Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Mediese Fondse
Groot bybetalings buite netwerke bly jou voorland

Groot bybetalings en streng reëls oor verskaffers-netwerke bly mediesefondslede se voorland nadat die Raad op Mediese Skemas (RMS) ’n ommeswaai gemaak het in sy pogings om dit te reguleer.

Mediese fondse sê bybetalings voorkom bedrog, vermorsing en misbruik deur hul lede. Foto: Pixabay

Die RMS het in Junie 2017 in die Staatskoerant afgekondig dat hy beoog om mediese fondse te dwing om tenderprosesse te volg om verskaffers aan te stel en hulle gaan verbied om bestrawwende bybetalings te hef indien hul lede nie voorkeur-verskaffers gebruik nie.

Maar dr. Sipho Kabane, hoof van die RMS, het Donderdag in ’n skrywe aan mediese fondse aangekondig hulle het ná ’n konsultasieproses nou heeltemal van plan verander.

Luidens sy skrywe stem die minister van gesondheid saam met die besluit om die aftog te blaas.

Die hoofklaer oor bybetalings was die Vereniging van Onafhanklike Gemeenskapsapteke (ICPA) wat gekla het dat hul lede versmoor word deur die netwerk-ooreenkomste met die groot apteekgroepe. Hul pasiënte het óf oorgeskuif na die groot groepe óf hulle moet maandeliks ’n bitter pil sluk met ’n bybetaling.

En dít terwyl hulle medisyne teen presies dieselfde pryse kan verskaf as byvoorbeeld Clicks en Dis-Chem, het die ICPA gesê.

Die RMS het die klein apteke gelyk gegee en ’n voorneme om dié praktyke ongewens te verklaar, gepubliseer. Rolspelers kon kommentaar lewer oor die konsep-verbod.

Byna twee en ’n half jaar later sê Kabane egter nou verskillende diensverskaffers soos apteke, dokters en hospitale het verskillende bekommernisse oor bybetalings gehad, terwyl die mediese fondse aangedui het hoe die bybetalings bedrog, vermorsing en misbruik deur hul lede voorkom.

“Die (mediese fondse) het ook aangedui dat ’n formele tenderproses nie altyd uitvoerbaar is nie en dat alle diensverskaffers wat aan hul kriteria voldoen, ingesluit word.”

Boonop is die omstrede Wysigingswetsontwerp op Mediese Skemas onlangs gepubliseer en dié proses moet eers afgehandel word, sê Kabane.

Rapport het in Junie verlede jaar berig dr. Aaron Motsoaledi, toe nog minister van gesondheid, het belowe die wysigingswetsontwerp gaan “alle bybetalings” verbied. Die wetsontwerp verbied egter net sommige bybetalings vir ’n mandjie van voordele – presies soos nou die geval is met voorgeskrewe minimum voordele (VMV’s).

Kabane sê mediese fondse mág netwerke en straf-bybetalings voorskryf vir die behandeling van VMV’s, maar die uitsondering is wanneer ’n lid nie vrywillig ’n diensverskaffer buite die netwerk gebruik het nie, soos in ’n noodgeval.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.