Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Tot jou diens
Tot Jou Diens: GEPF antwoord nie haar e-posse

Hy het nuwe sleutels nodig

Andre Hayward het by die Menlyn Multifranchise ’n bloutjie geloop.

“My bakkie was al voorheen by die Menlyn Multifranchise vir ’n diens. Tans val die sleutels van my bakkie uitmekaar en ek het hulle vir hulp genader.

“Ek het hulle gevra om twee nuwe sleutels te laat maak. Elmon Mahlangu het gesê dit kan gedoen word. ’n Kwotasie is aan my uitgereik en ek het dieselfde dag ’n betaling aan Menlyn Multifranchise gemaak.”

Hayward het ook die bewys van betaling aan Menlyn Multifranchise verskaf.

“Ek het ’n afspraak gemaak om my bakkie in te vat, maar daar aangekom was die masjien waarmee daar aan die rekenaar gewerk moes word, stukkend.

“ ’n Hele aantal weke het verloop wat hulle my steeds nie kon help nie en ek het gevra of hulle dan my geld eerder kan teruggee. Die saak vorder egter nie.”

Tot Jou Diens het Hayward se klagte onder Menlyn Multifranchise se aandag gebring. Hayward het sedertdien nuwe sleutels vir sy bakkie ontvang.

   

GEPF antwoord nie haar e-posse

    

Belinda Kotze het ons gevra om haar met ’n klagte oor die pensioenfonds vir staatswerkers (GEPF) te help.

“My skoonma is in Februarie 2017 oorlede. Aanvanklik was daar ’n probleem met haar doodsertifikaat en ons kon eers ná agt maande ’n eis vir haar begrafnisvoordeel by die GEPF indien.

Al die nodige dokumente is voltooi en per e-pos deurgestuur.

Vandat ek die korrekte doodsertifikaat ontvang het, rig ek op ’n weeklikse grondslag navrae aan hulle.

Die GEPF het aanvanklik gesê ek kan nie die dokumente deur e-pos nie, dit moet gefaks word.

Ek moes nogal moeite doen, maar kon darem die dokumente aan hulle gefaks kry.

Ek het in November ’n e-pos van Alvina Masemela van die GEPF ontvang om te sê my skrywes is ontvang en dat ek binne sewe dae terugvoering kan verwag.”

Omtrent twee maande het verloop voordat Kotze weer van die GEPF gehoor het.

“Met ’n SMS het hulle my ingelig daar is nog uitstaande inligting wat hulle nodig het voor die begrafnisvoordeel uitbetaal kan word.

Ek het hulle probeer bel om uit te vind wat nog nodig is, maar ek kom nooit deur nie.

My e-posse bly ook onbeantwoord en ek weet nie meer watter kant toe nie.”

Tot Jou Diens het Kotze se klagte onder die GEPF se aandag gebring.

Sy sê haar skoonma se begrafnisvoordeel is intussen uitbetaal en dat alles nou in orde is.

   

Standard Bank betaal hom terug

    

Dennis Brand het by Standard Bank ’n bloutjie geloop.

“Ek is moedeloos met Standard Bank gesukkel.

Ek het reeds in Desember hulle versoek om ’n versekeringspolis van my naam te verwyder. Ek het elders versekering bekom. Ná ’n lang gesukkel het ek wel ’n brief van Standard Bank gekry wat sê die polis is gekanselleer.

“Intussen het ek ’n aantal betalings op hierdie polis moes maak en ek het Standard Bank gevra om ’n terugbetaling aan my te maak. Dit het nog nie gebeur nie.

“Iets anders wat pla, is dat ek al verskeie kere dokumente deurgestuur het om Standard Bank van my nuwe adres te verwittig, maar die nodige verandering is steeds nie op my profiel aangebring nie.”

Ons het Standard Bank gevra om moeite van Brand se klagte te maak.

Sy adres is op hul stelsel reggestel en ’n terugbetaling is goedgekeur.

      

Pick ’n Pay gee haar punte terug

     

Mara Earle het ’n klagte oor Pick ’n Pay aan ons gerig.

