Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Mediese Fondse
Mediese fondse dalk só gou goedkoper

Die Raad op Mediese Skemas (RMS) belowe om teen volgende maand ’n raamwerk vir laekoste-voordeelopsies te publiseer wat mediese fondse bekostigbaarder vir miljoene mense kan maak.

Daar is 270 toestande wat mediese fondse móét dek, en dit jaag premies op.

Die RMS sê die raamwerk – wat al etlike jare sloer – sal saam met ’n hersiening van die huidige voorgeskrewe minimum voordele (VMV’s) vir kommentaar gepubliseer word.

Dié twee kwessies gaan hand aan hand omdat mediese fondse sê dis onmoontlik om goedkoop voordeelopsies te bied solank as wat daardie opsie onderhewig is aan die huidige lys van meer as 270 VMV-toestande en alle noodgevalle.

Graham Anderson, hoofamptenaar van Profmed, sê konserwatief geraam is daar meer as 6 miljoen mense wat te min verdien om ’n mediese fonds te bekostig en wat sal voordeel trek uit ’n laekoste-voordeelopsie.

Anderson sê mense in laer-inkomstegroepe wil dekking hê vir besoeke aan ’n algemene praktisyn omdat hulle nie ’n hele dag se werk kan mis terwyl hulle by ’n staatshospitaal of -kliniek vir ’n konsultasie of medikasie moet wag nie.

Die RMS se verwagte raamwerk moet egter sê watter soort dienste by ’n laekoste-opsie ingesluit sal moet word en wat uitgesluit kan word.

Fondse wil ’n vrystelling van VMV’s hê om werklike laekoste-opsies aan te bied.

Wicus Kotze, uitvoerende bestuurder van bestuurde gesondheidsorg by Bestmed, verduidelik dat die “basiese” planne van fondse steeds te duur is vir baie mense net omdat die “basiese planne” ook VMV’s ten volle moet dek.

By Bestmed is hul mees basiese opsie die Beat 1, “wat eintlik ’n hospitaalplan is”. Die Beat 1 se premies vir 2019 is tussen R1 335 en R1 485 per maand.

Dié “hospitaalplan” moet egter ook kragtens wet vir toestande soos ernstige depressie, chroniese medikasie vir hoë bloeddruk, hoë cholesterol en diabetes betaal, terwyl ’n mandjie van doktersbesoeke en bloedtoetse buite die hospitaal óók onder dié sogenaamde hospitaalplan gedek moet word.

Luidens die RMS se jongste jaarverslag – vir 2017 – was 49% van alle risikovoordele wat mediese fondse in daardie jaar uitbetaal het, vir VMV’s.

Boonop bepaal die wet dat fondse vir dié toestande moet betaal “teen volle koste” en sonder enige bybetalings. Fondse beskuldig sommige dokters daarvan dat hulle dit as ’n “oop tjekboek” misbruik.

Die gevolg van VMV’s is dat lede baie soortgelyke voordele het ongeag of hulle aan die mees basiese planne of hoër planne deelneem en dit maak basiese planne minder bekostigbaar.

Die RMS se jaarverslag wys elke begunstigde van ’n mediese fonds het in 2017 gemiddeld R746 per maand betaal om al die VMV-koste te dek.

Craig Comrie, uitvoerende direkteur van Profmed, sê die VMV-hersieningsproses van die RMS sloer te lank en behoort te fokus op primêre gesondheidsorgdienste eerder as duur dienste gegrond op diagnose wat meestal in hospitale gedoen word en ’n duur stel dienste behels.

“Dit lyk of die laekoste-voordeelopsie ’n laer prioriteit is en daar word gefokus op die hoogs gepolitiseerde debat oor die Nasionale Gesondheidsversekering (NGV). Tog is daar ’n behoefte aan bekostigbaarder gesondheidsorg en sonder vrystellings van VMV-wetgewing en van die hoë koste van VMV’s, sal dit buite talle mense se bereik bly,” sê Comrie.

Die RMS se kliniese eenheid het by navraag gesê almal sal baat vind by die hersiene VMV-pakket omdat dit duidelik sal wees spesifiek watter dienste onder VMV’s val, terwyl die huidige VMV-raamwerk meer kompleks is.

Die huidige bedeling lys byvoorbeeld die VMV-toestande, maar stippel nie duidelik uit watter soort dienste beskikbaar moet wees om dié toestande te behandel nie.

Rapport verneem die eerste stap sal waarskynlik die hersiening van bestaande primêre gesondheidsorgvoordele, soos die behandeling van sowat 20 chroniese siektes, insluit en die bekostigbaarheid van bewese kostedoeltreffende ingrypings soos immunisering ondersoek.

Die VMV’s vir primêre gesondheidsorg sal eerste hersien word, terwyl ’n omvattende hersiening van watter toestande op die lys is, nog twee tot drie jaar kan duur.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

  • INDEKS
  • GELDEENHEDE
  • KOMMODITEITE
Data word met 15 min. vertraag
  • Gold Mining 2417,42 (6258)
  • Top 40 48865,06 (-69430)
  • All Share 54876,82 (-74598)
  • Resource 10 43434,32 (-38670)
  • Financial and Industrial 30 73805,91 (-119542)

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.