Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Mediese Fondse
Hospitale sê dis artse; artse sê dis fondse

Dokters en spesialiste wat pasiënte oormatig behandel vir finansiële gewin, en mediese fondse wat voordele so beperk dat lede in hospitale opgeneem móét word om hul mediese eise uitbetaal te kry.

Dokters laat prosedures in die hospitaal doen omdat hulle dan sekerder is hul rekening word deur mediese fondse betaal, word beweer. Foto: iStock

Dié vraagstukke het opnuut onder skoot gekom in ’n hoëvlakbespreking van die koste van private gesondheidsorg.

Op ’n seminaar van die Mededingingskommissie in Pretoria Vrydag oor die rol wat verskaffer-gedrewe vraag speel in die stygende koste van private gesondheidsorg en wat gedoen kan word om dit in bedwang te bring, was daar heelwat vingerwysery.

Die groot hospitaalgroepe – Netcare, Life Healthcare en Mediclinic – sê daar is min bewyse dat hospitale regstreeks pasiënte lok en pak die skuld op dokters. Hulle sê as die gebruik van beddens toeneem nadat meer beddens bygevoeg is, is dit waarskynlik omdat die vraag onderdruk is of omdat daar in die eerste plek te min beddens was.

Die Suid-Afrikaanse Mediese Vereniging (Sama), wat sowat 17 000 lede het, en die Suid-Afrikaanse Vereniging vir Narkotiseurs (Sasa), wat 2 000 spesialiste verteenwoordig, sê weer mediese fondse dryf mense na hospitale omdat die buite-hospitaalvoordele so swak is.

Mediesefondsadministrateurs sê dit is verbruikers wat aandring op meer sorg en spesifieke medikasie en dat die groter voorkoms van sekere siektetoestande en ’n ouer bevolking nie buite rekening gelaat moet word as oorsake vir die stygings nie.

Die ondersoekpaneel na private gesondheidsorgkoste (HMI) onder leiding van oudregter Sandile Ngcobo het die seminaar aangebied om rolspelers se kommentaar aan te hoor nadat verskaffer-gedrewe vraag in die paneel se voorlopige verslag verlede jaar as ’n groot probleem uitgelig is.

Sieker?

Dr. Neil Soderlund het namens die HMI-paneel gesê die voorkoms van keisersneë en opnames in waakeenhede in Suid-Afrika is van die hoogste ter wêreld.

Die diagnose van bipolêre depressie in Suid-Afrika is ook veel meer as die wêreldnorm en Soderlund skryf dit daaraan toe dat dié pasiënte gehospitaliseer kan word as deel van die lys van voorgeskrewe minimum voordele (VMV) – toestande waarvoor mediese fondse moet betaal ongeag die plan waarop ’n lid is.

Swak voordele buite hospitaal

Dr. Guni Goolab, hoofamptenaar van Gems, die staatsdiens se mediese fonds, het gesê pasiënte moet eerstens hul algemene praktisyn besoek, wat dan, indien nodig, hulle na ’n spesialis kan verwys.

As fondse keer dat hul lede regstreeks na ’n spesialis gaan wat hulle dan in die meeste gevalle in die hospitaal laat opneem, kan koste met 10% besnoei word, aldus Goolab.

Dr. Brian Ruff van PPO Serve, ’n bestuurde gesondheidsorgmaatskappy, sê hulle het gevind die koste om iemand in ’n hospitaal te behandel is tien keer soveel as om hom doeltreffend buite die hospitaal te behandel.

Hy sê ook die swak mediesefondsvoordele vir behandeling buite die hospitaal is ’n groot sondaar. Spesialiste laat pasiënte dikwels in die hospitaal opneem vir skanderings en kleiner prosedures wat in dagklinieke of ander geriewe gehanteer kan word omdat hulle weet die fonds betaal dit uit die risikopoel en nie uit die pasiënt se spaarfonds nie. Die dokters is dus seker hulle sal hul geld kry, sê hy.

Verskeie rolspelers het Vrydag gesê hulle steun die HMI-paneel se voorstel van prysregulering vir dienste en produkte op voorwaarde dat dit volhoubaar moet wees vir dokters en deursigtig moet wees.

Daar is ook steun vir ’n enkele vergelykbare basiese mediesefondsopsie met ’n risiko-aanpassingsmeganisme om mededinging tussen die fondse te verbeter en vir ’n laekoste-opsie wat mediese dekking bekostigbaarder sal maak vir meer mense.

Van die private rolspelers stel ook verpligte mediesefondslidmaatskap voor vir mense wat formeel in diens is om mediese fondse te help omdat baie mense eers later in hul lewe aansluit of kort voordat hulle ’n groot prosedure moet ondergaan. Dit kan ook help met die probleem van lede wat na goedkoper opsies oorskakel, maar vir wie die volle VMV-voordele steeds betaal moet word, het die administrateur Discovery Health gesê.

.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

  • INDEKS
  • GELDEENHEDE
  • KOMMODITEITE
Data word met 15 min. vertraag
  • Gold Mining 1469,3 (614)
  • Top 40 52785,56 (-39862)
  • All Share 59102,67 (-44213)
  • Resource 10 47168,71 (-55190)
  • Financial and Industrial 30 78874,98 (-43661)

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.