“Ek is onlangs al die punte op my Pick ’n Pay Smartshopper-kaart kwyt. Ongeveer R500 se punte is sonder waarskuwing van my kaart verwyder en dit voel behoorlik of Pick ’n Pay my beroof het.”

Tot Jou Diens het Pick ’n Pay gevra om ondersoek in te stel. Hulle het Earle haar punte

teruggegee en haar ingeteken op hul kennisgewingstelsel sodat sy voortaan van die stand van sake op haar Smartshopper-kaart bewus sal wees.

Earle sê sy sal in die toekoms op ’n meer gereelde grondslag haar Smartshopper-punte in kontant omskakel.

Hennie Grobler het ’n soortgelyke klagte aan die van Earle oor Pick ’n Pay vir Tot u Diens gestuur.

“In Januarie het ek en my vrou besef die punte op ons Pick ’n Pay Smartshopper-kaarte is aansienlik minder as wat dit aan die einde van 2017 was.

Ons het hulle telefonies probeer bereik om te hoor wat gebeur het, maar ons kom nooit deur nie.

Twee e-posse aan Pick ’n Pay se kliëntediens het ook nie reaksie uitgelok nie.

Altesaam het ek en my vrou meer as R1 000 se Smartshopper-punte verloor en ons weet nie hoekom nie.”

Ons het ook Grobler se klagte vir Pick ’n Pay gestuur. Sy en sy vrou se punte is ook terug op hul kaarte. Pick ’n Pay het weer eens persone met Smartshopper-kaarte daarop gewys dat hul punte nou elke jaar verval en dat hulle dit liefs moet gebruik voordat dit gebeur.

Old Mutual belowe meer spoed

    

Irma Horn meen Old Mutual se diens kan verbeter.

“Ek het al in November verlede jaar vir ’n uitbetaling op my Old Mutual-annuïteit gevra. Al die nodige dokumente om hierdie betaling af te handel is al meer as een keer vir hulle gestuur. Ongelukkig kry ek nie terugvoering van Old Mutual nie.”

Tot Jou Diens het Old Mutual gevra om aandag aan Horn se klagte te gee.

Sy sê hulle het haar per e-pos en telefonies gekontak om haar om verskoning te vra.

Hulle het ook belowe om hul prosesse vir die afhandeling van die betaling te bespoedig.

As ’n gebaar van welwillendheid het Old Mutual ook ’n ekstra R500 aan Horn oorbetaal om vir die oponthoud om verskoning te vra.

    

Hy is ontevrede met Absa se diens

Gordon Visser van Sasolburg was nie met Absa se diens tevrede nie.

“Ek het in November verlede jaar ’n SMS van Absa gekry wat lui dat as ek ’n balans van R15 000 op my beleggingsrekening op 1 Januarie vanjaar het, ek vir R500 afslag op die diensgeld van my tjekrekening sal kwalifiseer.

Aan die einde van Januarie vanjaar het Absa R400 se diensgeld op my tjekrekening afgetrek. Volgens my was dit ’n fout.”

Visser het Absa gekontak om te hoor hoekom hy hierdie R400 moes betaal.

“Absa het gesê hulle het wel ’n fout gemaak en dat die R400 vir my teruggegee sal word. ’n Maand later het hulle dieselfde fout gemaak en ek het ook nog nie die eerste R400 teruggekry nie.

Pluimpies

Daleen van As van Secunda sê Wimpy in die Carnival-winkelsentrum in Brakpan se diens is net die beste.

“Ons het onlangs ’n babatee by Wimpy in die Carnival-winkelsentrum gehou. Met die hulp van Martin, wat daar werk, het alles seepglad verloop.

Hy het ons op hoogte gehou met reëlings en het gesorg dat ons nie vir tafels of kos hoef te wag nie.Die diens was puik en ek wil net baie dankie sê vir al sy moeite.”

“Hul kliëntediens het ondersoek ingestel om te probeer bepaal hoekom die fout maand ná maand herhaal word.

