Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Mediese Fondse
Mediese skemas: Amper R33 mjd. uit eie sak betaal
Mense wat ’n mediese fonds wil behou ná die inwerkingstelling van NGV, gaan baie meer daarvoor moet betaal én gaan steeds vir NGV self ook moet betaal.

Lede van mediese skemas het in 2018 byna R33 miljard, ingesluit uit spaarrekeninge, uit hul eie sakke betaal.

Die Raad op Mediese Skemas (RMS) het Donderdag aan die portefeuljekomitee oor gesondheid in die parlement gesê daar is kommer oor die styging in die betalings uit lede se eie sakke.

Dit is buiten die R174 miljard wat lede in 2018 tot premies bygedra het wat saamgegooi word in die risikopoel van mediese fondse waaruit eise betaal word.

Dr. Sipho Kabane, registrateur van mediese skemas, het gesê die bedrag vir selfbetalings toon waarskynlik nie eers die volle omvang nie omdat verbruikers nie alles aanmeld waarvoor hulle self opdok nie.

Die RMS bereken dié bedrag as die verskil tussen totale eise ingedien en die eise wat uit die risikopoel betaal is. Dit sluit dus ook eise in wat uit spaarrekeninge betaal is.

Die jongste jaarverslag van die RMS wat Vrydag vrygestel is, het getoon die selfbetaling het van 2014 af deurgaans gestyg.

Dit het oor die vier jaar met 36% of R8,8 miljard van R24 miljard af gestyg.

In 2018 het die besteding R32,9 miljard beloop vergeleke met die vorige jaar se R31,8 miljard, wat beteken verbruikers het R1,1 miljard meer binne een jaar uit hul eie sakke opgedok.

Van die totale bedrag het die betalings uit mediese spaarrekenings sowat R17,2 miljard beloop, wat ’n styging van 6,8% vergeleke met R16,1 miljard in die vorige jaar is.

Dit beteken dat wat lede werklik self betaal het, het R15,6 miljard beloop (2017: R15,7 miljard).

In die boekjaar het lede altesaam R192,2 miljard tot mediese fondse bygedra. Dit is ’n styging van 6,9% van die vorige jaar se R179,8 miljard.

Die grootste deel van die besteding wat as selfbetalings beskryf word, is op medisyne. Dit beloop sowat ’n derde van die besteding uit lede se eie sakke.

Die selfbetalings is baie groter vir oop as vir geslote mediese fondse. Oop mediese fondse se selfbetalings beloop sowat R25,6 miljard, terwyl dié van geslote fondse R7,2 miljard beloop.

“Dit hou verband met die voordele van geslote skemas wat neig om meer omvattend as dié van oop skemas te wees,” lui die verslag.

Die jaarverslag gee ’n oorsig oor hoe mediese skemas in die boekjaar tot einde Desember vertoon het.

Swakker gevaar

In die boekjaar het lede altesaam R192,2 miljard tot mediese fondse bygedra. Dit is ’n styging van 6,9% van die vorige jaar se R179,8 miljard.

Daarvan is R174 miljard (uitgesluit bydraes tot spaarrekeninge) tot die risikopoel bygedra. Dit is R11 miljard of 6,7% meer as die vorige jaar se R163 miljard.

Die betaling van eise uit die risikopoel het met 8% van R145 miljard in die vorige jaar tot R157 miljard gestyg.

Volgens die RMS het die meeste mediese fondse se ervaring met eise in 2018 verswak vergeleke met die vorige jaar.

LEES OOK: Mediese skemas oorskat eise in 2017 met miljarde.

Die ervaring met eise word gemeet in die eiseverhouding (die bedrag wat geëis word vergeleke met die risikopoel) wat einde Desember verlede jaar 90,2% bereik het. Dit is meer as die vorige jaar se 88,7%.

“Die hoër eiseverhouding is weens verskeie faktore wat mediese fondse ondervind het, waaronder meer dienste wat gebruik is en ’n aantal duurder gevalle wat behandel is.”

Die mediese fondse wat ’n beter eiseverhouding beleef het, het hul eisebestuursprosesse verbeter, lui die verslag.

Mediese fondse het ook verlede jaar R15 miljard betaal aan nie-gesondheidskostes wat onder meer administrasiekostes insluit. Dit is 5% meer as in die vorige jaar.

Die RMS het gesê hoewel die styging in nie-gesondheidskostes die afgelope jare stabiel is, is die bedrae wat daarvoor betaal word te hoog.

Nadat die eise en bedryfskostes betaal is, het mediese fondse R1,2 miljard – vergeleke met die vorige jaar se R3,3 miljard – oorgehou.

Bydrae tot reserwes daal

Nadat mediese fondse beleggingsinkomste op hul opgehoopte fondse verdien het, is ’n surplus van R5 miljard oorgehou. Dít is die bedrag wat tot reserwes bygedra word, wat 43% minder as die vorige jaar se R8,9 miljard is.

Die RMS het dit aan die swakker finansiële vertoning van mediese skemas verlede jaar vergeleke met 2017 toegeskryf. Boonop het die beleggingsinkomste verlede jaar nie so goed gevaar nie.

Die beter jaar wat sommige groter mediese skemas ervaar het, het in geheel egter ’n positiewe impak op die algehele solvensieverhouding van die bedryf gehad.

Mediese fondse moet ingevolge wetgewing 25% van hul jaarlikse premies vir bewaring in reserwes opsysit.

Geslote mediese fondse se algehele solvensieverhouding het van 38% tot 41,9% gestyg.

Dit is toegeskryf aan die ommekeer by die Government Employees Medical Scheme (Gems) se solvensieverhouding wat van 15,2% tot 24,7% – dus baie naby aan die vereiste vlak – gestyg het.

Dit het gekom nadat Gems sy eisebestuur strenger gemaak en ook sy wagtye verander het.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.