Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Mediese Fondse
Siekefondse kan baat by dié model
Mediese fondse moet oorweeg om kostes te verlaag wat lidmaatskap ook goedkoper sal maak. Grafika: Pixabay

Mediese fondse kan hospitaal-opnames verminder en geld op spesialiste bespaar deur oor te skakel na ’n alternatiewe vergoedingsmodel, het twee navorsers bevind.

Die navorsers het 22 jaar se data oor ’n kapitasiemodel in Nelson Mandelabaai ontleed. ’n Kapitasiemodel beteken die fonds betaal ’n eenmalige bedrag per pasiënt vir ’n gesondheidspraktisyn om dienste te lewer – ongeag hoeveel dienste uiteindelik benodig word.

Dit is ook die voorkeur-betalingsmodel wat in die Wetsontwerp op Nasionale Gesondheidsversekering (NGV) voorgestel word.

Baie mediese fondse bied reeds goedkoper opsies vir hul lede wat op die kapitasiemodel gegrond is. Voorbeelde is die Discovery KeyCare-reeks en die BonCap-planne van Bonitas.

Dié fondse het ’n netwerk dokters en ander verskaffers wat die lid moet gebruik.

Een pasiënt kan sy dokter een keer of tien keer per maand besoek, maar die maandelikse betaling deur die mediese fonds bly dieselfde.

Daar is gewoonlik nie perke op besoeke aan algemene praktisyns en vir primêre sorg nie en sekere spesialisdienste is ingesluit. Enige sorg in hospitale of ander geriewe word aktief bestuur. Die dokter is die primêre sorggewer en verwys die pasiënt verder waar nodig na ander kundiges in die netwerk.

Drs. Louis Rossouw en Martin de Villiers, albei betrokke by InteliHealth Africa, het bevind dié model hou reuse kostevoordele in bo die tradisionele koste-per-diens-model.

Rossouw, onder meer ’n voormalige professor aan die Universiteit van Pretoria, was ná 1994 lid van ’n werkkomitee met wie die departement van gesondheid gekonsulteer het oor nasionale gesondheidsbeleid.

De Villiers het in huisartskunde en familiesorg gespesialiseer en het ook ’n MBA agter sy naam.

Hulle navorsing wys:

  • Die gemiddelde aantal besoeke aan mediese diensverskaffers was 9,54 besoeke per lid per jaar vir die kapitasie-model terwyl dit 11,47 was vir pasiënte wat vir elke besoek betaal het. Die gemiddelde koste onder kapitasie was 8% laer.
  • Volgens die navorsers eindig pasiënte in ’n kapitasiestelsel ook minder in die hospitaal. Oor die jare het die opnames vir kapitasie-pasiënte afgeneem vanaf 205 opnames per 1 000 siekefondslede in 2009 tot 164 in 2016. Die gemiddelde hospitaalverblyf was 3,2 dae. Die nasionale norm vir pasiënte wat gelde per besoek eis, is 200 toelatings per 1 000 lede en 4 dae in die hospitaal. Die hospitaalkostes vir kapitasie-lede was daarom 10% laer.
  • ’n Kapitasie-model veroorsaak ’n verspreiding van kostes, het die navorsers bevind. Meer geld gaan aan algemene praktisyns wat meer gereeld besoek word en minder aan spesialiste en hospitale.

Waar mediese fondse net 5% van hul uitgawes aan algemene praktisyns onder die tradisionele model betaal, is dit 21% van kapitasieplanne se uitgawes. Die spesialiste se deel van die koek is 13% teenoor 20% en hospitale s’n 25% teenoor 32%.

Rossouw sê al verwys sommige siniese rolspelers na die kapitasie-model as “toesighoudende verwaarlosing” wys hul navorsing die stelsel werk.

Hy sê die kapitasiemodel het nie net laer kostes vir fondse meegebring nie, maar lidmaatskap vir dié opsies is meer bekostigbaar en die gehalte van sorg is nie beperk nie.

Die voordeel vir algemene praktisyns is ’n vaste stroom van voorspelbare inkomste.

Meer oor:  Mediese Fondse  |  Mediese Sorg  |  Gesondheidsorg  |  Hospitale
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.