“Uiteindelik het hulle gesê daar moes ’n omskakeling op my profiel gewees het, wat hulle nooit gedoen het nie. Ek het glad nie van hierdie omskakeling kennis gedra nie.”

Visser is na ’n konsultant, wat hom moes help, verwys.

“Absa se konsultant het my aangeraai om met die bestuurder van die plaaslike Absa-tak te gaan praat. Ek het so gemaak, maar dit het nie gelyk of hierdie bestuurder veel in my probleem belangstel nie. Haar aanname was dat ek self die omskakeling moes gedoen het, maar ek is nooit hiervan ingelig nie.

“Uiteindelik het Absa gesê die nodige verandering sal binne 30 dae gemaak word. In die proses het ek egter reeds R800 verloor wat ek hulle gevra het om aan my terug te betaal.

“Ek het nog nie hierdie geld gekry nie en daar is nog geen nuus van Absa op wanneer ek ’n betaling kan verwag nie. Ek is glad nie gelukkig met die stand van sake nie en ek dink dis tyd dat Absa my geld teruggee.”

Tot Jou Diens het Absa gevra om ondersoek in te stel en terugvoering aan Visser te verskaf. Hy sê Absa-hoofkantoor en die plaaslike tak het hom gekontak om vir die ongerief om verskoning gevra.

Die betrokke omskakeling wat op sy profiel moes gemaak word, is intussen afgehandel en die volle bedrag wat aan Visser verskuldig was, is reeds aan hom terugbetaal.

Visser het Absa vir hul hulp bedank.


Wenke wat werk

Volgens die nasionale kredietwet moet alle kredietverskaffers eers by die Nasionale Kredietreguleerder (NKR) registreer voordat hulle krediet aan kliënte kan verskaf.

Volgens Obed Tongoane, visehoof van die NKR, is daar heelwat webwerwe wat dié reël probeer omseil, maar nie krediet mag uitreik nie.

“Daar is ongelukkig talle verbruikers met swak kredietgeskiedenisse wat desperaat is om geld te bekom wat vir hierdie sogenaamde kredietverskaffers se slinkse planne val,” sê Tongoane.

Volgens Tongoane moet ’n mens baie versigtig wees vir enige kredietverskaffer wat geld by jou wil hê alvorens ’n lening aan jou toegestaan kan word. “Dis onwettig vir ’n kredietverskaffer om jou vir enige geld te vra voordat ’n lening aan jou toegestaan word,” sê Tongoane.

Waar jy ’n transaksie met ’n onwettige kredietverskaffer aangegaan het en jy geld aan hierdie onderneming oorbetaal het voordat jy die lening gekry het, is Tongoane se raad om ’n saak by die polisie te maak.

“Aangesien hierdie soort ondernemings nie regtig bestaan nie, is die ongelukkigheid van die saak dat persone wat deur hulle bedrieg is, nie hul geld sal terugkry nie,” sê Tongoane.

Oor skuldberading sê hy die gedagte is om verbruikers wat in die knyp is te help om hul maandelikse verpligtinge na te kom en nie om hulle te help bespaar nie.

Ook hier sê Tongoane verbruikers moet lig loop vir skuldberaders wat ongelooflike besparings op maandelikse paaiemente beloof.

As dit te goed klink om waar te wees, dan is dit waarskynlik.

’n Mens kan net onder skuldberading geplaas word as jy daartoe instem en jy jou ID-nommer aan die skuldberader verskaf.

Om meer hieroor uit te vind, skakel die NKR by 0860 627 627 of besoek hul webwerf by www.ncr.org.za


MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

  • INDEKS
  • GELDEENHEDE
  • KOMMODITEITE
Data word met 15 min. vertraag
  • Gold Mining 1067,41 (3106)
  • Top 40 50659,45 (-32770)
  • All Share 56882,74 (-28151)
  • Resource 10 44620,89 (88898)
  • Financial and Industrial 30 75197,76 (-120859)

Sakegesprek

Jy moet ‘n intekenaar wees om ons weeklikse Sakegesprek-nuusbrief met Theo Vorster te ontvang.

Hallo, jy moet ingeteken wees of registreer om artikels te lees.