Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Mediese Fondse
Medies vir armste werkendes kom skielik nie meer

Die Raad op Mediese Skemas (RMS) gaan dit nie meer vir mediese fondse moontlik maak om ’n afsonderlike stel voordele vir lae besoldigdes aan te bied om die premies meer bekostigbaar vir hulle te maak nie.

Kabane
Dr. Sipho Kabane, registrateur van mediese skemas. Foto: Nellie Brand-Jonker

Die RMS het die afgelope week skielik in ’n omsendbrief aangekondig dat “geen laekoste-opsies” in die toekoms toegelaat gaan word wat op laerinkomstegroepe gerig is nie.

Daar word al sedert 2015 met die mediesefondsbedryf oor ’n laekoste-opsie gekonsulteer.

Onverwags gestop

“Die besluit is geneem sodat die produkte met die wyer gesondheidsbeleid, wat tans bespreek word, belyn word om ongeag ’n persoon se ekonomiese status gepaste toegang tot sorg te verseker,” sê dr. Sipho Kabane, registrateur van mediese fondse, in die omsendbrief.

Die RMS moes die afgelope twee jaar met ’n nuwe stel basiese voordele vorendag kom wat mediese fondse sou kon gebruik om laekoste-opsies aan laerinkomstegroepe te bied.

Die rede hoekom ’n nuwe stel basiese voordele nodig is, is omdat die huidige voordele wat mediese fondse verplig word om te dek baie duur is. Dit maak gewone opsies te duur vir laer besoldigdes.

Minderwaardige produkte

Hy sê die gedagte vir laekoste-opsies was om mediese fondse meer bekostigbaar te maak deur produkte te ontwikkel wat op “’n spesifieke bevolkingsgroep, hoofsaaklik lae-inkomste-huishoudings” gerig is.

Volgens hom is daar egter waargeneem dat die produkte wat laer besoldigdes teiken ’n “geleentheid vir minderwaardige voordele bied”.

Hy meen ook dat die sukkelende ekonomie en hoë werkloosheidsyfer dit moeilik gaan maak om die ideaal van ’n laekoste-opsie te verwesenlik.

Versekering gestop

Voorts gaan die versekering wat tans aan laer besoldigdes verkoop word en wat basiese voordele dek, net tot einde Maart 2021 mag bestaan.

Sedert nuwe wetgewing in werking getree het, het versekeraars vanaf 1 April 2017 tot einde Maart 2019 van die RMS vrystelling gekry om die produkte te verkoop.

Die RMS moes in dié tweejaartydperk die nuwe basiese voordele vir laekoste-opsies ontwikkel. Die plan was om dan die versekeringsprodukte in die laekoste-opsies te omskep.

Dié produkte bied tipies net primêre gesondheidsorg terwyl mediese fondse baie ryker verpligte voordele het wat gedek moet word.

Omdat die riglyne vir die laekoste-opsies nie einde Maart gefinaliseer is nie, is die vrystelling verder met twee jaar tot einde Maart 2021 verleng.

Volgens die RMS is met die nasionale tesourie en die reguleerders wat oor versekeraars waghou, die Gedragsowerheid oor die Finansiëledienstebedryf (FSCA) en die Omsigtigheidsowerheid, daaroor gekonsulteer.

Kabane het gesê as die produkte toegelaat word om voort te bestaan “gaan dit voortgaan om opportunisme met produkontwerp aan te moedig wat die rede vir mediese fondse ondermyn”.

Volgens hom moet die produkte voor einde Maart 2021 gestop word anders sal dit as onwettig beskou word.

Honderde duisende geraak

Honderdduisende mense kan deur die besluit geraak word, volgens dr. Jonathan Broomberg, uitvoerende hoof van of Discovery Health.

Discovery Health het nie laekoste-opsies nie, maar 'n ander filiaal in die groep, Discovery Life, verkoop PrimaryCare-versekeringsprodukte en daar is net op dié produkte alleen soveel mense.

Broomberg het oor die besluit gesê: “Die besluit van die RMS is strydig met die jare lange beleid wat daarop gemik is om mediese versekering en uiteindelik mediese skemas se dekking meer bekostigbaar vir miljoen Suid-Afrikaners te maak.

“Dit wil voorkom of dit strydig is met die doelstellings en voornemens met universele gesondheidsdekking (NGV) wat daarop gerig is om toegang tot sorg te verbeter en die selfbetalings te verminder.

“As dit in werking gestel word, gaan dit beteken honderde duisende individue sonder gesondheidsversekering gelaat gaan word omdat hulle nie in staat is om mediese skema te bekostig nie.”

Sonder konsultasie

“Daar word van 2015 hieroor gekonsulteer en skielik, boem, is dit weg,” het ’n bron in die bedryf gesê wat nie aangehaal wil word nie.

Hy meen die RMS doen dit met die oog op die nasionale gesondheidsversekering (NGV). “Ek kan jou ’n brief gee die NGV gaan nie vinnig gebeur nie.”

Michael Settas, 'n onafhanklike gesondheidskonsultant, het ook gesê te oordeel na die reaksie van mediese fondse en versekeraars wat vrystelling geniet, het daar geen konsultasie oor die verandering plaasgevind nie.”

Settas meen die omsendbrief is nie duidelik oor wat die RMS se bedoeling is met die lede wat tans deur die vrygestelde produkte gedek word nie.

“Die grootste meerderheid van hulle is lae besoldigdes wat nie tradisionele mediese fondse kan bekostig nie.”

Volgens Settas het Kabane elders opgemerk dat as die laekoste-opsies toegelaat word om sonder ’n omvattende pakket die mark te oorstroom, sal dit die oorgang na die NGV bemoeilik.

“So ’n opmerking ontbreek egter rede. Die NGV is baie jare van ’n werklikheid af en dit is baie onwaarskynlik dat dit omvattende dekking sal bied gegewe die land se swak finansies. Wat moet hierdie lede doen ná April 2021 as hul primêresorgvoordele eenvoudig van hulle weggeneem word?”

Nuwe voordele vir almal

Die aankondiging kom skaars ’n week nadat ’n konsepvoorstel oor ’n nuwe stel basiese voordele vir kommentaar deur die RMS vrygestel is.

Kabane het gesê die basiese voordelepakket, wat ’n sterk fokus op primêre gesondheidsorg het, sal nou dien as “die beginpunt vir gesprekke om ’n voordelepakket vir almal in Suid-Afrika te ontwikkel”.


MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.