hulle verskil van die minister dat bybetalings altyd ’n euwel is, omdat dit lyk of dié betalings ook siekefondslede keer om sekere onnodige prosedures te ondergaan.
  • Die rol van mediese fondse: Onder die voorgestelde NGV-wet lyk dit of mediese fondse net dekking sal bied vir dit wat nie onder die NGV beskikbaar is nie, maar die markondersoek stel net ’n omvorming van die bedryf voor soos deur ’n risiko-gelykmaking-fonds. Verder is die voorstel dat mediese fondse grootliks moet voortgaan soos nou.
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

  • INDEKS
  • GELDEENHEDE
  • KOMMODITEITE
Data word met 15 min. vertraag
  • Gold Mining 1024,16 (916)
  • Top 40 49995,65 (65670)
  • All Share 56113,06 (67103)
  • Resource 10 39715,08 (29114)
  • Financial and Industrial 30 76821,57 (116914)

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.